ມາເລເຊຍເລັ່ງເປີດຊາຍແດນມີນານີ້ ໃຫ້ເດີນທາງເຂົ້າໄດ້ໂດຍບໍ່ຕ້ອງກັກຕົວ ຫວັງເລັ່ງຟື້ນຟູເສດຖະກິດການທ່ອງທ່ຽວ

ມາເລເຊຍກຽມເປີດຮັບນັກທ່ອງທ່ຽວ ເຖິງວ່າຜູ້ຕິດເຊື້ອໂຄວິດຍັງສູງ ເນັ້ນຟື້ນຟູເສດຖະກິດ ແລະ ກະຕຸ້ນການທ່ອງທ່ຽວໃຫ້ກັບມາ.

ວັນທີ 8 ກຸມພາ 2022, ສຳນັກຂ່າວຣອຍເຕີ (Reuters) ລາຍງານວ່າ: ທາງການມາເລເຊຍກຳລັງພິຈາລະນາເຖິງມການເປີດຊາຍແດນໃຫ້ນັກເດີນທາງສາມາດເຂົ້າປະເທດໄດ້ໂດຍບໍ່ຕ້ອງຜ່ານຂະບວນການກັກຕົວ ໂດຍອາດເລີ່ມໃຊ້ໃນວັນທີ 1 ມີນາຈະເຖິງນີ້ ຖືເປັນສ່ວນໜຶ່ງຂອງແຜນການເລັ່ງຟື້ນຟູເສດຖະກິດຈາກວິກິດໂຄວິດ-19.

ທາງ National Recovery Council (NRC) ທີ່ມີໜ້າທີ່ຮັບຜິດຊອບດ້ານການຟື້ນຟູຈາກໂຄວິດ-19 ມີຄຳແນະນຳໃຫ້ລັດຖະບານຕັດສິນໃຈເປີດຮັບນັກເດີນທາງ ໂດຍຫລຸດຂັ້ນຕອນຈາກຕ້ອງກັກຕົວລະຫວ່າງ 5-10 ວັນ ເຫລືອພຽງການກວດຫາເຊື້ອກ່ອນອອກເດີນທາງ ແລະ ຫລັງເດີນທາງມາເຖິງເທົ່ານັ້ນ.

ທ່ານ ມູຍິດດິນ ຍັສຊິນ ອະດີດນາຍົກລັດຖະມົນຕີມາເລເຊຍ ແລະ ປະທານ NRC ເປີດເຜີຍໃນການຖະແຫລງຂ່າວວ່າ: ການເປີດຊາຍແດນຄັ້ງນີ້ເຮັດໃຫ້ນັກທ່ອງທ່ຽວ ແລະ ນັກລົງທຶນສາມາດເດີນທາງເຂົ້າມາໄດ້ ໂດຍຄາດຫວັງຈະມີຈຳນວນນັກທ່ອງທ່ຽວເພີ່ມຂຶ້ນ ແລະ ສົ່ງຜົນໃຫ້ອຸດສາຫະກຳທ່ອງທ່ຽວກັບມາໄດ້ອີກ ລວມທັງອຸດສາຫະກຳທີ່ກ່ຽວຂ້ອງອື່ນໆເຊັ່ນ: ອຸດສາຫະກຳການບິນ ແລະ ຮ້ານຄ້າທີ່ອາໄສກຳລັງຊື້ຈາກນັກທ່ອງທ່ຽວ.

ປັດຈຸບັນ ສະຖານະການລະບາດຂອງພະຍາດໂຄວິດ-19 ໃນມາເລເຊຍກຳລັງຢູ່ໃນຊ່ວງຂາຂຶ້ນ ໂດຍໃນວັນທີ 8 ກຸມພາ ມີລາຍງານຜູ້ຕິດເຊື້ອໃໝ່ 13.944 ຄົນ ສູງທີ່ສຸດນັບແຕ່ທ້າຍເດືອນກັນຍາເປັນຕົ້ນມາ.

ເຖິງຢ່າງໃດກໍຕາມ, ກະຊວງສາທາລະນະສຸກມາເລເຊຍຢືນຢັນວ່າ: ຜູ້ຕິດເຊື້ອສ່ວນຫລາຍບໍ່ສະແດງອາການ ຫລື ມີອາການປ່ວຍເລັກໜ້ອຍ ເນື່ອງຈາກມາເລເຊຍມີອັດຕາການສັກວັກຊີນສູງ ໂດຍສັກຄົບ 2 ໂດສເຖິງ 98% ໃນກຸ່ມປະຊາກອນໄວຜູ້ໃຫຍ່ ແລະ ສັກກະຕຸ້ນເຂັມທີ 3 ໄປແລ້ວຫລາຍກວ່າ 50%.

ຂະນະທີ່ເດັກອາຍຸ 12-17 ປີ ໄດ້ຮັບວັກຊີນໄປແລ້ວ 89% ແລະ ໄດ້ເລີ່ມສັກໃຫ້ເດັກອາຍຸ 5-11 ປີ ໄປເມື່ອອາທິດຜ່ານມາ.

ອ້າງອີງ:

https://www.reuters.com/…/malaysia-covid-19-panel…/

https://www.channelnewsasia.com/…/malaysia-reopen…