ຂໍ້ຫ້າມຂອງຜູ້ໂດຍສານ ທີ່ຈະໃຊ້ບໍລິການລົດໄຟ ລາວ-ຈີນ

ກົມຕຳຫລວດລົດໄຟ ກະຊວງປ້ອງກັນຄວາມສະຫງົບ ແຈ້ງການເຖິງຜູ້ໂດຍສານທຸກຄົນຊາບ ກ່ຽວກັບຂໍ້ຫ້າມຂອງຜູ້ໂດຍສານ ທີ່ຈະໃຊ້ບໍລິການລົດໄຟ ລາວ-ຈີນ ທີ່ຈະເດີນທາງຈາກສະຖານີລົດໄຟນະຄອນຫລວງວຽງຈັນ ໄປຫາສະຖານີຕ່າງແຂວງ ແລະ ສະຖານີຕ່າງແຂວງ ທີ່ຈະເດີນທາງເຂົ້າມາສະຖານີ ນະຄອນຫລວງວຽງຈັນ. ສຳລັບບັນດາຂໍ້ຫ້າມທີ່ຜູ້ໂດຍສານທຸກຄົນ ທີ່ໃຊ້ບໍລິການລົດໄຟ ໃຫ້ພ້ອມກັນປະຕິບັດຢ່າງເຂັ້ມງວດດັ່ງນີ້:

1) ຫ້າມຜູ້ໂດຍສານນຳອາວຸດເສິກ, ລູກປືນທຸກຊະນິດນຳເຂົ້າສະຖານີ, ຂະບວນລົດໄຟ ເຊັ່ນ: ປືນສັ້ນ, ປືນຍາວ, ປືນກິລາ ແລະ ປືນດັດແປງອື່ນໆ ຫ້າມນຳເຂົ້າສະຖານີ ແລະ ນຳຂຶ້ນລົດໄຟ ຢ່າງເດັດຂາດ (ຍົກເວັ້ນພະນັກງານລັດ, ເຈົ້າໜ້າທີ່ຕຳຫລວດ ແລະ ທະຫານ, ຜູ້ທີ່ມີຂໍ້ຕົກລົງແຕ່ງຕັ້ງໄປວຽກທາງລາດຊະການ ຖືກຕ້ອງຕາມຂັ້ນຕອນຂອງກົດໝາຍເທົ່ານັ້ນ).

2) ຫ້າມຜູ້ໂດຍສານນຳທາດລະເບີດທຸກຊະນິດເຂົ້າສະຖານີ, ຂຶ້ນລົດໄຟ ເຊັ່ນ: ທາດລະເບີດ, ໝາກກະໂພກ, ສາຍ-ດອກໄມ້ໄຟລະເບີດ, ດິນລະເບີດ ແລະ ທາດແຕກອື່ນໆ ຫ້າມນຳເຂົ້າສະຖານີ ແລະ ນຳຂຶ້ນລົດໄຟຢ່າງເດັດຂາດ.

3) ຫ້າມຜູ້ໂດຍສານນຳທາດເຄມີທຸກຊະນິດເຂົ້າສະຖານີ, ຂຶ້ນລົດໄຟ ເຊັ່ນ: ທາດ ໄຮໂທຣເຈນ, ເມເທັນ, ເອເທັນ, ບູເຊັ່ນ, ເອທິລິນ, ໂປຣຟີລິນ, ແອຊີຕີລິນຄາບອນມາໂນຊາຍ, ແກັດນໍ້າມັນແຫລວ, ຟຣອນ, ອົກຊີເຈນ (ຍົກເວັ້ນທາງການແພດ) ນໍ້າມັນແອັດຊັງ, ນໍ້າມັນກະຊວນ ແລະ ທາດແຫລວໄວໄຟທຸກປະເພດ ຫ້າມຜູ້ໂດຍສານນຳເຂົ້າສະຖານີ ແລະ ນຳຂຶ້ນລົດໄຟຢ່າງເດັດຂາດ.

4) ຫ້າມຜູ້ໂດຍສານນຳຢາເສບຕິດທຸກປະເພດເຂົ້າສະຖານີ ແລະ ນຳຂຶ້ນລົດໄຟຢ່າງເດັດຂາດ ເຊັ່ນ: ເຮໂຣອິນ, ຢາບ້າ, ຢາໄອ, ຢາເຄ, ໂຄເຄນ, ກັນຊາ, ຝິ່ນ ແລະ ຢາເສບຕິດອື່ນໆ.
5) ຫ້າມຜູ້ໂດຍສານນຳເອົາວັດຖຸປາຍແຫລມ, ມີຄົມທຸກຊະນິດເຂົ້າສະຖານີ ແລະ ນຳຂຶ້ນລົດ ໄຟຢ່າງເດັດຂາດ ເຊັ່ນ: ມີດ, ພ້າ, ຄັດເຕີ, ມີສະໄລ ແລະ ອື່ນໆ ທີ່ສາມາດເຮັດໃຫ້ຜູ້ອື່ນບາດເຈັບ ແລະ ເສຍຊີວິດ.

6) ຫ້າມຜູ້ໂດຍສານນຳສັດລ້ຽງ, ສັດປ່າມີຊິວິດ ແລະ ບໍ່ມີຊິວິດທຸກຊະນິດເຂົ້າສະຖານີ ແລະ ນຳຂຶ້ນລົດໄຟຢ່າງເດັດຂາດ ເຊັ່ນ: ໝາ, ແມວ ແລະ ສັດອື່ນໆ.
7) ຫ້າມຜູ້ໂດຍສານນຳອາຫານທຸກຊະນິດທີ່ມີກິ່ນເໝັນ, ອາຫານທີ່ເປັນນໍ້າທີ່ຈະສ້າງຄວາມບໍ່ສະອາດ, ມີຜົນກະທົບທາງສິ່ງແວດລ້ອມ, ຕໍ່ຜູ້ໂດຍສານຢູ່ໃນສະຖານີ ແລະ ຂະບວນລົດ.

ສ່ວນຂັ້ນຕອນໃນການຈັດຕັ້ງປະຕິບັດບັນດາຂໍ້ຫ້າມ: ເຈົ້າໜ້າທີ່ພະແນກຮັກສາຄວາມປອດໄພ ບໍລິສັດທາງລົດໄຟ ລາວ-ຈີນ ເປັນຜູ້ກວດກາ, ເປັນຜູ້ຄຸມເຄື່ອງເອັກສະເລ່ ແລະ ເຄື່ອງຈັກອື່ນໆ ພາຍຫລັງກວດພົບເຫັນອາວຸດ, ທາດລະເບີດ, ສານເຄມີ, ຂອງມີຄົມ, ຢາເສບຕິດ ແລະ ເຄື່ອງທີ່ລະບຸໃນຂໍ້ຫ້າມນັ້ນ ແມ່ນເຮັດບົດບັນທຶກ ມອບໃຫ້ເຈົ້າໜ້າທີ່ຕຳຫລວດລົດໄຟ ເປັນຜູ້ກວດກາ, ຄຸ້ມຄອງ, ເພື່ອນຳໄປດຳເນີນການສືບສວນ-ສອບສວນຕາມຂັ້ນຕອນ ຂອງລະບຽບ ແລະ ກົດໝາຍ; ເຈົ້າໜ້າທີ່ຕໍາຫລວດ ເປັນຜູ້ຕິດຕາມ, ກວດກາ, ຄຸ້ມຄອງການປະຕິບັດໜ້າທີ່ຂອງພະນັກງານຮັກສາຄວາມປອດໄພ ໃນການປະຕິດບັດໜ້າທີ່ວຽກງານວິຊາສະເພາະ, ທັງຕິດຕາມກວດກາຜູ້ໂດຍສານທີ່ໃຊ້ບໍ ລິການລົດໄຟ ໃຫ້ມີຄວາມປອດໄພ ແລະ ມີປະສິດຕິພາບສູງ ເພື່ອຮັບປະກັນທາງດ້ານວຽກງານວິຊາສະເພາະຂອງເຈົ້າໜ້າທີ່ຕຳຫລວດ.

ພ້ອມກັນນີ້, ເຈົ້າໜ້າທີ່ຮັກສາຄວາມປອດໄພ ບໍລິສັດທາງລົດໄຟ ລາວ-ຈີນ ແລະ ເຈົ້າໜ້າທີ່ ຕຳຫລວດລົດໄຟ ໃຫ້ປະສານສົມທົບກັນຕິດຕາມກວດກາບັດປະຈໍາຕົວ, ພັດສະປອດ, ບຸກຄົນທີ່ມີບັນຊີ ກໍ່ການກະທຳຜິດທາງອາຍາ ແລະ ທາງແພ່ງ ຕາມໝາຍຈັບຂອງສານ, ໄອຍາການ ຕາມການຊີ້ ຂອງເຈົ້າໜ້າທີ່ຂັ້ນສູງຂອງກະຊວງປ້ອງກັນຄວາມສະຫງົບ, ເມື່ອກວດພົບເຫັນ, ມອບເຈົ້າໜ້າທີ່ຕຳຫລວດລົດໄຟ ສົມທົບກັບເຈົ້າໜ້າທີ່ກ່ຽວຂ້ອງ ປະຕິບັດຕາມຂັ້ນຕອນຂອງກົດໝາຍ; ວັດຖຸເຄື່ອງຂອງກາງທີ່ເຈົ້າໜ້າທີ່ຮັກສາຄວາມປອດໄພ ຂອງບໍລິສັດລົດໄຟ ລາວ-ຈີນ ແລະ ເຈົ້າໜ້າທີ່ຕໍາຫລວດລົດໄຟ ກວດພົບທີ່ຜູ້ໂດຍສານນຳເຂົ້າສະຖານີ ແລະ ຂຶ້ນຂະບວນລົດໄຟ, ເຊິ່ງບັນດາວັດຖຸ ແລະ ເຄື່ອງເກືອດຫ້າມທີ່ກວດພົບເຫັນ ມອບໃຫ້ຕຳຫລວດລົດໄຟເປັນຜູ້ປົກປັກຮັກສາ ແລະ ນຳໄປສືບ ສວນ-ສອບສວນ ຕາມລະບຽບກົດໝາຍ.