ໄລຍະ 5 ປີ ຜ່ານມາວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງຢູ່ແຕ່ລະຮາກຖານພັກ ທັງສູນກາງ ແລະ ທ້ອງຖິ່ນ ຍັງມີອັນໃດທີ່ເຫັນວ່າຍັງບໍ່ທັນເໝາະສົມ, ພົບຄວາມຫຍຸ້ງຍາກ
ວັນທີ 18-19 ມັງກອນ 2022 ກະຊວງການເງິນ, ໄດ້ຈັດຕັ້ງກອງປະຊຸມສະຫຼຸບຕີລາຄາສະພາບການຈັດຕັ້ງປະຕິບັດວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງຂອງຂະແໜງການເງິນ ໃນ 5 ປີ ຜ່ານມາ (2016-2020) ແລະ ທິດທາງແຜນການ 5 ປີ ໃນຕໍ່ໜ້າ (2021-2025) ໃນຮູບແບບທາງໄກ ໂດຍການເປັນປະທານຂອງທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນ, ມີບັນດາຮອງເລຂາພັກແຂວງ, ນະຄອນຫຼວງ, ຮອງລັດຖະມົນຕີ, ຫົວໜ້າກົມ, ຮອງກົມ ແລະ ຜູ້ຕາງໜ້າຈາກຂະແໜງການທີ່ກ່ຽວຂ້ອງເຂົ້າຮ່ວມ.
ກອງປະຊຸມຄັ້ງນີ້, ໄດ້ຮັບຟັງການເຜີຍແຜ່ແນະນຳກ່ຽວກັບບາງເນື້ອໃນຄຳສັ່ງ ຂອງຄະນະເລຂາທິການສູນກາງພັກ ເລກທີ 190/ຄລສພ ວ່າດ້ວຍການປັບປຸງກົງຈັກການຈັດຕັ້ງ ຂອງບັນດາກະ ຊວງ-ອົງການ ແລະ ທ້ອງຖິ່ນ; ມະຕິຂອງຄະນະບໍລິຫານງານສູນກາງພັກ ເລກທີ 04/ຄບສພ ວ່າດ້ວຍການເພີ່ມທະວີການນຳພາຂອງພັກ ເພື່ອສ້າງການຫັນປ່ຽນຢ່າງແຂງແຮງ ແລະ ເລິກເຊິ່ງ ວຽກງານພະນັກງານ, ພ້ອມກັນນັ້ນ ຍັງໄດ້ຮັບຟັງ ຜົນການສະຫລຸບຕີລາຄາຄືນ ດ້ານດີທີ່ຕັ້ງໜ້າ ແລະ ຜົນສຳເລັດ, ດ້ານອ່ອນ, ຂໍ້ຄົງຄ້າງ ໃນການນໍາພາຈັດຕັ້ງປະຕິບັດ ວຽກງານຈັດຕັ້ງ, ກໍ່ສ້າງພັກ-ພະ ນັກງານ ແລະ ປັບປຸງກົງຈັກການຈັດຕັ້ງ ຂອງຂະແໜງການເງິນ ໃນໄລຍະ5 ປີ ຜ່ານມາ (2016-2020) ແລະ ກຳນົດທິດທິດທາງແຜນການ 5 ປີຕໍ່ໜ້າ (2021-2025), ນອກຈາກນັ້ນ ຍັງຈະໄດ້ຮັບຟັງການເຜີຍແຜ່ບາງນິຕິກໍາ ທີ່ຕິດພັນກັບວຽກງານພະນັກງານ ຂອງຂະແໜງການເງິນຈຳນວນໜຶ່ງ, ພາຍຫລັງຮັບຟັງການລາຍງານ ແລະ ເຜີຍແຜ່ແລ້ວ ບັນດາຜູ້ເຂົ້າຮ່ວມ ໄດ້ພ້ອມກັນຄົ້ນຄວ້າປະກອບຄຳຄິດຄຳເຫັນ ຕໍ່ບົດສະຫລຸບຕີລາຄາດັ່ງກ່າວ, ເພື່ອຊອກຫາມາດຕະການ ແລະ ວິທີການແກ້ໄຂວຽກງານໃນຕໍ່ໜ້າໃຫ້ເໝາະສົມ ແລະ ສອດຄ່ອງກັບສະພາບຄວາມເປັນຈິງ ໃນຂະແໜງການເງິນໃຫ້ມີການຫັນປ່ຽນຢ່າງຕັ້ງໜ້າ ແລະ ຈັດຕັ້ງປະຕິບັດໃຫ້ມີປະສິດທິຜົນສູງຂຶ້ນກວ່າເກົ່າ.
ໂອກາດດັ່ງກ່າວ, ທ່ານ ບຸນໂຈມ ອຸບົນປະເສີດ ໄດ້ສະເໜີໃຫ້ກອງປະຊຸມພ້ອມກັນຕີລາຄາສະພາບການຈັດຕັ້ງປະຕິບັດວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງຢູ່ແຕ່ລະຮາກຖານພັກ ທັງສູນກາງ ແລະ ທ້ອງຖິ່ນ ຍັງມີອັນໃດທີ່ເຫັນວ່າຍັງບໍ່ທັນເໝາະສົມ, ພົບຄວາມຫຍຸ້ງຍາກ ເປັນຕົ້ນແມ່ນ ການແບ່ງຂັ້ນຄຸ້ມຄອງ, ຂອດການປະສານງານ ລະຫວ່າງສູນກາງ-ທ້ອງຖິ່ນ, ລະຫວ່າງ ສາຍຕັ້ງ-ສາຍຂວາງ ມີຄວາມກົມກຽວເຊື່ອມຈອດແລ້ວບໍ່, ລວມທັງບັນດານິຕິກໍາຕ່າງໆທີ່ກ່ຽວຂ້ອງໄດ້ຮັບການຈັດຕັ້ງປະຕິບັດຢ່າງເຂັ້ມງວດແລ້ວບໍ່, ການປັບປຸງກົງຈັກການຈັດຕັ້ງຢູ່ແຕ່ລະບ່ອນມີຄວາມຫຍຸ້ງຍາກແນວໃດ, ການສອບເສັງຄັດເລືອກລັດຖະກອນໃໝ່ເໝາະສົມແລ້ວບໍ່, ການຂຽນກຳນົດຕຳ ແໜ່ງງານ, ການສັບຊ້ອນຈັດວາງພະນັກງານ ໃສ່ແຕ່ລະຕຳແໜ່ງງານໄປຕາມທິດກະທັດຮັດ ສົມເຫດສົມຜົນແນວໃດ ແລະ ອື່ນໆ ຊຶ່ງຕ້ອງໄດ້ຕີລາຄາຢ່າງມີຄວາມຮັບຜິດຊອບສູງ ແລະ ຕ້ອງກ້າສະເໜີວິທີການແກ້ໄຂຢ່າງເດັດຂາດ, ພ້ອມທັງ ໃຫ້ເປັນເຈົ້າການປະກອບຄໍາເຫັນໃຫ້ເລິກເຊິ່ງ, ກົງໄປກົງມາ ເຮັດໃຫ້ເນື້ອໃນຂອງກອງປະຊຸມໃນຄັ້ງນີ້, ມີຄວາມກະຈ່າງແຈ້ງ, ຮັດກຸມ, ຄົບຖ້ວນ ແລະ ມີຄວາມເປັນເອກະພາບສູງ ຕໍ່ກັບບັນຫາຕ່າງໆ ບົນພື້ນຖານລະບຽບກົດໝາຍ, ຫລີກເວັ້ນການປະກອບຄໍາເຫັນທີ່ມີລັກສະນະລວມໆ ຫລື ສະເໜີຂໍ້ຂັດຂ້ອງໝອງໃຈທີ່ບໍ່ມີວິທີການແກ້ໄຂ, ອັນສໍາຄັນຕ້ອງປະກອບ ຄໍາເຫັນຢ່າງເລິກເຊິ່ງ ໃສ່ບັນຫາຕ່າງໆທີ່ຈະຕ້ອງໄດ້ສືບຕໍ່ປັບປຸງແກ້ໄຂໃນຕໍ່ໜ້າ ແລະ ທິດທາງ ໃນໄລຍະຍາວ ໃນວຽກພະນັກງານ, ວຽກປັບປຸງກໍ່ສ້າງພັກໃຫ້ປອດໃສ, ເຂັ້ມແຂງ, ໜັກແໜ້ນ ແລະ ການປັບປຸງກົງຈັກການຈັດຕັ້ງຕາມທິດກະທັດຮັດ, ໂປ່ງໃສ, ເຂັ້ມແຂງ, ມີປະສິດທິພາບ,ປະສິດທິຜົນສູງຂຶ້ນແຕ່ລະບັນຫານັ້ນຕ້ອງໃຫ້ຈະແຈ້ງ ແລະ ສາມາດນຳໄປຈັດຕັ້ງປະຕິບັດໄດ້ຢ່າງມີປະສິດທິຜົນ.
