ສ.ເກົາຫລີ ຂະຫຍາຍມາດຕະການຮັກສາໄລຍະຫ່າງຄຸມໂຄວິດ ເຄີຟິວຮ້ານອາຫານບໍ່ເກີນ 21:00 ໂມງ ຫລັງຜູ້ຕິດເຊື້ອເພີ່ມ 27.000 ຄົນໃນວັນດຽວ
ນາຍົກລັດຖະມົນຕີ ຄິມບູກຍອມ ຂອງ ສ.ເກົາຫລີ ເປີດເຜີຍວ່າ: ລັດຖະບານ ສ.ເກົາຫລີ ຕັດສິນໃຈຂະຫຍາຍໄລຍະເວລາບັງຄັບໃຊ້ມາດຕະການຮັກສາໄລຍະຫ່າງເພື່ອປ້ອງກັນການແພ່ລະບາດຂອງໂຄວິດ ເຊິ່ງລວມທັງມາດຕະການເຄີຟິວສະຖານະປະກອບທຸລະກິດ ແລະ ຮ້ານອາຫານ ປິດບໍ່ເກີນ 21:00 ໂມງ ແລະ ຫ້າມການລວມກຸ່ມຂອງປະຊາຊົນເກີນ 6 ຄົນຂຶ້ນໄປ ໂດຍມີຜົນຕໍ່ເນື່ອງໄປເຖິງວັນທີ 20 ກຸມພາ.
ການຂະຫຍາຍມາດຕະການຮັກສາໄລຍະຫ່າງດັ່ງກ່າວມີຂຶ້ນຫລັງສະຖານະການແພ່ລະບາດຂອງໂຄວິດໃນ ສ.ເກົາຫລີ ທະວີຄວາມຮຸນແຮງ ໂດຍສຳນັກງານຄວບຄຸມ ແລະ ປ້ອງກັນພະຍາດລະບາດຂອງ ສ.ເກົາຫລີ (KCDC) ລາຍງານໃນວັນທີ 4 ກຸມພາວ່າ: ພົບຜູ້ຕິດເຊື້ອໃໝ່ເພີ່ມຂຶ້ນ 27.443 ຄົນ ເຊິ່ງຖືເປັນຕົວເລກຜູ້ຕິດເຊື້ອແຕ່ລະວັນສູງທີ່ສຸດເທົ່າທີ່ມີການບັນທຶກມາ.
ນາຍົກລັດຖະມົນຕີ ສ.ເກົາຫລີ ຊີ້ວ່າ: ມາດຕະການດັ່ງກ່າວມີຄວາມຈຳເປັນ ເພື່ອຢຸດການແພ່ລະບາດຂອງໂຄວິດສາຍພັນໂອມິຄຣອນ ທ່າມກາງຄວາມກັງວົນວ່າ: ມື້ພັກຍາວ 5 ວັນໃນເທດສະການກຸດຈີນທີ່ສິ້ນສຸດໄປເມື່ອວັນທີ 2 ກຸມພາ ຈະສົ່ງຜົນໃຫ້ການແພ່ລະບາດຮຸນແຮງຍິ່ງຂຶ້ນ.
ການແພ່ລະບາດຂອງໂອມິຄຣອນສົ່ງຜົນໃຫ້ຈຳນວນຜູ້ຕິດເຊື້ອໂຄວິດໃນ ສ.ເກົາຫລີ ເພີ່ມຈາກໄລຍະ 2 ອາທິດກ່ອນໜ້າເຖິງ 3 ເທົ່າ, ແຕ່ຈຳນວນຜູ້ຕິດເຊື້ອາການໜັກ ແລະ ເສຍຊີວິດຍັງຂ້ອນຂ້າງໜ້ອຍ ໂດຍຫລ້າສຸດມີລາຍງານຜູ້ເສຍຊີວິດເພີ່ມຂຶ້ນ 24 ຄົນ ແລະ ມີອັດຕາເສຍຊີວິດປະມານ 0,73%.
ຂະນະທີ່ປະຊາຊົນ ສ.ເກົາຫລີ ໄດ້ຮັບການສັກວັກຊີນຄົບ 2 ໂດສແລ້ວເກືອບ 86% ຈາກຈຳນວນປະຊາກອນທັງໝົດປະມານ 52 ລ້ານຄົນ ແລະ ຫລາຍກວ່າ 53,8% ໄດ້ຮັບການສັກວັກຊີນເຂັມກະຕຸ້ນແລ້ວ.
ອ້າງອີງ:
