ມູນນິທິອະນຸລັກສັດປ່າ ອອກມາຊີ້ແຈງປະເດັນຕ່າງໆກ່ຽວກັບ ນ້ອງໃບບຸນ ໃບບົວ (ລີງ ແລະ ຄ່າງນ້ອຍ)
ວັນທີ 31 ມັງກອນ 2022 ນີ້ ມູນນິທິອະນຸລັກສັດປ່າ Lao Conservation Trust for Wildlife ອອກມາອັບເດດ ແລະ ຊີ້ແຈງ ປະເດັນຕ່າງໆກ່ຽວກັບ ນ້ອງໃບບຸນ ໃບບົວ (ລີງ ແລະ ຄ່າງນ້ອຍ) ວ່າດັ່ງນີ້:
ກ່ອນອື່ນ, ພວກເຮົາຕ້ອງຂໍສະແດງຄວາມຂອບໃຈມາຍັງທຸກທ່ານສຳລັບຄວາມອົດທົນຕະຫລອດ 72 ຊົ່ວໂມງທີ່ຜ່ານມາເພື່ອລໍຖ້າການອັບເດດກ່ຽວກັບລີງນ້ອຍ ແລະ ຄ່າງນ້ອຍສອງໂຕທີ່ທາງທີມງານຂອງພວກເຮົາໄດ້ກູ້ໄພມາໃໝ່. ພວກເຮົາຕ້ອງຂໍອະໄພໃນການອັບເດດຊັກຊ້າ ອັນເນື່ອງຈາກການກູ້ໄພສັດປ່າແຕ່ລະຄັ້ງແມ່ນພວກເຮົາໄດ້ເນັ້ນໃສ່ສະຫວັດດີການສັດປ່າ ດັ່ງນັ້ນ, ຈຶ່ງເຮັດໃຫ້ພວກເຮົາບໍ່ມີເວລາມາຕອບຂໍ້ຄວາມຈຳນວນຫລວງຫລາຍທີ່ໄດ້ຖາມເຂົ້າມາໃນໂຊຊຽວມີເດຍຂອງພວກເຮົາ. ແຕ່ຢ່າງໃດກໍຕາມ, ພວກເຮົາຂໍໃຫ້ທ່ານກະລຸນາອ່ານໂພສຂ້າງລຸ່ມນີ້ທັງໝົດກ່ອນ ເພື່ອທ່ານຈະໄດ້ເຂົ້າໃຈເຖິງສະຖານະການຢ່າງເຕັມສ່ວນ.
ອັນທີສອງ, ພວກເຮົາຂໍແຈ້ງໃຫ້ທຸກຄົນຊາບວ່າລີງ ກັບ ຄ່າງນ້ອຍສອງໂຕນີ້ມີສຸຂະພາບແຂງແຮງດີ. ພວກມັນທັງສອງປັບຕົວເຂົ້າກັບສະພາບແວດລ້ອມໃໝ່ໄດ້ຢ່າງໄວວາ, ກິນອາຫານດີ ແລະ ມີຄວາມສຸກກັບການຢອກເຢີ້ຍ.
ສຸດທ້າຍນີ້, ພວກເຮົາຂໍຕອບຂໍ້ກັງວົນໃຈຂອງທຸກຄົນທີ່ໄດ້ຂຽນຢູ່ໃນຂໍ້ຄວາມ ຫຼື ຄອມເມັ້ນດັ່ງນີ້:
ພວກເຮົາເຂົ້າໃຈດີວ່າຜູ້ດູແລສັດທັງສອງໂຕນີ້ມັກຮັກພວກມັນຫຼາຍຕະຫລອດຈົນເຖິງ FC ຫຼາຍທ່ານທີ່ຕິດຕາມພວກມັນໃນໂຊຊຽວມີເດຍ. ການເຮັດໃຫ້ຄົນມີຄວາມໂສກເສົ້າບໍ່ແມ່ນພາລະກິດຂອງພວກເຮົາ ແຕ່ພວກເຮົາກໍ່ເຊື່ອໝັ້ນວ່າສັດປ່າຄວນໄດ້ຮັບຄວາມເປັນອິດສະຫລະໃນການດຳລົງຊີວິດຢູ່ໃນສະພາບການທີ່ພວກມັນສາມາດປະພຶດຕົນໄດ້ຢ່າງເປັນທຳມະຊາດທີ່ສຸດ. ໃນກໍລະນີຂອງສັດສອງໂຕນີ້, ພວກມັນຢູ່ໃນສະພາບແວດລ້ອມທີ່ຂ້ອນຂ້າງເປັນທຳມະຊາດ ແລະ ຢູ່ຮ່ວມກັບສະມາຊິກໃນສາຍພັນດຽວກັນ.
ພວກເຮົາຮູ້ວ່າພວກທ່ານຫຼາຍຄົນເຊື່ອວ່າພວກເຮົາຈະປ່ອຍສັດສອງໂຕນີ້ກັບຄືນສູ່ປ່າ ໂດຍບໍ່ກັງວົນເຖິງຊີວິດຄວາມເປັນຢູ່ຂອງພວກມັນ. ພວກເຮົາຕ້ອງການໃຫ້ມີຄວາມຊັດເຈນວ່າສັດປ່າທຸກໂຕທີ່ເຂົ້າມາໃນລາຍການຂອງພວກເຮົາຕ້ອງເປັນໄປຕາມເງື່ອນໄຂທີ່ກຳນົດໄວ້ກ່ອນ ພວກເຮົາຈຶ່ງສາມາດຮັບປະກັນໄດ້ວ່າພວກມັນມີຊີວິດຢູ່ລອດໃນທຳມະຊາດ. ປັດຈຸບັນນີ້ພວກເຮົາມີສັດສາຍພັນດຽວກັນກັບສັດສອງໂຕນີ້ຢູ່ໃນສູນ ເຊິ່ງພວກມັນບໍ່ໄດ້ເປັນໄປຕາມເງື່ອໄຂທີ່ກຳນົດໄວ້ໃນການປ່ອຍຄືນສູ່ປ່າ ສະນັ້ນ, ພວກມັນຈຶ່ງໄດ້ຢູ່ໃນສູນມູນນິທິ ອະນຸລັກ ສັດປ່າ ລາວ ນີ້ຕະຫລອດຊີວິດ ແລະ ກໍ່ຈະໄດ້ກາຍເປັນຄອບຄົວດຽວກັນກັບລີງ ກັບ ຄ່າງນ້ອຍສອງໂຕນີ້.
ສັດທຸກໂຕຂອງພວກເຮົາ ລວມທັງລີງ ກັບ ຄ່າງນ້ອຍສອງໂຕນີ້ ໄດ້ຮັບການດູແລຈາກສັດຕະວະແພດລະດັບໂລກ, ສັດທຸກໂຕມີຊີວິດທີ່ດີຢູ່ຮ່ວມກັບສາຍພັນສັດດຽວກັນ ແລະ ພ້ອມທັງໄດ້ກິນອາຫານພິເສດອີກດ້ວຍ.
ພວກເຮົາຢາກໃຫ້ທຸກຄົນເຂົ້າໃຈວ່າເຖິງແມ່ນວ່າລີງ ກັບ ຄ່າງນ້ອຍສອງໂຕນີ້ຈະເປັນຕາໜ້າຮັກຫຼາຍກໍ່ຕາມ ແຕ່ເມື່ອເວລາພວກມັນເຕີບໂຕໃຫຍ່ ພວກມັນອາດເປັນອັນຕະລາຍແກ່ທ່ານໄດ້. ເຖິງແມ່ນວ່າຈະລ້ຽງມາກັບມື ສັດປ່າກໍ່ອາດທຳຮ້າຍ ຫຼື ກັດເຈົ້າຂອງໆຕົນເອງ ຫລື ຄົນພາຍໃນຄອບຄົວ ເພາະພວກມັນແມ່ນສັດປ່າ. ເມື່ອມີບັນຫາແບບນີ້ເກີດຂຶ້ນ, ປົກກະຕິສັດຈະຖືກກັກໄວ້ໃນກົງ ຫຼື ຄອກທີ່ບໍ່ມີຄວາມເປັນອິດສະຫຼະໃນການແລ່ນຫລິ້ນຢູ່ອ້ອມເຮືອນອີກຕໍ່ໄປ ແລະ ຈະບໍ່ໄດ້ຮັບການເບິ່ງແຍງ ຫລື ສຳຜັດກັບຄົນຄືແບບເກົ່າ ເຊິ່ງໝາຍຄວາມວ່າຄຸນນະພາບຊີວິດຂອງພວກມັນຈະຫລຸດລົງຢ່າງຫລວງຫລາຍ.
ພວກເຮົາຫວັງວ່າທ່ານຈະເຂົ້າໃຈເຖິງສະພາບການ ແລະ ເຖິງແມ່ນວ່າມັນຈະເປັນເລື່ອງເສົ້າສຳລັບຄົນ ແຕ່ມັນກໍ່ເປັນສິ່ງທີ່ດີທີ່ສຸດສຳລັບສັດ ເພື່ອໃຫ້ສັດພວກມັນມີຊີວິດທີ່ມີສຸຂະພາບດີຢ່າງຍາວນານໄປພ້ອມໆກັບສາຍພັນສັດດຽວກັນໃນທຳມະຊາດ.
ພວກເຮົາຍິນດີຈະຕອບທຸກຄຳຖາມທີ່ກ່ຽວຂ້ອງທີ່ທ່ານມີ ແຕ່ກະລຸນາຢ່າສົ່ງຂໍ້ຄວາມ ຫຼື ຄອມເມັ້ນທີ່ບໍ່ຈຳເປັນເຂົ້າມາຕື່ມໃນອິນບັອກຂອງພວກເຮົາ ເພາະມັນອາດເຮັດໃຫ້ພວກເຮົາເບິ່ງບໍ່ເຫັນຂໍ້ຄວາມສຳຄັນຈາກປະຊາຊົນຜູ້ທີ່ແຈ້ງລາຍງານຫາພວກເຮົາກ່ຽວກັບສັດປ່າທີ່ຕ້ອງການຄວາມຊ່ວຍເຫລືອ.
ພວກເຮົາຈະສືບຕໍ່ໂພສ໌ອັບເດດໃໝ່ໃນສອງສາມອາທິດຕໍ່ໜ້ານີ້ ດັ່ງນັ້ນ, ຢ່າລືມຕິດຕາມເພຈຂອງພວກເຮົາ ເພື່ອຈະໄດ້ເບິ່ງວຽກທີ່ພວກເຮົາເຮັດ ແລະ ອັບເດດກ່ຽວກັບລີງ ກັບ ຄ່າງນ້ອຍສອງໂຕນີ້.
