ກາເຟລາວ ມີຄຸນນະພາບສາມາດສະໜອງຄວາມຕ້ອງການໄດ້ຫລາຍຂຶ້ນ ແຕ່ພື້ນທີ່ປູກຫລຸດລົງ

ທ່ານ ສີໜຸກ ສີສົມບັດ ປະທານທີ່ປຶກສາສະມາຄົມກາເຟລາວ ໄດ້ໃຫ້ສຳພາດຕໍ່ສື່ມວນຊົນລາວເມື່ອບໍ່ດົນມານີ້ວ່າ: ປັດຈຸບັນກາເຟລາວມີຄຸນນະພາບດີ, ຕະຫລາດກໍຕ້ອງການຫລາຍຂຶ້ນ ແລະ ສັງຄົມກໍສົນໃຈນັບມື້ເພີ່ມຂຶ້ນໂດຍເຫັນໄດ້ໃນປີ 2021 ຜ່ານມາໄດ້ສົ່ງອອກກາເຟ 30 ພັນໂຕນ. ແນວໃດກໍດີສຳລັບປີ 2022 ການສົ່ງອອກກາເຟຫລຸດລົງເຫລືອ 20 ພັນໂຕນເນື່ອງຈາກຕະຫລາດກາເຟໃນໂລກປ່ຽນແປງຫລາຍ, ຜົນ ຜະລິດຂອງກາເຟລາວກໍຫລຸດລົງ, ເນື້ອທີ່ປູກກາເຟໜ້ອຍລົງ ເຊິ່ງຜູ້ປູກກາເຟ ໄດ້ຫັນໄປປູກພືດຊະນິດອື່ນທົດແທນເປັນຕົ້ນມັນຕົ້ນ ແລະ ຢາງພາລາ ເຮັດໃຫ້ການຜະລິດການເຟໃນປະເທດຫລຸດລົງ.

ທ່ານ ສີໜຸກ ບອກອີກວ່າ: ປັດຈຸບັນພວກເຮົາມີທ່າແຮງດ້ານການຂົນສົ່ງໂດຍສະເພາະພາຍຫລັງມີເສັ້ນທາງລົງໄຟລາວ-ຈີນ ຊຶ່ງເປັນຜົນດີຕໍ່ການສົ່ງອອກກາເຟລາວໄປບັນດາປະເທດອ້ອມຂ້າງ. ຂະນະດຽວກັນ ສະມາຄົມກາເຟລາວ ພວກເຮົາກໍໄດ້ເລີ່ມສົ່ງອອກກາເຟໄປຈີນແລ້ວໂດຍຜ່ານລົດໄຟລາວ-ຈີນ. ຈາກຈຸດແຂງດ້ານນີ້ກໍພວມຊຸກຍູ້ສົ່ງເສີມການປູກກາເຟໃຫ້ຫລາຍຂຶ້ນ ໂດຍຈະສຶກສາຄວາມເປັນໄປໄດ້ຂະຫຍາຍເນື້ອທີ່ປູກກາເຟຢູ່ເຂດອາກາດໜາວທາງພາກເໜືອຂອງລາວເພື່ອສາມາດສະໜອງພຽງພໍຄວາມຕ້ອງການຂອງຕະຫລາດກາເຟ.