ອາແຈັກ ສັ່ງປົດ ໂອເວີມາສ ອອກຈາກທີມແບບຟ້າຜ່າ ຫລັງຜູ້ກ່ຽວສະແດງຄວາມເຫັນບໍ່ເຫມາະສົມຕໍ່ນັກເຕະທີມຍິງຂອງສະໂມສອນ

ອາແຈັກ ອຳເຕີດຳ ທີມໃຫຍ່ໃນການແຂ່ງຂັນ ເອເຣດີວີຊີ ຮອນແລນ ຢືນຢັນວ່າ ມາກ ໂອເວີມາສ ອະດີດກອງຫລັງຂອງທີມ ຈະບໍ່ໄດ້ເຮັດຫນ້າທີ່ຕຳແຫນ່ງຜູ້ອຳນວຍການດ້ານກິລາບານເຕະ ທີ່ລາວເຮັດຫນ້າທີ່ມາຕັ້ງແຕ່ປີ 2012 ອີກຕໍ່ໄປ ຫລັງໄປສະແດງຄວາມເຫັນໃນລັກສະນະບໍ່ເຫມາະສົມຕໍ່ນັກເຕະທີມຍິງຂອງສະໂມສອນຫລາຍຄົນ ໃນຫລາຍວາລະ ແຕ່ບໍ່ມີການເປີດເຜີຍວ່າເປັນຄວມເປັນແບບໃດ.

ລີນ ເມາຍາດ ປະທານຄະນະກຳມະການບໍລິຫານຂອງສະໂມສອນ ອາແຈັກ ເປີດເຜີຍເຖິງເລື່ອງດັ່ງກ່າວວ່າ : ‘‘  ນີ້ແມ່ນສະຖານະການທີ່ໂຫດຮ້າຍສຳລັບທຸກຝ່າຍທີ່ມີສ່ວນກ່ຽວຂ້ອງ ມັນເປັນເລື່ອງໂຫດຮ້າຍສຳລັບຜູ້ຍິງທີ່ຕ້ອງພົບກັບສິ່ງທີ່ ໂອເວີມາສ ເຮັດ ທັນທີທີ່ເຮົາໄດ້ຮູ້ເລື່ອງ ເຮົາກໍດຳເນີນການຢ່າງວ່ອງໄວ ແລະ ລະມັດລະວັງ ເຮົາໄດ້ພິຈາລະນາ ແລະ ປະເມີນແລ້ວວ່າສິ່ງໃດຖືເປັນສິ່ງທີ່ດີທີ່ສຸດສຳລັບສະໂມສອນ ລວມເຖິງປຶກສາຫາລືກັບ ເອັດວິນ ຟານ ເດີ ຊາ ເຊິ່ງເປັນຜູ້ຈັດການທົ່ວໄປ ແລະ ຜູ້ຊ່ຽວຊານຈາກພາຍນອກນຳ ມາກ ອາດເປັນຜູ້ອຳນວຍການບານເຕະທີ່ີດີທີ່ສຸດເທົ່າທີ່ ອາແຈັກ ເຄີຍມີມາ ແຕ່ໂຊກບໍ່ດີທີ່ໃນກໍລະນີນີ້ລາວຂ້າມເສັ້ນຄວາມບໍ່ເຫມາະສົມ ດັ່ງນັ້ນ ລາວຈຶ່ງບໍ່ສົມຄວນໄດ້ເປັນຜູ້ອຳນວຍການອີກຕໍ່ໄປ ລາວເອງກໍເຫັນດີກັບເລື່ອງນີ້ ນີ້ເປັນເລື່ອງທີ່ຫນ້າເຈັບປວດຫລາຍ ’’.

ສ່ວນ ໂອເວີມາສ ອອກມາຍອມຮັບເຖິງພຶດຕິກຳອັນບໍ່ເຫມາະສົມດັ່ງກ່າວຂອງຕົນເອງ ໂດຍກ່າວວ່າ ‘‘ ຂ້ອຍຮູ້ສຶກລະອາຍໃຈຫລາຍ ຂ້ອຍບໍ່ເຄີຍຄິດມາກ່ອນເລີຍວ່າສິ່ງທີ່ຂ້ອຍສະແດງອອກໄປມັນຈະເປັນການຂ້າມເສັ້ນ ຂ້ອຍຫາກໍເຂົ້າໃຈເມື່ອບໍ່ດົນມານີ້ ຂ້ອຍຢາກຂໍໂທດກັບເລື່ອງທີ່ເກີດຂຶ້ນ ສຳລັບຄົນທີ່ມີຕຳແຫນ່ນຢ່າງຂ້ອຍແລ້ວ ນີ້ເປັນການກະທຳທີ່ບໍ່ສາມາດຍອມຮັບໄດ້ ມັນສວຍເກີນໄປແລ້ວ ຂ້ອຍເບິ່ງບໍ່ເຫັນທາງເລື່ອກອື່ນເລີຍນອກຈາກການສິ່ງທີ່ຕ້ອງບອກລາສະໂມສອນ ອາແຈັກ ’’.