ບາເຊໂລນາ ຕັ້ງຄ່າຕົວ ເດມເບເລ ໃນລາຄາຂາດທຶນ

ເລີ ປາຣີຊຽງ ສື່ຂອງຝຣັ່ງ ລະບຸວ່າ ບາເຊໂລນາ ຂໍເງິນ 17 ລ້ານປອນ ເພື່ອແລກກັບການປ່ອຍ ອຸສມານ ເດມເບເລ ອອກຈາກທີມໃຫ້ໄດ້ພາຍໃນຕະຫລາດໄລຍະເດືອນມັງກອນນີ້ ເຊິ່ງຖືວ່າຖືກກວ່າຕອນທີ່ພວກເຂົາຊື້ລາວມາຮ່ວມທີມຫລາຍ.

ບາເຊໂລນາ ສະໂມສອນໃຫຍ່ແຫ່ງ ລາ ລີກາ ສະເປນ ຕ້ອງການເງິນ 17 ລ້ານປອນ ເພື່ອເປັນຄ່າຕົວຂອງ ອຸສມານ ເດມເບເລ ກອງຫນ້າຊາວຝຣັ່ງ ຕາມລຍງານຂອງ ເລີ ປາຣີຊຽງ ສື່ຊັ້ນນຳຂອງຝຣັ່ງ.

ຄະນະບໍລິຫານຂອງ ບາເຊໂລນາ ປະກາດເອງວ່າພວກເຂົາຕັດສິນໃຈທີ່ຈະບໍ່ພະຍາຍາມດຶງຕົວ ເດມເບເລ ເອົາໄວ້ກັບທີມອີກຕໍ່ໄປ ຫລັງຈາກນັກເຕະເຫລືອສັນຍາກັບທີມຈົນເຖິງລະດູການນີ້ເທົ່ານັ້ນ ແລະ ທີ່ຜ່ານມາ ເດມເບເລ ກໍມີບັນຫາດ້ານວິໄນໃນລະດັບຫນຶ່ງ ເຊິ່ງທາງສະໂມສອນກໍຫວັງທີ່ຈະປ່ອຍລາວໃຫ້ໄດ້ຕັ້ງແຕ່ໄລຍະເດືອນມັງກອນນີ້ ເພື່ອທີ່ຈະໄດ້ມີເງິນເຂົ້າສະໂມສອນແດ່.

ທັງນີ້ ການເລືອກປ່ອຍ ເດມເບເລ ດ້ວຍຄ່າຕົວ 17 ລ້ານປອນ ຖືວ່າເຮັດໃຫ້ ບາເຊໂລນາ ຂາດທຶນຫລາຍ ເພາະຕອນພວກເຂົາດຶງ ເດມເບເລ ມາຈາກ ໂບຣຸສເຊຍ ດອດມຸນ ເມື່ອປີ 2017 ນັ້ນ ດ້ວຍຂໍ້ສະເຫນີທີ່ມີມູນຄ່າສູງເຖິງ 126 ລ້ານປອນ.