ສ້າງທ່າຫັນປ່ຽນໃໝ່ ວຽກວິສາຫະກິດບັນຊີ ແລະ ວິສາຫະກິດກວດສອບ

ວັນທີ 26 ມັງກອນ 2022 ທີ່ສະຖາບັນການເງິນ-ການບັນຊີ, ໄດ້ຈັດກອງປະຊຸມວິຊາການສ້າງທ່າຫັນປ່ຽນໃໝ່ ຂອງວຽກວິສາຫະກິດບັນຊີ ແລະ ວິສາຫະກິດກວດສອບ ໃຫ້ເປັນຕົວແທນໃຫ້ພາກລັດ ໃນການຊຸກຍູ້ການຖືບັນຊີໃຫ້ຖືກຕ້ອງຕາມລະບຽບກົດໝາຍ,ໂດຍການເປັນປະທານຂອງທ່ານ ພູທະນູເພັດ ໄຊສົມບັດ ຮອງລັດຖະມົນຕີ ກະຊວງການເງິນ, ມີ ທ່ານ ນາງ ດາວອນ ທອງຈັນ ຫົວໜ້າກົມຄຸ້ມຄອງບັນຊີ ກະຊວງການເງິນ, ມີຕາງໜ້າພະແນກການເງິນ ນະຄອນຫລວງວຽງຈັນ, ມີຄະນະພະແນກກົມຄຸ້ມຄອງບັນຊີ, ມີຜູ້ອໍານວຍການວິສາຫະກິດບັນຊີ ແລະ ວິສາຫະກິດກວດສອບບັນຊີ, ພ້ອມດ້ວຍພາກສ່ວນທີ່ກ່ຽວຂ້ອງ ເຂົ້າຮ່ວມ.

ກອງປະຊຸມໃນຄັ້ງນີ້, ໄດ້ຈັດຂຶ້ນເພື່ອສະຫລຸບ ແລະ ລາຍງານການເຄື່ອນໄຫວວຽກງານຂອງວິສາຫະກິດບັນຊີ ແລະ ວິສາຫະກິດກວດສອບປະຈຳ ປີ 2021 ແລະ ທິດທາງແຜນການປະຈຳ ປີ2022, ເຜີຍແຜ່ຂໍ້ຕົກລົງວ່າດ້ວຍການອະນຸຍາດດຳເນີນວິສາຫະກິດບັນຊີ, ວິສາຫະກິດກວດສອບ ແລະ ນັກກວດສອບຕາມກົດໝາຍ, ຄຳສັ່ງເລກທີ 18 ຂອງນາຍຍົກລັດຖະມມົນຕີ ທີ່ຕິດພັນກັບວຽກງານບັນຊີ ແລະ ກວດສອບອິດສະລະ, ນຳສະເໜີຮ່າງບົດບັນທຶກການປະຖົມນິເທດ ສຳລັບວິສາຫະກິດສ້າງຕັ້ງໃໝ່ ແລະ ປຶກສາຫາລື ກ່ຽວກັບທິດທາງ ແລະ ແຜນການໃນຕໍ່ໜ້າ.

ທ່ານ ພູທະນູເພັດ ໄຊສົມບັດ ຮອງລັດຖະມົນຕີ ກະຊວງການເງິນ ໄດ້ໃຫ້ກຽດໂອ້ລົມ ແລະ ໃຫ້ທິດຊີ້ນໍາຕໍ່ກອງປະຊຸມ ໂດຍໄດ້ເນັ້ນບົດບາດຂອງວຽກງານບັນຊີ ແລະ ກວດສອບອິດສະລະ ແລະ ລັດຖະບານຖືເອົາເປັນວຽກໜື່ງ ທີ່ເອົາເຂົ້າໃນວະລະແຫ່ງຊາດ ວ່າດ້ວຍການແກ້ໄຂຂໍ້ຫຍຸ້ງຍາກທາງດ້ານເສດຖະກິດ ແລະ ກຳນົດເຂົ້າ ໃນຄຳສັ່ງເລກທີ 18 ຂອງນາຍົກລັດຖະມົນຕີ ວ່າດ້ວຍ ການເພີ່ມທະວີການຄຸ້ມຄອງ ແລະ ຕ້ານການຮົ່ວໄຫລຂອງລາຍຮັບງົບປະມານແຫ່ງລັດ.

ພ້ອມທັງຮຽກຮອງໃຫ້ທຸກພາກສ່ວນ ຍົກສູງຄວາມຮັບຜິດຊອບ ແລະ ປະກອບຄໍາເຫັນຕໍ່ກັບການຄຸ້ມຄອງວຽກງານກວດສອບອິດສະລະ ທີ່ເປັນປະໂຫຍດ ສຳລັບການກະກຽມຈັດຕັ້ງປະຕິບັດຄຳສັ່ງເລກທີ 18 ຂອງນາຍົກລັດຖະມົນຕີ ທີ່ຕິດພັນກັບຂະແໜງຄຸ້ມຄອງການບັນຊີ, ແນ່ໃສ່ສ້າງໃຫ້ວິສາຫະກິດບັນຊີ ແລະ ວິສາຫະກິດກວດສອບເປັນຕົວແທນໃຫ້ພັກ ແລະ ລັດຖະບານ ໃນການຊຸກຍູ້ໃຫ້ຫົວໜ່ວຍທຸລະກິດຖືບັນຊີ ແລະ ປະຕິບັດພັນທະງົບປະມານໃຫ້ຖືກຕ້ອງ, ຄົບຖ້ວນ ແລະ ທັນເວ ລາໄດ້ຢ່າງເປັນຮູບປະທຳ ເຮັດໃຫ້ວຽກງານບັນຊີກາຍເປັນເຄື່ອງມືຮັບໃຊ້ ການຄຸ້ມຄອງການເງິນ ໂດຍລວມ ແລະ ເປັນເຄື່ອງມືໃນການຄຸ້ມຄອງລາຍຮັບ ແລະ ລາຍຈ່າຍງົບປະ ມານແຫ່ງລັດ.

ພ້ອມດຽວກັນນີ້, ຜູ້ເຂົ້າຮ່ວມກອງປະຊຸມ ໄດ້ມີການສົນທະນາແລກປ່ຽນບົດຮຽນຊຶ່ງກັນ ແລະ ກັນ ລະ ຫວ່າງຜູ້ເຂົ້າຮ່ວມ ຈາກບັນດາກົມກະຊວງການເງິນ, ພະແນກການເງິນ ນະຄອນຫລວງວຽງຈັນ, ວິສາຫະກິດບັນຊີ ແລະ ວິສາຫະກິດກວດສອບ ກ່ຽວກັບສະພາບການເຄື່ອນໄຫວຂອງວິສາຫະກິດບັນຊີ ແລະ ວິສາຫະກິດກວດສອບ ແລະ ບັນດານິຕິກໍາທີ່ກ່ຽວຂ້ອງ ເພື່ອເຫັນດີເປັນເອກະພາບໃນກັນຈັດຕັ້ງປະຕິບັດໃນຕໍ່ໜ້າ.