ສະຫະພັນບານເຕະມາເລເຊຍ ຕັ້ງຜູ້ຈັດການທີມຊາວ ສ.ເກົາຫລີ ຄຸມທີມຊາດ

ຕຳແຫນ່ງຫົວຫນ້າຄູຝຶກທີມມາເລເຊຍ ກັບມາຢູ່ໃນພາວະສູນຍາກາດອີກຄັ້ງ ຫລັງຈາກທີ ຕັນ ເສິງ ໂຮ ຕັດສິນໃຈລາອອກຈາກຕຳແຫນ່ງ ເພື່ອຮັບຜິດຊອບຄວາມຫລົ້ມເຫລວ ທີ່ພາທີມຕົກຮອບທຳອິດໃນການແຂ່ງຂັນບານເຕະເອເອຟເອຟ ຊູຊູກິ ຄັບ 2020 ໃນເດືອນທີ່ຜ່ານມາ.

ຈົນຫລ້າສຸດ ສະມາຄົມບານເຕະມາເລເຊຍ ຫລື FAM ໄດ້ປະກາດແຕ່ງຕັ້ງ ຄິມ ພັນ ກອນ ຜູ້ຈັດການທີມຊາວ ສ.ເກົາຫລີ ອາຍຸ 52 ປີ ເຂົ້າມາເຮັດຫນ້າທີ່ຜູ້ຈັດການທີມຄົນໃຫມ່ ຫລັງຈາກທີ່ຍື່ນໃບລາອອກຈາກຕຳແຫນ່ງ ຮອງປະທານສະມາຄົມບານເຕະ ສ.ເກົາຫລີ ໄດ້ບໍ່ດົນ.

ລາຍງານລະບຸວ່າ ຄິມ ພັນ ກອນ ຈະເຂົ້າຮັບຕຳແຫນ່ງຜູ້ຈັດການທີມຊາວມາເລເຊຍ ພາຍໃນສັນຍາເບື້ອງຕົ້ນ 2 ພ້ອມກັບພາທີມງານມາອີກ 4 ຄົນ ເຊິ່ງໄດ້ແກ່ ຜູ້ຊ່ວຍຜູ້ຈັດການທີມ, ຄູຝຶກຜູ້ຮັກສາປະຕູ, ເຈົ້າຫນ້າທີ່ດ້ານເຕັກນິກ ແລະ ນັກວິເຄາະເກມ.

ສຳລັບຜູ້ຈັດການທີມອາຍຸ 52 ປີຄົນນີ້ ມີປະສົບການຄຸມທີມສ່ວນຫລາຍຢູ່ໃນ ສ.ເກົາຫລີ  ແລະ ຮົງກົງ ບໍ່ວ່າຈະເປັນສະໂມສອນ ບູເລີ ເຣນເຈີ, ປູຊານ ໄອປາກ, ເຊົາໄຊນາ ແລະ ກະຍອງນຳ ເອຟຊີ ນອກຈາກນີ້ຍັງເຮັດຜົນງານໄດ້ຢ່າງໂດດເດ່ັນ ໃນການຄຸມທີມຊາດຮົງກົງຊຸດໃຫຍ່ ແລະ U-23  ຈົນໄດ້ຮັບສາຍາວ່າເປນ ‘‘ ກຸສ ຮິງດິງແຫ່ງ ຮົງກົງ ’’.

ນອກຈາກນີ້ ໃນປີ 2017 ຄິມ ພັນ ກອນ ຍັງກັບມາເຮັດຫນ້າທີ່ໃນບ້ານເກີດອີກເທື່ອຫນຶ່ງດ້ວຍການຮັບຕຳແຫນ່ງຄະນະກຳມະການພິເສດ ເພື່ອຄັດເລືອກຜູ້ຈັດການທີມທີມ ກ່ອນຈະມີສ່ວນສຳຄັນດຶງ ເປົາໂລ ເບນໂຕ ເຂົ້າມາຮັງານຄຸມທີມຊາດ ສ.ເກົາຫລີ ເພື່ອແທນທີ່ ຊິນ ແທ ຢອງ ຫລັງຈົບການແຂ່ງຂັນບານໂລກທີ່ຣັສເຊຍ.