ຈັບໄດ້ແລ້ວ ! ຜູ້ກໍ່ເຫດຕຳແລ້ວໜີ

ວັນທີ 27 ມັງກອນ 2022 ນີ້ ເຈົ້າໜ້າທີ່ຕຳຫຼວດຈະລາຈອນ ນວ ໃຫ້ຮູ້ວ່າ:

ວັນທີ 24​ ມັງກອນ 2022 ຜ່ານມາ ມີອຸບັດຕິເຫດລົດຕຳກັນເສຍຊີວິດ ແລ້ວເອົາຕົວລົບໜີ ຈຶ່ງໄດ້ລົງກວດກາຊັນນະສູດວັດແທກເກັບກຳຂໍ້ມູນຫຼັກຖານ.

ຮອດວັນທີ 25 ມັງກອນ 2022 ເວລາ 5:00ໂມງ ຈຶ່ງສາມາດກັກຜູ້ເອົາຕວົລົບໜີ ພ້ອມພາຫະນະໄດ້ຢູ່ເຮືອນຜູ້ກ່ຽວບ້ານ ໜອງພະຍາ ເມືອງໄຊທານີ ນວ ຊາບຊື່ ທ້າວ ວຽງສະຫວັນ ອາຍຸ 31ປີ ອາຊີບກຳມະກອນ.

ຈາກນັ້ນຈຶ່ງໄດ້ນຳຕົວຂື້ນມາ ສອບສວນ, ພາຍຫຼັງສອບສວນຖ້າຜູ້ກ່ຽວຫາກເປັນຜູ້ລະເມິດກົດລະບຽບຈະລາຈອນເຊີ່ງຕາມປະມວນກົດໝາຍອາຍາ ມາດຕາ 145 ການລະເມີດກົດຈະລາຈອນທີ່ພາໃຫ້ເກີດອຸບັດຕິເຫດ: ວັກ 3 ລະບຸວ່າ ໃນກໍລະນີທີ່ການກະທຳຜິດ ຫາກພາໃຫ້ມີຄົນເສຍຊີວິດ ຈະຖືກລົງໂທດຕັດອິດສະລະພາບ ແຕ່ສອງປີ ຫາ ຫ້າປີ ແລະ ຈະຖືກປັບໃໝ່ ແຕ່ 5.000.000 ກີບ ຫາ 20.000.000 ກີບ, ແຕ່ຫາກຜູ້ກະທຳຜິດຫາກເອົາຕົວລົບໜີກໍຈະມີໂທດໜັກເພີ່ມຂື້ນຕື່ມອີກຕາມ ມາດຕາ 146 ການຫຼົບໜີຈາກອຸບັດຕິເຫດ: ເຊີ່ງໄດ້ລະບຸໄວ້ວ່າ ບຸກຄົນໃດຫາກໄດ້ເຮັດໃຫ້ອຸບັດຕິເຫດເກີດຂຶ້ນ ຫຼື ມີສ່ວນພົວພັນໂດຍກົງກັບອຸບບັດຕິເຫດແລ້ວຫຼົບໜີ ຈະຖືກລົງໂທດຕັດອິດສະລະພາບ ແຕ່ ໜຶ່ງປີ ຫາ ສາມປີ ແລະ ຈະຖືກປັບໃໝ່ ແຕ່ 3.000.000 ກີບ10.000.000 ແລະ ຍັງມີຄວາມຮັບຜິດຊອບທາງແພ່ງຕໍ່ຜົນເສຍຫາຍທີ່ເກີດຂື້ນ, ປັດຈຸບັນຄະດີດັ່ງກ່າວເຈົ້າໜ້າທີກຳລັງເລັ່ງສອບສວນເພື່ອສະຫຼຸບສຳນວນຄະດີສົ່ງໄອຍາການສັ່ງຟ້ອງສານຕັດສິນຕາມລະບຽບກົດໝາຍ.

ກອງບັນຊາການ ປກສ ນວ ຂໍສະແດງຄວາມເສຍໃຈມາຍັງຄອບຄົວຜູ້ເສຍຊີວິດ ແລະ ຮຽກຮ້ອງມາຍັງຜູ້ໃຊ້ລົດໃຊ້ຖະຫນົນເອົາໃຈໃສ່ປະຕິບັດກົດລະບຽບຈະລາຈອນຢ່າງເຂັ້ມງວດ ເພື່ອຫລີກລ່ຽງການເກີດອຸບັດຕິເຫດ, ຖ້າຫາກອຸບັດຕິເຫດເກີດແລ້ວຕ້ອງມີມະນຸດສະທຳກ້າຮັບຜິດຊອບຕໍ່ການກະທຳຂອງຕົນເອງທີ່ກໍ່ຂຶ້ນ.