ແຈ້ງການ ໃຫ້ຢຸດຕິ ການອອກອະນຸຍາດ ເຄື່ອນຍ້າຍຖ່ານດໍາ ເພື່ອສົ່ງອອກຕ່າງປະເທດ, ເລກທີ 0117/ກປ, ລົງວັນທີ 17 ມັງກອນ 2022

ວັນທີ 17 ມັງກອນ 2022 ຜ່ານມານີ້ ກະຊວງກະສິກໍາ ແລະ ປ່າໄມ້ ອອກແຈ້ງການເລກທີ 0117/ກປ ເລື່ອງ ໃຫ້ຢຸດການອອກອະນຸຍາດເຄື່ອນຍ້າຍຖ່ານດໍາເພື່ອສົ່ງອອກຕ່າງປະເທດ ມີເນື້ອໃນດັ່ງນີ້:
ໃນໄລຍະຜ່ານມາ, ມີຫລາຍທ້ອງຖິ່ນໄດ້ອອກອະນຸຍາດ ເຄື່ອນຍ້າຍຖ່ານດໍາຊຶ່ງອ້າງວ່າແມ່ນຖ່ານດໍາທີ່ຜະລິດຈາກໄມ້ປູກ ເປັນຂະບວນການ ແລະ ມີຈໍານວນຫລວງຫລາຍ ເພື່ອສົ່ງອອກໄປຕ່າງປະເທດ ໂດຍຜ່ານຈຸດຕ່າງໆ ເຊັ່ນ: ສະຖານີລົດໄຟ, ດ່ານສາກົນ ແລະ ດ່ານປະເພນີ ອື່ນໆ.

ຜ່ານການກວດກາຕົວຈິ ເຫັນວ່າ ມີການສວຍໂອກາດເກັບຊື້ຖ່ານດໍາ ທີ່ຜະລິດຈາກໄມ້ທໍາມະຊາດ, ຈາກເຕົາເຜົາຖ່ານ ທີ່ບໍ່ໄດ້ຮັບອະນຸຍາດສ້າງຕັ້ງປະປົນໄປນໍາເປັນຈໍານວນຫລວງຫລາຍ ຊຶ່ງເປັນການທໍາລາຍປ່າໄມ້ທໍາມະຊາດຢ່າງໜັກໜ່ວງ ແລະ ເປັນການລະເມີດ ກົດໝາຍວ່າດ້ວຍປ່າໄມ້ ສະບັບເລກທີ 64/ສພຊ, ລົງວັນທີ 13 ມິຖຸນາ 2019 ໃນມາດຕາ 95, 96 ແລະ 98 ແລະ ຂັດກັບ ຄໍາສັ່ງຂອງນາຍົກລັດຖະມົນຕີ ສະບັບເລກທີ 15/ນຍ, ລົງວັນທີ 13 ພຶດສະພາ 2016 (ຂໍ້ທີ 8), ຂໍ້ຕົກລົງ ຂອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ສະບັບເລກທີ 0851/ອຄ, ລົງວັນທີ 14 ກັນຍາ 2021,
ຄໍາແນະນໍາ ຂອງລັດຖະມົນຕີ ກະຊວງກະສິກໍາ ແລະ ປ່າໄມ້ ສະບັບເລກທີ 0054/ກປ, ລົງວັນທີ 09 ມິຖຸນາ 2016 (ຂໍ້ທີ 5.6), ແຈ້ງການ ສະບັບເລກທີ 0073/ກປ, ລົງວັນທີ 3 ພະຈິກ 2006 (ຂໍ້ທີ 6 ແລະ 7) ແລະ ລະບຽບການອື່ນໆທີ່ ກ່ຽວຂ້ອງ. ສະນັ້ນ, ເພື່ອເປັນການແກ້ໄຂ ປະກົດການຫຍໍ້ທໍ້ ດັ່ງກ່າວ, ກະຊວງກະສິກໍາ ແລະ ປ່າໄມ້ ຈຶ່ງແຈ້ງມາຍັງທ່ານ ປະຕິບັດດັ່ງນີ້:

1. ໃຫ້ຢຸດການອອກອະນຸຍາດເຄື່ອນຍ້າຍຖ່ານດໍາເພື່ອສົ່ງອອກໄປຕ່າງປະເທດ ຢ່າງເດັດຂາດ;

2. ໃຫ້ດໍາເນີນການກວດກາ ແລະ ຂຶ້ນບັນຊີໂຮງງານຜະລິດຖ່ານ, ເຕົາເຜົາຖ່ານໃນຂອບເຂດແຂວງຂອງຕົນ.

ຖ້າມີການອະນຸຍາດສ້າງຕັ້ງ ແລະ ດໍາເນີນກິດຈະການ ແຕ່ບໍ່ມີແຫຼ່ງທີ່ມາຂອງວັດຖຸດິບທີ່ຈະແຈ້ງ ແລະ ຖືກຕ້ອງຕາມ ລະບຽບກົດໝາຍ ແມ່ນໃຫ້ໂຈະການຜະລິດ, ສໍາລັບໂຮງງານຜະລິດຖ່ານ, ເຕົາເຜົາຖ່ານ ທີ່ບໍ່ໄດ້ຮັບອະນຸຍາດສ້າງຕັ້ງ ແລະ ດໍາເນີນກິດຈະການ ແມ່ນໃຫ້ຍຸບເລີກ ພ້ອມທັງດໍາເນີນຄະດີ ຕາມກົດໝາຍ;

3. ສໍາລັບຖ່ານຂາວທີ່ຜະລິດຈາກໄມ້ຕິ້ວ, ຖ່ານອັດແທ່ງ ຫລື ອັດເມັດຈາກຂີ້ເລື່ອຍ ແມ່ນສາມາດສົ່ງອອກໄດ້ ໂດຍປະຕິບັດໃຫ້ສອດຄ່ອງກັບຂໍ້ຕົກລົງ ສະບັບເລກທີ 0851/ອຄ, ລົງວັນ ທີ 14 ກັນຍາ 2021 (ມາດຕາ 1 ເອກະສານ ຊ້ອນທ້າຍ II, ຂໍ້ທີ 2.1 ແລະ 2.2) ບົນພື້ນຖານ ວັດຖຸດິບ (ໄມ້) ທີ່ນໍາມາຜະລິດຖ່ານ ຕ້ອງໄດ້ຮັບອະນຸຍາດຕົວເລກແຜນການຂຸດຄົ້ນຈາກລັດຖະບານ.

ພ້ອມດຽວກັນນັ້ນ, ຜູ້ປະກອບການ ຫລື ບໍລິສັດທີ່ດໍາເນີນທຸລະກິດຜະລິດ ແລະ ສົ່ງອອກຖ່ານຂາວ ຕ້ອງໄດ້ຮັບອະນຸຍາດສ້າງຕັ້ງ, ຈົດທະບຽນຖືກຕ້ອງຕາມລະບຽບກົດໝາຍ ແລະ ຕ້ອງມີ ແຜນຊຸກຍູ້ ແລະ ສົ່ງເສີມການປູກໄມ້ຕິ້ວ ເພື່ອໜອງໃຫ້ແກ່ການຜະລິດຂອງຕົນຢ່າງຕໍ່ເນື່ອງລວມທັງມີການຄຸ້ມ ຄອງແຫລ່ງວັດຖຸດິບ ແລະ ການຄຸ້ມຄອງການສົ່ງອອກ ເພື່ອຫຼີກລ່ຽງບໍ່ໃຫ້ມີການສວຍໂອກາດດໍາເນີນວຽກງານດັ່ງກ່າວ ທີ່ບໍ່ສອດຄ່ອງກັບລະບຽບກົດຫມາຍ ທີ່ໄດ້ກໍານົດໄວ້.

4. ມອບໃຫ້ກົມກວດກາປ່າໄມ້ ແລະ ກົມປ່າໄມ້ ສົມທົບກັບ ພາກສ່ວນທີ່ກ່ຽວຂ້ອງ ລົງຊຸກຍູ້, ຕິດຕາມ ການຈັດຕັ້ງ ປະຕິບັດແຈ້ງການສະບັບນີ້ ຢ່າງເຂັ້ມງວດ.
ດັ່ງນັ້ນ, ຈຶ່ງແຈ້ງມາຍັງທ່ານ ເພື່ອຊາບ ແລະ ຈັດຕັ້ງປະຕິບັດ ຕາມເນື້ອໃນແຈ້ງການສະບັບນີ້ດ້ວຍ.