ສະຫາຍເລຂາທິການໃຫຍ່ ເນັ້ນໃຫ້ລັດເອົາໃຈໃສ່ຄຸ້ມຄອງ ແລະ ພັດທະນາທີ່ດິນ ພ້ອມຊຸກຍູ້ສົ່ງເສີມວິສາຫະກິດຂະໜາດນ້ອຍ ແລະ ກາງໃຫ້ແຂງແຮງກວ່າເກົ່າ

ໃນໂອກາດປິດກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 4 ສະໄໝທີ X ໃນວັນທີ 24 ມີນານີ້ ທີ່ນະຄອນຫລວງວຽງຈັນ ພາຍຫລັງດຳເນີນມາເປັນເວລາ 5 ວັນ, ສະຫາຍ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນ ປະຕິວັດລາວ ໄດ້ໃຫ້ທິດຊີ້ນຳວ່າ: ໃນໄລຍະຜ່ານມາ ວຽກງານທີ່ດິນ ແລະ ວຽກງານສົ່ງເສີມທຸລະກິດຂອງພາກຕ່າງໆ ກໍໄດ້ມີນະໂຍບາຍ ແລະ ໄດ້ຫັນເປັນນິຕິກຳເປັນລະບຽບ ເຮັດໃຫ້ວຽກງານທີ່ດິນ ແລະ ວຽກງານສົ່ງເສີມວິສາຫະກິດຂະໜາດນ້ອຍ, ຂະໜາດກາງ ມີບົດບາດ ແລະ ສາມາດປະກອບສ່ວນເຂົ້າໃນການພັດທະນາເສດຖະກິດ-ສັງຄົມແຫ່ງຊາດ, ສາມາດປົວແປງຊີວິດການເປັນຢູ່ຂອງປະຊາຊົນດີຂຶ້ນ, ສາມາດຍົກລະດັບລາຍໄດ້ ແລະ ແກ້ໄຂຄວາມຄວາມທຸກຍາກຂອງປະຊາຊົນມີການຫັນປ່ຽນຢ່າງຕັ້ງໜ້າ. ແຕ່ພ້ອມກັນນັ້ນການຄຸ້ມຄອງ, ພັດທະນາທີ່ດິນ ກໍຄືການສົ່ງເສີມ, ຄຸ້ມຄອງ ແລະ ພັດທະນາວິສາຫະກິດຂະໜາດນ້ອຍ ແລະ ກາງ ຢູ່ປະເທດເຮົາຍັງພົບກັບຄວາມຫຍຸ້ງຍາກອ່ອນແອ ແລະ ບໍ່ທັນເປັນລະບົບເທົ່າທີ່ຄວນ ເຊິ່ງກອງປະຊຸມຄະນະບໍລິຫານງານສູນກາງພັກຄັ້ງນີ້ ກໍໄດ້ມີຄວາມເປັນເອກະພາບສູງ ພ້ອມຕັດສິນໃຈສືບຕໍ່ນຳພາແກ້ໄຂບັນຫາຕ່າງໆໃຫ້ດີຂຶ້ນ ແລະ ໄດ້ມອບໃຫ້ລັດຖະບານ ຮີບຮ້ອນຈັດຕັ້ງຜັນຂະຫຍາຍທິດຊີ້ນຳ ກ່ຽວກັບບັນຫາດັ່ງກ່າວ ໃຫ້ເປັນນິຕິກຳລະອຽດ ເຂົ້າສູ່ການຈັດຕັ້ງປະຕິບັດຢ່າງມີປະສິດທິຜົນຕົວຈິງ. ພ້ອມດຽວກັນນີ້, ກອງປະຊຸມຍັງໄດ້ເຫັນດີເປັນເອກະພາບຮັບຮອງເອົາທິດທາງ, ວຽກງານຈຸດສຸມໃນແຕ່ລະຂົງເຂດວຽກງານ ກໍຄືການພັດທະນາເສດຖະກິດ-ສັງຄົມ, ສ້າງບາດລ້ຽວໃໝ່ໃນການນຳພາປະເທດຊາດ ຫລຸດພົ້ນອອກຈາກຄວາມດ້ອຍພັດທະນາ, ຍົກສູງຄວາມສາມາດໃນການຊີ້ນຳ-ນຳພາຂອງຄະນະພັກ ກໍຄືປະສິດທິພາບໃນການບໍລິຫານລັດ, ຄຸ້ມຄອງເສດ ຖະກິດ-ສັງຄົມ ຂອງລັດຖະບານ ແລະ ອົງການປົກຄອງແຕ່ລະຂັ້ນ, ສຸມໃສ່ແກ້ໄຂບັນຫາເສດຖະກິດໃຫ້ມີຄວາມໝັ້ນທ່ຽງ, ແກ້ໄຂປະກົດການຫຍໍ້ທໍ້ຕ່າງໆໃນສັງຄົມ ແລະ ປັບປຸງປົວແປງພາຍໃນພັກ ໃຫ້ມີຄວາມປອດໃສ, ເຂັ້ມແຂງ ແລະ ໜັກແໜ້ນ.

ພ້ອມດຽວກັນ, ຄະນະບໍລິຫານງານສູນກາງພັກ ຍັງຮຽກຮ້ອງໃຫ້ທົ່ວພັກ, ທົ່ວລັດ, ທົ່ວກຳລັງປະ ກອບອາວຸດ ແລະ ທົ່ວປວງຊົນລາວບັນດາເຜົ່າ ຈົ່ງເຊີດຊູຈິດໃຈຮັກຊາດ, ເອກະລາດ, ເປັນເຈົ້າຕົນເອງ ຕັ້ງໜ້າປະກອບສ່ວນເຂົ້າໃນຂະບວນການຮັກຊາດ ແລະ ພັດທະນາ, ຕິດພັນກັບການເຊື່ອມຊຶມ ແລະ ຜັນຂະຫຍາຍຜົນສຳເລັດ ຂອງກອງປະຊຸມໃນຄັ້ງນີ້ ເຂົ້າສູ່ການກະທຳຕົວຈິງ, ນຳເອົາຜົນປະໂຫຍດຕົວຈິງ ມາໃຫ້ປະຊາຊົນ ແລະ ປະເທດຊາດ, ສ້າງການຫັນປ່ຽນທີ່ເປັນບາດລ້ຽວສຳຄັນ ໃນການປະຕິບັດມະຕິກອງປະຊຸມໃຫຍ່ ຄັ້ງທີ X ຂອງພັກ ໃຫ້ມີຜົນສຳເລັດ ແນ່ໃສ່ນຳພາປະເທດຊາດຫລຸດພົ້ນອອກຈາກຄວາມດ້ອຍພັດທະນາຕາມເປົ້າໝາຍວາງໄວ້.