ຣັດເຊຍຕຳໜິອາເມລິກາທີ່ປະນາມ ປະເທດຕົນ ແລະ ຈີນໃນບັນຫາແຫລມເກົາຫລີ
ເວັບໄຊກະຊວງການຕ່າງປະເທດຣັດເຊຍອອກຖະແຫຼງການໃນວັນທີ 31 ກໍລະກົດຜ່ານມາວ່າ: ອາເມລິກາ ແລະ ປະເທດອື່ນໆໄດ້ຖິ້ມໂທດໃສ່ປະເທດຕົນ ແລະ ຈີນ ໃນກໍລະນີ ສປປ ເກົາຫຼີ ທົດລອງຍິງລູກສອນໄຟໃນມໍ່ໆນີ້ ທັງໆທີ່ການກະທຳດັ່ງກ່າວບໍ່ມີເຫດຜົນແຕ່ຢ່າງໃດ.
ຖະແຫຼງການລະບຸວ່າ: ນັບແຕ່ ສປປ ເກົາຫຼີ ລະເມີດມະຕິທີ່ກ່ຽວຂ້ອງຂອງສະພາຄວາມໝັ້ນຄົງ ແລະ ຍິງລູກສອນໄຟໃນວັນທີ 28 ກໍລະກົດຜ່ານມາ, ປະເທດຕົນກໍເປັນຫ່ວງຕໍ່ສະຖານະການແຫຼມເກົາຫຼີທີ່ສຸດ. ຂະນະດຽວກັນ, ອາເມລິກາ, ສ.ເກົາຫຼີ ແລະ ຍີ່ປຸ່ນ ພວມເພີ່ມທະວີການເຄື່ອນໄຫວການທະຫານຢູ່ພາກພື້ນດັ່ງກ່າວ ແລະ ອາເມລິກາກໍໄດ້ຊຸກຍູ້ການຕິດຕັ້ງລະບົບຕ້ານລູກສອນໄຟ “ທັດ” ຢູ່ ສ.ເກົາຫຼີ ຕື່ມອີກ. ສະນັ້ນ, ປະເທດຕົນຈຶ່ງຮຽກຮ້ອງໃຫ້ບັນດາຝ່າຍທີ່ກ່ຽວຂ້ອງກັບບັນ ຫາແຫຼມເກົາຫຼີຈະຮັກສາຄວາມອົດທົນ, ຢ່າມີການກະທຳໃດໆທີ່ຈະສືບຕໍ່ເຮັດໃຫ້ສະຖານະການເຄັ່ງຕຶງຂຶ້ນ.
ພາຍຫຼັງ ສປປ ເກົາຫຼີ ໄດ້ລະເມີດມະຕິທີ່ກ່ຽວຂ້ອງຂອງສະພາຄວາມໝັ້ນຄົງອົງການສະຫະປະຊາຊາດ ແລະ ທົດລອງຍິງລູກ ສອນໄຟຂ້າມທະວີບໃນວັນທີ 28 ກໍລະກົດຜ່ານມາ, ສື່ມວນຊົນກໍລາຍງານວ່າ: ທ່ານ ເຣັກສ໌ ຕີເລີຊັນ ລັດຖະມົນຕີກະຊວງການຕ່າງປະເທດອາເມລິກາ ໄດ້ອອກຖະແຫຼງການ ໂດຍໃຫ້ຣັດເຊຍ ແລະ ຈີນຮັບຜິດຊອບໃນເລື່ອງນີ້.
