ແນວລາວສ້າງຊາດແຂວງບໍ່ແກ້ວ ແລະ ເມືອງເມິງ ລົງມອບເຄື່ອງນຸ່ງຫົ່ມ ໃຫ້ແກ່ຄອບຄົວຜູ້ທຸກຍາກ ຢູ່ກຸ່ມບ້ານຫົວນໍ້າຄາ

ການລົງມອບເຄື່ອງໃນຄັ້ງນີ້ ດ້ວຍຄວາມເປັນຫ່ວງເປັນໄຍຈາກການຈັດຕັ້ງພັກ – ລັດຂັ້ນເທິງ ທີ່ມີຕໍ່ປະຊາ ຊົນລາວບັນດາເຜົ່າ ທີ່ຢູ່ເຂດຫ່າງໄກສອກຫລີກ ທຸລະກັນດານ; ທັງເປັນການແບ່ງເບົາພາລະການໃຊ້ຈ່າຍຢູ່ພາຍໃນຄອບຄົວ ໃຫ້ມີເຄື່ອງນຸ່ງຫົ່ມໄວ້ປ້ອງກັນໄພໜາວ ເຮັດໃຫ້ຮ່າງກາຍມີຄວາມອົບອຸ່ນ ແລະ ມີສຸຂະພາບແຂງແຮງ; ດັ່ງນັ້ນ; ອົງການແນວລາວສ້າງຊາດແຂວງ ແລະແນວລາວສ້າງຊາດເມືອງ ຈິ່ງໄດ້ປຸກລະດົມນໍາທຸກພາກສ່ວນໃນສັງຄົມ ເພື່ອນໍາເອົາເຄື່ອງນຸ່ງຫົ່ມຈໍານວນໜຶ່ງ ມາມອບໃຫ້ປະຊາຊົນບັນດາເຜົ່າຢູ່ກຸ່ມບ້ານຫົວນໍ້າຄາ 3 ບ້ານຄື: ບ້ານຫົວນໍ້າຄາ, ບ້ານປຸ່ງຜາ, ບ້ານປຸ່ງຫີນ ແລະ ບ້ານໂພນຈະເລີນ ກຸ່ມບ້ານນໍ້າເມິງ.

ເຄື່ອງທີ່ນໍາມາມອບໃນຄັ້ງນີ້ປະກອບມີ ເສື້ອກັນໜາວຈໍານວນ 176 ຜືນ, ຜ້າຫົ່ມໂຕໆຈໍານວນ 96 ຜືນ, ຖົງ ແລະ ໝວກຊາວໜຸ່ມ ຢ່າງລະ 150 ອັນ ແລະ ໃນພິທີທາງທີມງານແພດໝໍ ຍັງໄດ້ມີການບໍລິການສັກຍາວັກຊີນປ້ອງກັນພະຍາດໂຄວິດ 19 ໃຫ້ແກ່ປະຊາຊົນບັນດາເຜົ່າ ໃນກຸ່ມເປົ້າໝາຍຕື່ມອີກ.

ພິທີ ທ່ານ ດາລີວັນ ພູສະຫວັນ, ປະທານແນວລາວສ້າງຊາດແຂວງ, ຜູ້ຊີ້ນໍາອົງການຈັດຕັ້ງມະຫາຊົນແຂວງບໍ່ແກ້ວ ຍັງໃຫ້ຮູ້ອີ່ກຕື່ມວ່າ ເຄື່ອງທີ່ນໍາມາມອບເຄື່ອງໃນຄັ້ງນີ້ ແມ່ນໄດ້ມາຈາກການລະດົມນໍາພາກສ່ວນຕ່າງໆໃນສັງຄົມ ໂດຍສະເພາະ ແມ່ນຈາກອົງການໃຈບຸນ ທີ່ໄດ້ໃຫ້ການສະໜັບສະໜູນ ເຊິ່ງມີມູນຄ່າທັງໝົດ 21 ລ້ານກວ່າກີບ; ທັງໝົດນີ້ ແມ່ນສະແດງເຖິງຄວາມເປັນຫ່ວງເປັນໄຍ, ຄວາມມີນໍ້າຈິດນໍ້າໃຈ ຊ່ວຍເຫລືອເຊິ່ງກັນ ແລະກັນ ຈາກອົງການໃຈບຸນ ກໍ່ຄືຄະນະພັກຂັ້ນເທິງ ທີ່ມີຕໍ່ປະຊາຊົນລາວບັນດາເຜົ່າ ທີ່ຢູ່ເຂດຫ່າງໄກສອກຫລີກ, ທຸລະກັນດານ ໃຫ້ມີເຄື່ອງນຸ່ງຫົ່ມໄວ້ປ້ອງກັນໄພໜາວ ແລະ ທັງເປັນການແບ່ງເບົາພາລະການໃຊ້ຈ່າຍ ຢູ່ພາຍໃນຄອບຄົວຕື່ມອີກ.