ລົມກັນແລ້ວຖືກໃຈ ! ປັອກບາ ພ້ອມທີ່ຈະຕໍ່ສັນຍາຖ້າ ຣັງນິກ ໄດ້ຄຸມແມນຢູຕໍ່

ປອລ ປັອກບາ ພ້ອມທີ່ຈະຢູ່ຊ່ວຍ ແມນເຊສເຕີ ຢູໄນເຕັດ ຖ້າໃນອະນາຄົດ ຣາຟ ຣັງນິກ ຈະຍັງຄົງເປັນຜູ້ຈັດການທີມຂອງສະໂມສອນ. ຫຼັງຈາກທີ່ທັງຄູ່ໄດ້ສົນທະນາຫາລືກັນໃນຫລາຍເລື່ອງ ແລະ ປັອກບາ ກໍມີຄວາມປະທັບໃຈຢ່າງເລິກເຊິ່ງຕໍ່ຄວາມຄິດຂອງ ຣາຟ ຣັງນິກ, ອີງຕາມການລາຍງານຂອງຫນັງສືພິມອັງກິດ ເດິ ຊັນ.

ພອລ ປັອກບາ ກອງກາງຄົນດັງຂອງ ແມນເຊສເຕີ ຢູໄນເຕັດ ສະໂມສອນໃຫຍ່ແຫ່ງວົງການພຣີເມຍລີກ ອັງກິດ ທີ່ຈະຕໍ່ສັນຍາອອກໄປອີກ ຖ້າຫາກ ຣາຟ ຣັງນິກ ຍັງໄດ້ເປັນຜູ້ຈັດການທີມຕໍ່ຈົນລະດູການນີ້ ຕາມການລາຍງານຂອງ ເດລີ ເມລ ສື່ດັງຂອງອັງກິດ.

ດາວເຕະຊາວຝຣັ່ງຈະຫມົດສັນຍາກັບ ແມນເຊສເຕີ ຢູໄນເຕັດ ຫລັງຈົບລະດູການ 2021-22 ເຊິ່ງທີ່ຈິງແລ້ວຕອນນີ້ລາວສາມາດເຈລະຈາເລື່ອງການຍ້າຍທີມແບບບໍ່ມີຄ່າໂຕລ່ວງຫນ້າກັບທີມໃນຕ່າງແດນໄດ້ແລ້ວ. ໂດຍວ່າກັນວ່າມີທັງ ເຣອັນ ມາດຣິດ, ບາເຊໂລນາ, ຢູເວນຕູສ ແລະ ປາຣີສ ແຊັງແຊັກແມັງ ທີ່ໃຫ້ຄວາມສົນໃຈໃນຕົວລາວ, ແຕ່ ປັອກບາ ຍັງບໍ່ຄິດທີ່ຈະຟ້າວຕັດສິນໃຈອະນາຄົດຂອງຕົນເອງ.

ຈົນຫລ້າສຸດ ເດິ ຊັນ ໄດ້ລາຍງານຂ່າວວ່າຜ່ານມາ ປັອກບາ ແລະ ຣັງ ຣັງນິກ  ໄດ້ປຶກສາຫາລືກ່ຽວກັບເລື່ອງຕ່າງໆໃນລະດັບຫນຶ່ງ ເຊັ່ນ: ວິໄສທັດໃນການເຮັດທີມ, ການທີ່ ຣັງນິກ ຕັ້ງໃຈຈະໃຫ້ ປັອກບາ ເປັນສູນກາງໃນການຫຼິ້ນຂອງທີມ. ລວມທັງບັນຫາທີ່ຄູຝຶກຊາວເຢຍລະມັນເຊື່ອວ່າ ປັອກບາ ຈະເປັນຄົນຜູ້ທີ່ສາມາດເຊື່ອມຕໍ່ຄວາມສໍາພັນພາຍໃນທີມໄດ້. ຈາກການທີ່ລາວເປັນທີ່ນິຍົມຂອງເພື່ອນຮ່ວມທີມຫຼາຍຄົນ.

ທັງນີ້ ການເຈລະຈາກ່ຽວກັບບັນຫາເຫຼົ່ານັ້ນເຮັດໃຫ້ ປັອກບາ ພໍໃຈກັບເຂົາຫຼາຍ ແລະ ພ້ອມທີ່ຈະເຊັນສັນຍາສະບັບໃຫມ່ຖ້າຫາກວ່າ ຣັງນິກ ຍັງຈະສືບຕໍ່ຄຸມທີມຕໍ່ ໂດຍຕາມເດີມແມ່ນ ຣັງນິກ ມີສັນຍາໃນຖານະຜູ້ຈັດການທີມພຽງຫມົດລະດູການນີ້ ແລະ ​ຫຼັງ​ຈາກ​ນັ້ນລາວຈະ​ຂຶ້ນ​ເປັນ​ທີ່​ປຶກສາ​ທີ່ຊ່ວຍກຳນົດນະໂຍບາຍໃນດ້ານຕ່າງໆຕໍ່ໄປ.