ລາວ ຄືບໜ້າການແກ້ໄຂຢາເສບຕິດ ຂະນະທີ່ແຕ່ນີ້ຫາເດືອນສິງຫາປີໜ້າ ສືບຕໍ່ເຮັດ 6 ຈຸດສຸມ

3 ໄລຍະ ທີ່ອະນຸກໍາມະການ ກອງເລຂາວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ໄດ້ສ້າງແຜນເຄື່ອນໄຫວລະອຽດເປັນຕົ້ນໄລຍະທີ 1 ແມ່ນໄລຍະກະກຽມຄວາມພ້ອມ ແລະ ເຊື່ອມຊຶມເອກະສານທີ່ກ່ຽວຂ້ອງກັບວາລະແຫ່ງຊາດ, ໄລຍະທີ 2 ແມ່ນໄລຍະຈັດຕັ້ງປະຕິບັດແຜນການ ແລະ ແກ້ໄຂບັນຫາຢາເສບຕິດຕາມແຜນວຽກຈຸດສຸມທີ່ກໍານົດໄວ້ ແລະ ໄລຍະ 3 ແມ່ນໄລຍະສະຫລຸບຕີລາຄາການຈັດຕັ້ງປະ ຕິບັດ ໂດຍໃນໄລຍະທີ 1 ໄດ້ສໍາເລັດການລົງເຜີຍແຜ່ບັນດາເອກະສານທີ່ກ່ຽວຂ້ອງໃຫ້ພາກສ່ວນຕ່າງໆຢູ່ 17 ແຂວງ ແລະ ນະຄອນຫລວງ. ຂະນະທີ່ບັນດາການນໍາກະຊວງ ປກສ ໄດ້ເຄື່ອນໄຫວເຜີຍແຜ່ຢູ່ 7ກະ ຊວງ ແລະ ອົງການກ່ຽວຂ້ອງ.

ສຳລັບໄລຍະທີ 2 ຈາກການເພີ່ມທະວີຍົກລະດັບການນໍາພາ-ຊີ້ນໍາການປະຕິບັດພາລະບົດບາດເປັນໃຈກາງປະສານສົມທົບກັບບັນດາກະຊວງ, ອົງການ ແລະ ທ້ອງຖິ່ນເພື່ອສະກັດກັ້ນ ແລະ ແກ້ໄຂບັນຫາຢາເສບຕິດຕາມຂອບເຂດຄວາມຮັບຜິດຊອບຢ່າງມີຈຸດສຸມ ແລະ ກໍເປັນໄລຍະຂຸ້ນຂ້ຽວຈັດຕັ້ງປະຕິບັດ ໂດຍຜ່ານມາໄດ້ຫັນເອົາກໍາລັງຈາກສູນກາງລົງໄປປະຈໍາຈຸດກວດກາ 4 ຈຸດຄື ຢູ່ແຂວງອຸດົມໄຊ 1 ຈຸດ, ແຂວງ ຫລວງນໍ້າທາ 1 ຈຸດ ແລະ ແຂວງບໍ່ແກ້ວ 2 ຈຸດ. ພ້ອມນັ້ນກໍໄດ້ຊຸກຍູ້ປຸກລະດົມປະຊາຊົນບັນດາເຜົ່າສະໜັບສະໜູນຊ່ວຍເຫລືອ ໂດຍການເປັນຫູ-ເປັນຕາ, ແຈ້ງ-ລາຍງານສະພາບທີ່ກ່ຽວຂ້ອງກັບບັນຫາຢາເສບຕິດ ຕໍ່ເຈົ້າໜ້າທີ່ ເຮັດໃຫ້ສາມາດສະກັດກັ້ນ ແລະ ຈັບກຸ່ມຄ້າຂາຍຢາເສບຕິດມາດໍາເນີນຄະດີໄດ້ເປັນຈໍາ ນວນຫລາຍ ສະແດງອອກຄືສາມາດແກ້ໄຂຄະດີຢາເສບຕິດໄດ້ 2.884 ເລື່ອງ, ຈັບຜູ້ຖືກຫາໄດ້ 3.989 ຄົນ, ຢຶດຂອງກາງຢາບ້າໄດ້ 125 ລ້ານເມັດ, ຢາໄອ 2.521 ກິໂລກຣາມ; ລົດໃຫຍ່, ລົດຈັກ, ເຮືອແລະ ອາວຸດປືນ ພ້ອມລູກປືນຈໍານວນໜຶ່ງ. ນອກນີ້ຍັງສາມາດຂຶ້ນບັນຊີເປົ້າໝາຍຂົນສົ່ງ-ຄ້າຂາຍຢາເສບຕິດທົ່ວປະເທດໄດ້ 1.969 ຄົນ, ຍິງ 176 ຄົນ, ເປົ້າໝາຍຢາເສບຕິດທີ່ໂຕນໜີຈາກຄ້າຍຄຸມຂັງ 7 ຄົນ, ເປົ້າໝາຍທີ່ພົ້ນໂທດອອກໄປແລ້ວ ຍັງເຄື່ອນໄຫວ 196 ຄົນ, ເປົ້າໝາຍທີ່ມີຄໍາສັ່ງຈັບ 100 ຄົນ. ສໍາລັບເປົ້າໝາຍເຂດຫລໍ່ແຫລມນໍາເຂົ້າ-ສົ່ງອອກຢາເສບຕິດມີ 9 ຈຸດ ແລະ ເຂດຫລໍ່ແຫລມນໍາເຂົ້າ-ສົ່ງອອກສານເຄມີຕົ້ນ 4 ຈຸດ.

ພົນຕີ ຄໍາກິ່ງ ຜຸຍຫລ້າມະນີວົງ ຫົວໜ້າກົມໃຫຍ່ຕໍາຫລວດກະຊວງປ້ອງກັນຄວາມສະຫງົບ ກ່າວວ່າ: ແຕ່ນີ້ຮອດເດືອນສິງຫາ ປີ 2023 ຈະພ້ອມກັນສືບຕໍ່ຈັດຕັ້ງປະຕິບັດ 6 ວຽກງານຈຸດສຸມທີ່ກຳນົດໄວ້ໃນວາລະແຫ່ງຊາດ ເປັນຕົ້ນ ການສ້າງຄວາມຮັບຮູ້ໃນທົ່ວສັງຄົມໂດຍການສຶກສາອົບຮົມ, ໂຄສະນາເຜີຍແຜ່ລະບຽບກົດໝາຍ ແລະ ຜົນຮ້າຍຂອງຢາເສບຕິດ; ການສ້າງ, ປັບປຸງກົດໝາຍ ແລະ ນິຕິກຳໃຕ້ກົດໝາຍທີ່ກ່ຽວ ຂ້ອງກັບບັນຫາຢາເສບຕິດ; ການປັບປຸງກົງຈັກການຈັດຕັ້ງ ແລະ ຍົກລະດັບຄວາມສາມາດການເຮັດໜ້າທີ່ການເມືອງຂອງອົງການສືບສວນ-ສອບສວນ, ອົງການໄອຍະການປະຊາຊົນ, ອົງການສານປະຊາຊົນ, ອົງການປະຕິບັດຄຳຕັດສິນຂອງສານ ແລະ ພາກສ່ວນກ່ຽວຂ້ອງຕໍ່ການແກ້ໄຂບັນຫາຢາເສບຕິດ; ການຍົກສູງປະສິດທິພາບການຄຸ້ມຄອງ, ຊີ້ນຳການຈັດຕັ້ງປະຕິບັດຮອບດ້ານການແກ້ໄຂບັນຫາຢາເສບຕິດ; ການປັບປຸງຄວາມສາມາດການເຄື່ອນໄຫວເຮັດໜ້າທີ່ຂອງລະບົບການເມືອງແຕ່ລະຂັ້ນເພື່ອຊີ້ນຳ-ນຳພາການແກ້ໄຂບັນຫາຢາເສບຕິດທີ່ເກີດຂຶ້ ຢູ່ໃນຂອບເຂດຄວາມຮັບຜິດຊອບຂອງຕົນ ແລະ ການເພີ່ມທະວີການຮ່ວມມືສາກົນ.