ປະຊຸມອາຊຽນຈະໃຫ້ຄວາມ ສຳຄັນເລື່ອງກໍ່ການຮ້າຍ
ບັນຫາໄພຄຸກຄາມຈາກກໍ່ການຮ້າຍມີທ່າອ່ຽງວ່າຈະຖືກຍົກຂຶ້ນຫາລືເປັນບັນຫາສຳຄັນແທນເລື່ອງຂໍ້ພິພາດໃນທະເລຈີນໃຕ້ ລະຫວ່າງກອງປະຊຸມອາຊຽນວ່າດ້ວຍການຮ່ວມມືດ້ານການເມືອງ ແລະ ຄວາມໝັ້ນຄົງໃນພາກພື້ນອາຊີ-ປາຊີຟິກ (ASEAN Regional Forum) ທີ່ພວມຈະມາເຖິງ.
ກອງປະຊຸມອາຊຽນວ່າດ້ວຍການຮ່ວມມືດ້ານການເມືອງ ແລະ ຄວາມໝັ້ນຄົງໃນພາກພື້ນອາຊີ ແລະ ປາຊີຟິກ ຄັ້ງທີ 24 ມີກຳນົດຈັດຂຶ້ນຢູ່ນະຄອນຫລວງມະນິລາຂອງຟີລິບປິນ ໃນວັນທີ 5 ສິງຫານີ້. ໃນອະດີດຜ່ານມາ, ເລື່ອງຂໍ້ພິພາດໃນທະເລຈີນໃຕ້ມັກຈະຖືກຍົກຂຶ້ນເປັນບັນຫາຕົ້ນຕໍໃນການຫາລືລະຫວ່າງຕົວແທນຂອງແຕ່ລະປະເທດທີ່ເຂົ້າຮ່ວມ ເພື່ອກັດດັນໃຫ້ຈີນເລັ່ງສະຫລຸບແນວປະຕິບັດໃນທະເລຈີນໃຕ້, ແຕ່ພາຍຫລັງເກີດເຫດກຸ່ມຕິດອາວຸດ ເຊິ່ງສະໜັບສະໜູນກຸ່ມລັດອິດສະລາມ ຫລື IS ກໍ່ເຫດຍຶດເມືອງມາລາວີທາງຕອນໃຕ້ຂອງຟີລິບປິນໃນວັນທີ 23 ພຶດສະພາ ບັນດາປະເທດອາຊຽນຕ່າງຮູ້ສຶກກັງວົນວ່າ: ຈະຖືກໃຊ້ເປັນສູນກາງຂອງກຸ່ມຫົວຮຸນແຮງໃນພາກພື້ນອາຊີ.
ທ່ານ ໂຣເບສເປີຍ ໂບລິວາ ຮັກສາການໂຄສົກກະຊວງການຕ່າງປະເທດຟີລິບປິນ ກ່າວວ່າ: ການເຂົ້າມາພາກພື້ນຂອງກຸ່ມ IS ກາຍເປັນສິ່ງກັງວົນສຳລັບທຸກປະເທດ, ທ່ານຈຶ່ງຫວັງວ່າ: ກອງປະຊຸມອາຊຽນຢູ່ນະຄອນຫລວງມະນິລາໃນຄັ້ງນີ້ຈະຊ່ວຍສ້າງແຮງສະໜັບສະໜູນໃນການຕໍ່ຕ້ານກໍ່ການຮ້າຍ, ສ່ວນຜູ້ອຳນວຍການບໍລິຫານຂອງສະຖາບັນເພື່ອການວິໄຈສັນຕິພາບ, ຄວາມຮຸນແຮງ ແລະ ກໍ່ການຮ້າຍຂອງຟີລິບປິນ ກ່າວວ່າ: ບັນຫາທະເລຈີນໃຕ້ກາຍເປັນເລື່ອງນ້ອຍ ເມື່ອທຽບໃສ່ການເຂົ້າມາຂອງນັກຮົບກຸ່ມກໍ່ການຮ້າຍທີ່ມີຈຳນວນເພີ່ມຂຶ້ນ ເຮັດໃຫ້ຖືກເບິ່ງວ່າ: ເປັນເລື່ອງຈຳເປັນຮີບດ່ວນໃນປັດຈຸບັນ.
