ເບນເຊມາ ຖືກຂີ້ລັກຂຶ້ນເຮືອນລະຫວ່າງເກມພົບກັບ ເອລເຊ ທີ່ລາວຍິງລູກໂທດພາດ

ຄາຣິມ ເບນເຊມາ ກອງຫນ້າຊາວຝຣັ່ງຂອງ ເຣອັນ ມາດຣິດ ທີມດັງແຫ່ງ ລາລີກາ ສະເປນ ຕ້ອງຊວຍຊ້ຳຊວຍຊ້ອນບໍ່ຢຸດ ເມືື່ອລາວຖືກຂີ້ລັກຂຶ້ນເຮືອນໃນລະຫວ່າງການແຂ່ງຂັນທີ່ເປີດສະຫນາມ ຊານຕີອາໂກ ເບີນາບິວ ພົບກັບ ເອລເຊ ທີ່ລາວຍິງລູກໂທດບໍ່ເຂົ້າ ກ່ອນຈະົບລົງດ້ວຍການສະເຫມີກັນໄປ 2-2.

ເກມດັ່ງກ່າວ ຄາຣິມ ເບນເຊມາ ອາຍຸ 34 ປີ ຫາກໍເຊົາເຈັບກັບມາລົງສະຫນາມໃນເກມດັ່ງກ່າວ ແຕ່ຕ້ອງພົບກັບອາການບາດເຈັບອີກເທື່ອຫນຶ່ງຖືກປ່ຽນຕົວອອກຈາກສະຫນາມໃນນາທີ 58 ຂອງເກມການແຂ່ງຂັນ ແຖມເກມນີ້ ລາວຍັງຍິງລູກໂທດພາດນຳອີກ.

ຫລັງຈົບເກມ ເບນເຊມາ ກໍຮູ້ຂ່າວຮ້າຍດັ່ງກ່າວວ່າຖືກຂີ້ລັກຂຶ້ນເຮືອນ ແຕ່ໂຊກດີທີ່ບໍ່ມີຄົນຢູ່ໃນເຮືອນແຕ່ຢ່າງໃດ ຈຶ່ງຕັດບັນຫາທີ່ຈະຖືກທຳຮ້າຍ ແຕ່ວ່າຕອນນີ້ຍັງບໍ່ສາມາດລະບຸໄດ້ວ່າມີຊັບສິນຫລືສິ່ງຂອງໃດທີ່ຫາຍໄປ.