ກ່ອງສຸ່ມ ບໍ່ຂັດກົດໝາຍ, ແຕ່ຖ້າຫລອກລວງ ຜິດກົດໝາຍແທ້

ປັດຈຸບັນ ປະຕິເສດບໍ່ໄດ້ດອກວ່າ: ສິນຄ້າດັງມີຊື່ສຽງຫລາຍຍີ່ຫໍ້ໄດ້ນຳໃຊ້ ກົນລະຍຸດ ກ່ອງສຸ່ມ ຊຶ່ງໄດ້ກະ ຈາຍມາສູ່ປະເທດເຮົາລະຫວ່າງທ້າຍປີຜ່ານມາ ນຳມາສູ່ການປ່ຽນແປງພຶດຕິກຳຂອງຜູ້ບໍລິໂພກລວມທັງຜູ້ຄ້າຂາຍ. ຈາກການເຫັນ Live ຂອງຜູ້ຂາຍຫລາຍທ່ານ ພໍເຂົ້າໃຈຄ້າວໆຄວາມຄິດຂອງກ່ອງສຸ່ມ ວ່າ ຊື້ເຄື່ອງໂດຍບໍ່ຮູ້ວ່າຈະໄດ້ຫຍັງຈົນເຖິງຄາວເປີດກ່ອງປິດສະໜາແລະ ເມື່ອເປີດອອກມາເຄື່ອງໃນກ່ອງສຸ່ມອາດຈະຄື ຫລື ບໍ່ຄືກັນແລ້ວແຕ່ກົນລະຍຸດຂອງສິນຄ້າຍີ່ຫໍ້ນັ້ນໆ.ຂະນະດຽວກັນກໍມີຄົນບອກວ່າ ກ່ອງສຸ່ມ ຄືກັບການຊື້ເລກຊື້ຫວຍ ໝາຍວ່າລ້ວນແຕ່ແມ່ນການສ່ຽງດວງ ສ່ຽງໂຊກ ຖ້າດວງດີຖືກເລກ ກໍໄດ້ຮັບໂຊກມະຫາສານ, ແຕ່ ກ່ອງສຸ່ມ ກໍໄດ້ແຕ່ຫວັງວ່າ ຂໍໃຫ້ເປັນສິນຄ້າລາຄາແພງຕາມຜູ້ຂາຍ ຫລື ເຈົ້າຂອງສິນ ຄ້າຊຶ່ດັງ ເພາະຈະໄດ້ກຸ້ມຄ່າກັບການໄດ້ຈ່າຍເງິນຊື້. ຂະນະດຽວກັນ ບາງຄົນເປີດອອກມາບໍ່ໄດ້ຕາມຫວັງກໍມີຫລາຍ ຊຶ່ງມີຫລາຍຕົວຢ່າງຈາກການເຜີຍແຜ່ທາງເຟສສ່ວນຕົວຂອງລູກຄ້າດັ່ງກໍລະນີທີ່ຫຼາຍຄົນຄາດຫວັງກັບກ່ອງສຸ່ມ 5.000 ບາດ ແຕ່ໄດ້ເຄື່ອງໜ້ອຍກວ່າລາຄາຈົນກາຍເປັນປະເດັນລົບຕ່າງນານາໃນສັງ ຄົມ. ອີກໜຶ່ງກໍລະນີຈາກຜູ້ໃຊ້ເຟສໄດ້ເຜີຍແຜ່ວ່າ: ກ່ອງສຸ່ມ 5.000 ບາດ ເປີດມາໄດ້ປາຢາງເດັກນ້ອຍຫລິ້ນສອງໂຕ…

ຂະນະດຽວກັນມີຫລາຍຄົນບອກວ່າກຸ້ມຄ່າເພາະໄດ້ຂອງຕາມທີ່ຫວັງໄວ້…ມາເຖິງຈຸດນີ້ ມີ 2 ຂໍ້ສັງເກດຄື ໜຶ່ງຄວາມຫວັງ ເພາະນີ້ຄືການສ່ຽງດວງ ທີ່ທຸກຄົນຫວັງໄດ້ຮັບຜົນຕອບແທນຫລາຍກວ່າ ຫລື ຖ້າບໍ່ໄດ້ແທ້ໆກໍຂໍໃຫ້ເທົ່າທຶນຈາກການຊື້ສິນຄ້າທີ່ເຮົາບໍ່ຮູ້ວ່າຈະໄດ້ຫຍັງ ແລະ ສອງ ຈັນຍາບັນຂອງຜູ້ຂາຍ ຊຶ່ງໃນການຕະຫລາດເອງກໍ່ອາດຈະຂາດນັກການຕະຫລາດທີ່ມີຈັນຍາບັນຄືໄດ້ສວຍໃຊ້ໂອກາດຊ່ອງຫວ່າງທາງກົດໝາຍ ຫຼື ຄວາມຮູ້ ເພື່ອສ້າງຜົນປະໂຫຍດໃຫ້ໂຕເອງ ຫລື ບໍລິສັດ. ຈາກນີ້ເມື່ອລູກຄ້າສະໜັບສະໜູນໂດຍດີຕະຫລອດມາ, ການທີ່ເປັນນັກທຸລະກິດ ຫຼື ນັກການຕະຫລາດທີ່ມີຈັນຍາບັນບໍ່ຄວນເອົາປຽບລູກຄ້າເພາະຖ້າຜູ້ບໍລິໂພກຄິດບໍ່ດີຕໍ່ສິນຄ້າດັ່ງກ່າວ ການທີ່ຈະກັບມາຊະນະໃຈລູກຄ້າອີກ ໜ້າຈະເປັນເລື່ອງຍາກແລ້ວ..

ຄວາມຈິງແລ້ວ, “ກ່ອງສຸ່ມ” ແມ່ນກົນລະຍຸດການຕະຫຼາດໜຶ່ງທີ່ບໍ່ຂັດກົດໝາຍ ຊຶ່ງກົດໝາຍຂອງ ສປປ ລາວ ບໍ່ໄດ້ກຳນົດຂໍ້ຫ້າມໃນການໃຊ້ກົນລະຍຸດດັ່ງກ່າວ, ແຕ່ຖ້າເຈຕະນາໃຊ້ກົນລະຍຸດນີ້ ໂຄສະນາທີ່ມີລັກ ສະນະຕົວະຍົວະ ຫຼື ຕັ້ງລາຄາທີ່ບໍ່ເໝາະສົມກັບມູນຄ່າສິນຄ້າທີ່ເປັນຈິງ, ການກະທຳດັ່ງກ່າວອາດເຂົ້າເກນສໍ້ໂກງຊັບດັ່ງມາດຕາ 233 ຂອງປະມວນກົດໝາຍອາຍາ 2017 ກຳນົດໄວ້ວ່າ: ບຸກຄົນໃດຫາກໄດ້ໃຊ້ເລ່ລ່ຽມຕົວະຍົວະຫຼອກລວງດ້ວຍວິທີໃດກໍຕາມເພື່ອເຮັດໃຫ້ຜູ້ອື່ນເອົາຊັບໃຫ້ຕົນ ຈະຖືວ່າໄດ້ກະທຳຜິດຖານສໍ້ໂກງຊັບ. ຖ້າພິສູດແລ້ວວ່າມີຄວາມຜິດຈິງ, ຜູ້ກະທໍາຜິດໄດ້ມີເຈຕະນາຫຼອກລວງ ຫຼື ຕົວະຍົວະເອົາຊັບລູກຄ້າແລ້ວນັ້ນ, ຜູ້ກ່ຽວອາດຈະຖືກລົງໂທດຕັດອິດສະລະພາບແຕ່ 3 ເດືອນ ຫາ 3 ປີ ແລະ ຈະຖືກປັບໃໝແຕ່ 5.000.000 ກີບ ຫາ 20.000.000ກີບ. ຫາກມີການສໍ້ໂກງເປັນອາຈິນ ຫຼື ກໍ່ຄວາມເສຍຫາຍຢ່າງຫຼວງຫຼາຍຈະຖືກລົງໂທດຕັດອິດສະຫຼະພາບແຕ່ 3 ປີ ຫາ 8 ປີ ແລະ ຈະຖືກປັບໃໝແຕ່ 10.000.000 ຫາ 50.000.000 ກີບ.

ບໍ່ວ່າຈະເປັນລູກຄ້າ ຫລື ຜູ້ຂາຍ ຄວນຊັ່ງຊາຜົນໄດ້ ຜົນເສຍ ໝາຍວ່າໃຫ້ເຮັດໜ້າທີ່ຂອງໃຜລາວ ເຊັ່ນ ຜູ້ຊື້ ຕ້ອງຄິດໃຫ້ຖີ່ຖ້ວນ ສຶກສາກະຕິກາຂອງຜູ້ຂາຍໃຫ້ເລິກ ກ່ອນຊື້ ຫວັງໄດ້ແຕ່ຢ່າເກີນ, ສ່ວນຜູ້ຂາຍເອງ ກໍຕ້ອງມີຈັນຍາບັນ ຈະໃຊ້ກົນລະຍຸດໃດເພື່ອຮັກສາຖານລູກຄ້າທັງງຢ່າໃຫ້ເຂົ້າເກນຜິດກົດໝາຍບ້ານເມືອງເປັນການດີທີ່ສຸດ.