ຈັບໄດ້ໄລ່ທັນ ໃນຂະນະລັກສາຍໄຟຢູ່ສະຖານີລົດໄຟ ລາວ-ຈີນ ຈຸດດົງໂພສີ

ປ້ອງກັນຄວາມສະຫງົບເມືອງຫາດຊາຍຟອງນະຄອນຫລວງວຽງຈັນ ລາຍງານໂດຍອ້າງຕາມການເປີດ ເຜີຍຂອງພັນໂທ ທັດສະພົງ ຫວັນມະນີຈັນ ຮອງຫົວໜ້າກອງບັນຊາການ ປກສ ເມືອງຫາດຊາຍຟອງ ໃນວັນທີ 18 ມັງກອນນີ້ວ່າ: ແຕ່ວັນທີ 6 ມັງກອນ 2022 ເປັນຕົ້ນມາມີຄົນຮ້າຍເຂົ້າໄປລັກຕັດສາຍໄຟຢູ່ສະຖານີລົດໄຟລາວ-ຈີນ ບ້ານດົງໂພສີເມືອງຫາດຊາຍຟອງ ນະຄອນຫຼວງວຽງຈັນ ຫຼາຍເທື່ອສ້າງຄວາມເສຍຫາຍຄິດເປັນເງິນເຖິງ 83.426.000 ກີບ ຊຶ່ງຫລ້າສຸດເວລາ 23:00 ໂມງວັນທີ 15 ມັງກອນ 2022 ເວລາ, ພະນັກງານບໍລິສັດຮັກສາຄວາມປອດໄພສະຖານີລົດໄຟລາວ-ຈີນຈຸດບ້ານດົງໂພສີ ສາມາດຈັບຄົນຮ້າຍໄດ້ 1 ຄົນ ຊື່ທ້າວ ວັງ ອາຍຸ 25 ປີ ກໍາມະກອນຢູ່ບ້ານຂັນເທີງ ເມືອງນໍ້າບາກ ແຂວງຫຼວງພະບາງ ພັກເຊົາຢູ່ບ້ານດົງໂພສີ ເມືອງຫາດຊາຍຟອງ ນະຄອນຫຼວງວຽງຈັນ ຂະນະທີ່ຜູ້ກ່ຽວພວມຈະເຂົ້າໄປລັກຕັດສາຍໄຟຟ້າເພື່ອເອົາທອງ ແລະ ຫລັງຈັບຄົນຮ້າຍໄດ້ ກໍໄດ້ມອບໃຫ້ເຈົ້າໜ້າທີ່ຕຳຫຼວດລົດໄຟລາວ-ຈີນ ປ ກສ ເມືອງຫາດຊາຍຟອງ ແລະ ໜ່ວຍງານສືບສວນ-ສອບສວນຄະດີອາຍາ-ເສດຖະກິດ. ນອກນີ້ເຈົ້າໜ້າທີ່ສາມາດຢຶດຂອງກາງ ເຊັ່ນອຸປະກອນຕັດສາຍໄຟ ແລະ ເຄື່ອງຢາມກະແສໄຟຟ້າ.

ຜ່ານການສືບສວນ-ສອບສວນ ຂະຫຍາຍຜົນ ສາມາດຈັບຜູ້ຮ່ວມຂະບວນການໄດ້ອີກ 4 ຄົນຄື ທ້າວ ມີ ອາຍຸ 38 ປີ ກຳມະກອນຢູ່ບ້ານນໍ້າລິດ ເມືອງປາກລາຍ ແຂວງ ໄຊຍະບູລີ, ທ້າວ ມາເລ (ໄມ) ອາຍຸ 29 ປີ ກຳມະກອນ ຢູ່ບ້ານປຸງທາງ ເມືອງຊໍາໃຕ້ ແຂວງຫົວພັນ, ທ້າວ ສີງ ອາຍຸ 28 ປີ ກຳມະກອນຢູ່ບ້ານເມືອງວັນ ເມືອງແອດແຂວງຫົວພັນ ແລະ ທ້າວ ພຸດທະສັກ (ຕອຍ) ອາຍຸ 31 ປີ ກຳມະກອນຢູ່ບ້ານທ່າ ນາແລ້ງ ເມືອງຫາດຊາຍຟອງນະຄອນຫຼວງວຽງຈັນ ຊຶ່ງທັງ 4 ຄົນພັກເຊົາຢູ່ບ້ານດົງໂພສີເມືອງຫາດຊາຍຟອງ ນະຄອນຫຼວງວຽງຈັນ.

ລະຫວ່າງສືບສວນ-ສອບສວນ, ພວກກ່ຽວສາລະພາບໃນເບື້ອງຕົ້ນວ່າ: ໄດ້ມາເຮັດວຽກເປັນກຳມະກອນກໍ່ ສ້າງຢູ່ສະຖານີລົດໄຟດັ່ງກ່າວ. ຂະນະທີ່ພັກເຊົາຢູ່ແຄັມກໍ່ສ້າງເຂດໃກ້ຄຽງນັ້ນໄດ້ພາກັນເຂົ້າໄປລັກຕັດສາຍ ໄຟຟ້າແຮງສູງເພື່ອປອກເອົາທອງຢູ່ສະຖານີລົດໄຟລາວ-ຈີນ ຈຸດບ້ານດົງໂພສີ 9 ເທື່ອ ແລ້ວນຳໄປຂາຍໃຫ້ຮ້ານຮັບຊື້ເຫຼັກເສດເປັນກິໂລ, ເມື່ຶອໄດ້ເງິນມາກໍເອົາໄປຊື້ຢາບ້າມາເສບ ແລະ ຫຼິ້ນເກມຈົນເງິນໝົດ.