ຊົວເຣສ ປະຕິເສດຂໍ້ສະເຫນີຫລາຍທີມ ເພື່ອຫວັງຮ່ວມງານກັບ ເຈີຣາດ ທີ່ວິລລາ

ເຄຣາດ ໂມເຣໂນ ນັກຂ່າວຊາວສະເປນ ລະບຸວ່າ ຫລຸຍ ຊົວເຣສ ຢາກມາຮ່ວມງານກັບ ສະຕີເວັນ ເຈີຣາດ ກັບ ສະໂມສອນ ແອສຕັນ ວິລລາ ຈົນບອກປະຕິເສດຂໍ້ສະເຫນີຈາກຫລາຍທີມໄປແລ້ວ ເຊັ່ນ 3 ທີມດັງຂອງບຣາຊິລ ເປັນຕົ້ນ.

ຫລຸຍ ຊົວເຣສ ກອງຫນ້າຄົນດັງຂອງ ແອດເລຕີໂກ ມາດຣິດ ຍອດສະໂມສອນແຫ່ງເວທີ ລາ ລີກາ ສະເປນ ປະຕິເສດຂໍ້ສະເຫນີຈາກຫລາຍທີມ ຈາກການທີລາວສົນໃຈຈະຍ້າຍໄປຢູ່ກັບ ແອສຕັນ ວິລລາ ເພື່ອທີ່ຈະໄດ້ຮ່ວມງານກັບ ສະຕີເວັນ ເຈີຣາດ ຜູ້ຈັດການທີມຂອງ ວິລລາ ຕາມການເປີດເຜີຍຂອງ ເຄຣາດ ໂມເຣໂນ ນັກຂ່າວຊາວສະເປນທີ່ມີຄວາມຫນ້າເຊື່ອຖືໃນລະດັບຫນຶ່ງ.

ຊົວເຣສ ຈະຫມົດສັນຍາກັບ ແອດ ມາດຣິດ ຫລົງຈົບລະດູການນີ້ ເຊິ່ງໄລຍະທີ່ຜ່ານມາກໍມີກະແສຂ່າວກ່ຽວກັບເລື່ອງທີ່ລາວກັບ ດີເອໂກ ຊິເມໂອເນ ຜູ້ຈັດການຂອງທີມ ຜິດໃຈກັນຢູ່ ເຖິງວ່າລະດູການກ່ອນ ທັງຄູ່ຈະຫາຮ່ວມແຮງຮ່ວມໃຈກັນນຳທີມຄວ້າແຊ໊ມລີກມາຄອງໄດ້ກໍຕາມ ຈົນເຮັດໃຫ້ເປັນທີ່ເຊື່ອກັນວ່ານັກເຕະ 34 ປີຈະບອກລາທີມໃນໄລຍະລະດູການນີ້.

ຈົນຫລ້າສຸດ ໂມເຣໂນ ກໍເປີດເຜີຍວ່າ ທີ່ຈິງ ຊົວເຣສ ໄດ້ຮັບຂໍ້ສະເຫນີຈາກ ພັລເມຣັັສ, ໂຄຣີນທຽນ ແລະ ອັດເລຕີໂກ ມິເນໂຣ 3 ທີມດັງໃນບຣາຊິລ ລວມເຖິງຈາກ 1 ທີມໃນ ຊາອຸດິອາຣະເບຍ ນຳອີກ ແຕ່ລາວກໍບອກປະຕິເສດໄປທັງຫມົດ ເພາະຫວັງທີ່ຈະໄດ້ໄປຮ່ວມງານກັບ ເຈີຣາດ ອີກຄັ້ງ ຫລັງຈາກທັງຄູ່ເຄີຍປະສານງານກັນໄດ້ດີໃນໄລຍະທີ່ຍັງຫລິ້ນໃຫ້ ລີເວີພູລ.