ພາກທຸລະກິດທ່ອງທ່ຽວເມືອງໂຂງ ສະເໜີພາກລັດ ແກ້ໄຂຫລາຍບັນຫາກຽມຮັບນັກທ່ອງທຽວ

ແຫລ່ງຂ່າວຈາກເມືອງໂຂງແຂວງຈຳປາສັກລາຍງານວ່າ: ໃນການຫາລືເມື່ອອາທິດຜ່ານມາ, ພາກສ່ວນທຸລະກິດ ໄດ້ສະເໜີໃຫ້ພາກລັດຄົ້ນຄວ້າຊຸກຍູ້ສົ່ງເສີມການບໍລິການທີ່ມີລະບຽບຖືກຕ້ອງຂອງບໍລິສັດນໍາທ່ຽວຢູ່ເຂດເມືອງໂຂງ, ການອອກນິຕິກຳຂໍ້ຕົກລົງ, ຄຳສັ່ງ, ແຈ້ງການການແລ່ນລົດປະຈຳທາງ ແລະ ບໍ່ປະຈຳທາງ ໃຫ້ຈະແຈ້ງໂດຍບໍ່ມີລັກສະນະຊັບຊ້ອນ, ອົງການປົກຄອງເມືອງຄວນສຶກສາມາດຕະການຂອງສະມາ ຄົມລົດດອນເດດ-ສະມາຄົມເຮືອນາກະສັງເພື່ອເຮັດໃຫ້ນັກທ່ອງທ່ຽວປະທັບໃຈ, ການກຳນົດລາຄາບໍລິການ ເຮືອນາກະສັງ-ດອນເດດ ຫຼັງ 4 ໂມງແລງ ໃຫ້ເໝາະສົມ, ເປີດກວ້າງຫຼາຍເສັ້ນທາງບໍລິການເພື່ອສົ່ງນັກທ່ອງທ່ຽວຈາກ ຫາງສະດຳ, ຫາງຄອນ, ຫຼີ່ຜີ, ຫົວເດດ. ທີ່ສຳຄັນຢາກໃຫ້ຫຼາຍພາກສ່ວນບໍລິການບໍ່ໃຫ້ຜູກ ຂາດແຕ່ນາກະສັງຢ່າງດຽວ ແລະ ລັດຕ້ອງສ້າງເງື່ອນໄຂທີ່ຮັດກຸມ, ຖ້າການປະມູນບໍ່ໄປຕາມເງື່ອນໄຂກຳ ນົດໃຫ້ຍົກເລີກ, ປັບປຸງທ່າຈອດເຮືອ ແລະ ບ່ອນຈອດລົດສຳລັບນັກທ່ອງທ່ຽວໃໝ່ ແລະ ໃຫ້ປະຊາຊົນ ມີສ່ວນຮ່ວມເຮັດການບໍລິການບົນພື້ນຖານປະຕິບັດຕາມລະບຽບຄຸ້ມຄອງທີ່ວາງອອກ.

ການນຳສະເໜີບັນຫາເຫຼົ່ານີ້ຂອງພາກທຸລະກິດທ່ອງທ່ຽວເມືອງໂຂງເພື່ອກຽມຄວາມພ້ອມເປີດຮັບນັກທ່ອງທ່ຽວເຂດສີຂຽວໄລຍະ 2 ຂອງລັດຖະບານໃນມໍ່ໆນີ້ ແລະ ເພື່ອເຮັດໃຫ້ການບໍລິການຂອງພາກທຸລະກິດນຳທ່ຽວເປັນຕົ້ນສະມາຄົມລົດ-ເຮືອຂອງບໍລິສັດນຳທ່ຽວນາກະສັງຖືກຕ້ອງ ແລະ ເປັນເອກະພາບກັນ ເປັນຕົ້ນ ລາຄາປົກກະຕິແຕ່ເວລາ 8 ໂມງເຊົ້າຫາ 4 ໂມງແລງ ແລະ ຫຼັງ 4 ໂມງແລງ ທັງຫຼີກເວັ້ນການສໍ້ໂກງ ຫຼື ເອົາປຽບນັກທ່ອງທ່ຽວ.