ຢຸດການຂາຍໃບເກັບເງິນອາກອນມູນຄ່າເພີ່ມເປັນຊຸດ

ວັນທີ 20 ມັງກອນ 2022 ຜ່ານມານີ້ ກະຊວງການເງິນ ອອກແຈ້ງການ ຢຸດການຂາຍໃບເກັບເງິນອາກອນມູນຄ່າເພີ່ມເປັນຊຸດ ມີເນື້ອໃນລະອຽດດັ່ງນີ້: ຖືເປັນກຽດແຈ້ງມາຍັງທ່ານຮັບຊາບ ກ່ຽວກັບການຂາຍໃບເກັບເງິນອາກອນມູນຄ່າເພີ່ມເປັນຊຸດ ໃນໄລຍະຜ່ານມາ ໃຫ້ແກ່ຂະແຫນງການຕ່າງໆຂອງລັດຂັ້ນຕ່າງໆ ໃນຂອບເຂດທົ່ວປະເທດ ໃນກໍລະນີ ທີ່ເຄື່ອນໄຫວມີລາຍໄດ້ບາງຄັ້ງຄາວ ເປັນຕົ້ນແມ່ນ ການໃຫ້ເຊົ່າ, ການກໍ່ສ້າງ ແລະ ການສະໜອງການບໍລິການ ອື່ນໆ ເຫັນວ່າ ບໍ່ຖືກຕ້ອງ, ບໍ່ສອດຄ່ອງຕາມທີ່ກົດຫມາຍ ແລະ ນິຕິກໍາໃຕ້ກົດຫມາຍ ກ່ຽວກັບອາກອນມູນຄ່າເພີ່ມ ໄດ້ກໍານົດໄວ້ ເນື່ອງຈາກອະນຸຍາດໃຫ້ນໍາໃຊ້ສະເພາະ ບຸກຄົນ, ນິຕິບຸກຄົນ ແລະ ການຈັດຕັ້ງ ທີ່ດໍາເນີນທຸລະກິດ ແລະ ຈົດທະບຽນຢູ່ໃນລະບົບອາກອນມູນຄ່າເພີ່ມ ເທົ່ານັ້ນ.

ເພື່ອໃຫ້ວຽກງານດັ່ງກ່າວຖືກດໍາເນີນໄປ ປົກກະຕິ, ຖືກຕ້ອງ ແລະ ສອດຄ່ອງຕາມກົດຫມາຍ ກໍານົດ ໃນຕໍ່ກະຊວງການເງິນ ແຈ້ງການແນະນໍາ ດັ່ງນີ້:

1. ຢຸດຕິ ການຂາຍໃບເກັບເງິນອາກອນມູນຄ່າເພີ່ມເປັນຊຸດ ໃຫ້ແກ່ອົງການຈັດຕັ້ງຂອງລັດຂັ້ນຕ່າງໆ ໃນຂອບເຂດທົ່ວປະເທດ ທີ່ບໍ່ໄດ້ສ້າງຕັ້ງເປັນວິສາຫະກິດ ແລະ ບໍ່ໄດ້ຈົດທະບຽນຢູ່ໃນລະບົບອາກອນມູນຄ່າເພີ່ມ.

2. ໃຫ້ຄິດໄລ່ເກັບໃນປະເພດອາກອນລາຍໄດ້ ປ່ຽນແທນອາກອນມູນຄ່າເພີ່ມ ຕາມທີ່ໄດ້ກໍານົດໄວ້ໃນມາດຕາ 34.12 ແລະໃຫ້ຄິດໄລ່ອາກອນລາຍໄດ້ ໃນອັດຕາ 10% ຕາມທີ່ໄດ້ກໍານົດໄວ້ໃນມາດຕາ ມາດຕາ 39 ຂໍ້ທີ 5 ຂີດຫນ້າທີ່ 5 ຂອງກົດຫມາຍວ່າ ດ້ວຍອາກອນລາຍໄດ້ ສະບັບເລກທີ 67/ສພຊ, ລົງວັນທີ 18 ມິຖຸນາ 2019.

ກໍລະນີອົງການຈັດຕັ້ງຂອງລັດ ຕ້ອງການສືບຕໍ່ນໍາໃຊ້ໃບເກັບເງິນອາກອນມູນຄ່າເພີ່ມ ຕ້ອງຂໍອະນຸຍາດສ້າງຕັ້ງເປັນວິສາຫະກິດ ຈາກ ຂະແຫນງອຸດ ສາຫະກໍາ-ການຄ້າ ຫຼື ຂະແຫນງສົ່ງເສີມການລົງທຶນ ແລະ ຈົດທະບຽນເຂົ້າໃນລະບົບອາ ກອນມູນຄ່າເພີ່ມ ເສຍກ່ອນ ຈຶ່ງຈະໄດ້ ຮັບພິຈາລະນາ ແລະ ອະນຸມັດ.

ດັ່ງນັ້ນ, ຈຶ່ງແຈ້ງມາຍັງທ່ານເພື່ອຊາບ ແລະ ປະຕິບັດຢ່າງເຂັ້ມງວດ.