ສປປ ເກົາຫລີ ຍິງລູກສອນໄຟ 2 ລູກ ລົງທະເລຕາເວັນອອກເຊົ້າມື້ນີ້ ຮອບທີ 5 ໃນເວລາບໍ່ຮອດເດືອນ
ກອງທັບ ສ.ເກົາຫລີ ເຜີຍ ສປປ ເກົາຫລີ ຍິງທົດລອງລູກສອນໄຟຢ່າງໜ້ອຍ 2 ລູກລົງທະເລຕາເວັນອອກເຊົ້າວັນທີ 25 ມັງກອນນີ້ ເຊິ່ງຖືເປັນການທົດລອງລູກສອນໄຟຄັ້ງທີ 5 ໃນຮອບເດືອນມັງກອນ.
ວັນທີ 25 ມັງກອນ 2022, ສຳນັກຂ່າວຕ່າງປະເທດລາຍງານໂດຍອ້າງແຫລ່ງຂ່າວຈາກກອງທັບ ສ.ເກົາຫລີ ວ່າ: ສປປ ເກົາຫລີ ໄດ້ຍິງວັດຖຸເຊິ່ງເຊື່ອວ່າເປັນລູກສອນໄຟຢ່າງໜ້ອຍ 2 ລູກລົງສູ່ຝັ່ງທະເລຕາເວັນອອກເຊົ້າວັນທີ 25 ມັງກອນນີ້ ໂດຍໜ່ວຍຂ່າວລັບອາເມລິກາ ແລະ ສ.ເກົາຫລີ ກຳລັງວິເຄາະຂໍ້ມູນກ່ຽວກັບການຍິງລູກສອນໄຟດັ່ງກ່າວ.
ລາຍງານລະບຸວ່າ: ຖ້າໄດ້ຮັບການຢືນຢັນຢ່າງເປັນທາງການ ການທົດລອງຍິງລູກສອນໄຟຄັ້ງນີ້ຖືເປັນການດຳເນີນການຄັ້ງທີ 5 ຂອງ ສປປ ເກົາຫລີ ໃນຮອບເດືອນນີ້ ນັບແຕ່ມີການທົດລອງລູກສອນໄຟນຳວິຖີເມື່ອວັນທີ 5 ມັງກອນຜ່ານມາ.
ການເຄື່ອນໄຫວຂອງລັດຖະບານພຽງຢາງໃນຄັ້ງນີ້ມີຂຶ້ນ ຫລັງຈາກທ່ານ ກິມຈ໋ອງອຸນ ຜູ້ນຳ ສປປ ເກົາຫລີ ກ່າວໃນອາທິດຜ່ານມາວ່າ: ໄພຄຸກຄາມຂອງອາເມລິກາມາເຖິງຈຸດທີ່ເປັນອັນຕະລາຍ ພ້ອມຂູ່ຈະພິຈາລະນາຮື້ຟື້ນກິດຈະກຳທີ່ຖືກໂຈະ ເຊິ່ງຄາດວ່າອາດໝາຍເຖິງການທົດລອງອາວຸດນິວເຄຼຍ ແລະ ລູກສອນໄຟໄລຍະໄກ.
ການປະກາດດັ່ງກ່າວເບິ່ງຄືວ່າຈະເປັນການສົ່ງສັນຍານເຕືອນທີ່ແຂງແກ່ນຫລາຍຂຶ້ນ ຫລັງຈາກຜູ້ນຳ ສປປ ເກົາຫລີ ໄດ້ອອກມາປະກາດໃນທ້າຍປີ 2021 ຜ່ານມາວ່າ: “ຈະບໍ່ຍອມຜູກມັດຕົວເອງກັບການໂຈະທົດລອງອາວຸດນິວເຄຼຍ ແລະ ລູກສອນໄຟຂ້າມທະວີບໄລຍະໄກ (ICBMs) ອີກຕໍ່ໄປ. ໃນຂະນະທີ່ອາເມລິກາຍັງເມີນເສີຍຕໍ່ຂໍ້ຮຽກຮ້ອງໃຫ້ຫລຸດຜ່ອນມາດຕະການຂວ້ຳບາດ”.
ອ້າງອີງ:
https://en.yna.co.kr/view/AEN20220125006551325?input=tw
https://edition.cnn.com/…/north-korea-cruise…/index.html
https://asia.nikkei.com/…/North-Korea-policy-needs-to…
