ປີ 2021 ແຂວງສາລະວັນ ມີນັກທຸລະກິດເຂົ້າມາລົງທຶນຈົດທະບຽນມີມູນຄ່າ 484 ຕື້ກວ່າກີບ
ແຫລ່ງຂ່າວ ແຂວງສາລະວັນ ລາຍງານໃຫ້ຮູ້ວ່າ: ທ່ານ ຄໍາຜ່ານ ສີລາວີ ຫົວໜ້າພະແນກ ອຸດສາຫະກໍາ ແລະ ການຄ້າແຂວງສາລະວັນ ລາຍງານໃນກອງປະຊຸມພົບປະນັກທຸລະກິດ ໃນຄັ້ງວັນທີ 3 ກຸມພາ 2022 ທີ່ສະໂມສອນຂອງແຂວງມີນັກທຸລະກິດເຂົ້າມາລົງທຶນຂອງເອກະຊົນພາຍໃນ ແລະ ຕ່າງປະເທດ ທີ່ນອນໃນກິດຈະກໍາທົ່ວໄປ) ປະຈໍາປີ 2021 ວ່າ: ມີນັກລົງທຶນທີ່ເຂົ້າມາລົງທຶນຢູ່ແຂວງສາລະວັນ ຕາມຫົວໜ່ວຍທຸລະກິດມາແຈ້ງຂຶ້ນ ແລະ ດັດແກ້ທະບຽນວິສາຫະກິດທັງໝົດ 126 ຫົວໜ່ວຍ, ມີທຶນຈົດທະບຽນມູນຄ່າ 484,18 ຕື້ກີບ. ໃນນັ້ນເອກະຊົນພາຍໃນ 106 ຫົວໜ່ວຍ, ທຶນຈົດທະບຽນ 211,46 ຕື້ກີບ, ຕ່າງປະເທດ 20 ຫົວໜ່ວຍ ທຶນຈົດທະບຽນ 272,72 ຕື້ກີບ, ທຽບໃສ່ປີຜ່ານມາຫຼຸດລົງ 10 ຫົວໜ່ວຍ ສໍາລັບການລົງທຶນຂອງພາກເອກະຊົນໃນສ່ວນຫຼວງຫຼາຍແມ່ນຂະແໜງການຄ້າຂາຍຍົກ, ຂາຍຍ່ອຍ, ສໍາລັບການລົງທຶນຂອງຕ່າງປະເທດສ່ວນໃຫຍ່ແມ່ນ ນັກລົງທຶນ ສປ ຈີນ ຈໍານວນ 15 ຫົວໜ່ວຍ ທຶນຈົດທະບຽນ 141,72 ຕື້ກີບ, ກວມ 75% ຂອງການລົງທຶນຕ່າງປະເທດທັງໝົດ, ໂດຍແມ່ນຂະແໜງກະສິກໍາກວມ 46,66%, ຮອງລົງມາແມ່ນຂະແໜງອຸດສາຫະກໍາປຸງແຕ່ງ, ການກໍ່ສ້າງ ແລະ ຂະແໜງການຄ້າກວມຂະແໜງລະ 13,33% ນອກນັ້ນແມ່ນຂະແໜງຂຸດຄົ້ນບໍລິການອື່ນໆ. ກອງປະຊຸມຍັງໄດ້ຮັບຟັງການຜ່ານບົດສະຫຼຸບການລົງທຶນເອກະຊົນທັງພາຍໃນ ແລະ ຕ່າງປະເທດປະຈໍາປີ2021.
ພ້ອມນີ້ກໍໄດ້ປຶກສາ-ຫາລື ແລກປ່ຽນຄໍາຄິດ, ຄໍາເຫັນ ແລະ ສ້າງຄວາມເປັນເອກະພາບກັນລະຫວ່າງນັກທຸລະກິດຜູ້ປະກອບການ ກັບພາກລັດ ໃນແຜນປະຕິບັດຕົວຈິງ ເພື່ອສືບຕໍ່ແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ບັນຫາຄົງຄ້າງຕ່າງໆທີ່ເປັນອຸປະສັກໃນການກົດໜ່ວງທ່ວງດຶງການພັດທະນາເສດຖະກິດ-ສັງຄົມ, ການດໍາເນີນທຸລະກິດ, ຂອງບັນດາຜູ້ປະກອບການພາຍໃນ ແລະຕ່າງປະເທດ ແນໃສ່ເຮັດໃຫ້ແຜນພັດທະນາເສດຖະກິດ-ສັງຄົມແຫ່ງຊາດ ແລະ ແຜນການຈັດຕັ້ງ 2 ວາລະແຫ່ງຊາດໄດ້ຈັດຕັ້ງປະຕິບັດໃຫ້ປະສົບຜົນສໍາເລັດ.
ກອງປະຊຸມດັ່ງກ່າວໄດ້ຈັດຂຶ້ນ ໂດຍການເຂົ້າຮ່ວມເປັນປະທານໂດຍ ທ່ານ ໂພໄຊ ໄຊຍະສອນ ເລຂາພັກແຂວງ-ເຈົ້າແຂວງສາລະວັນ, ທ່ານ ພູທົງ ຄໍາມະນີວົງ ຮອງເຈົ້າແຂວງ ຜູ້ຊີ້ນໍາວຽກງານເສດຖະກິດ, ມີບັນດາທ່ານຫົວໜ້າ-ຮອງພະແນກ, ຕາງໜ້າຈາກພາກທຸລະກິດ ແລະ ຜູ້ປະກອບການແຂວງສາລະວັນເຂົ້າຮ່ວມ.
