2 ທີມດັງຮ່ວມວົງຫວັງຢືມຕົວ ຟານ ເດິ ເບັກ

ຟາບຣີຊີໂອ ໂຣມາໂນ ຜູ້ສື່ຂ່າວສາຍຕະຫລາດນັກເຕະຊື່ດັງເປີດເຜີຍວ່າ ຄຣິສຕັນ ພາເລດ ທີມໃນພຣີເມຍລີກ ອັງກິດ ແລະ ບາເລນເຊຍ ສະໂມສອນໃນ ລາ ລີກາ ສະເປນ ສົນໃຈຄວ້າ ດອນນີ ຟານ ເດິ ເບັກ ກອງກາງຈອມອາພັບຂອງ ແມນເຊສເຕີ ຢູໄນເຕັດ ໄປໃຊ້ງານດ້ວຍສັນຍາຢືມຕົວເບື້ອງຕົ້ນຈົນຈົບລະດູການນີ້.

ແນວໃດກໍຕາມ ໂຣມາໂນ ລະບຸວ່າ : ແມນຢູ ຈະບໍ່ຮັບຂ້ໍສະເຫນີຢືມຕົວພ່ວງອັອບຊັນຊື້ຂາດ ເນື່ອງຈາກຕ້ອງການເກັບຕົວກອງກາງທີມຊາດເນເທີແລນເອົາໄວ້ໃຊ້ງານໃນລະດູການຫນ້າ ຫລັງຈາກໄດ້ຜູ້ຈັດການທີມຖາວອນເຂົ້າມາເຮັດຫນ້າທີ່ແທນ ຣາຟ ຣັງນິກ ທີ່ຈະຄຸມທີມຈົນຈົບລະດູການນີ້ ກ່ອນຈະຮັບຕຳແຫນ່ງເປັນທີ່ປຶກສາດ້ວຍສັນຍາ 2 ປີ.

ຂະນະທີ່ ບີບີຊີ ສະປອດ ລາຍງານວ່າ ຄຣິສຕັລ ພາເລດ ມີໂອກາດໄດ້ ຟານ ເດິ ເບັກ ໄປຮ່ວມງານດ້ວຍສັນຍາຢືມຕົວຈົນຈົບລະດູການນີ້ຫລາຍກວ່າ ບາເລນເຊຍ ຫລັງເປີດສາກເຈລະຈາກັບ ແມນຢູ ແລ້ວ.

ທັງນີ້ ຟານ ເດິ ເບັກ ຕ້ອງການໂອກາດລົງສະຫນາມຢ່າງສະຫມ່ຳສະເຫມີ ເພື່ອຫວັງຕິດທີມຊາດເນເທີແລນໄປລຸຍການແຂ່ງຂັນບານໂລກ 2022 ຮອບສຸດທ້າຍ ທີ່ກາຕ້າ ທ້າຍປີນີ້ ຫລັງຈາກເກືອບບໍ່ໄດ້ລົງສະຫນາມໃຫ້ກັບ ແມນຢູ ໂດຍລະດູການນີ້ຍັງບໍ່ໄດ້ເປັນ 11 ຕົວຈິງໃນພຣີເມຍລີກແມ່ນແຕ່ນັດດຽວ, ເຮັດໄດ້ພຽງເປັນຕົວສຳຮອງ 8 ເກມເທົ່ານັ້ນ.