ປກສ ເມືອງສີໂຄດຕະບອງ ສຶກສາອົບຮົມກຸ່ມມົ້ວສຸມຢາເສບຕິດ 11 ຄົນ ໃຫ້ກັບຕົວເປັນພົນລະເມືອງດີ

ປກສ ກຸ່ມໜອງດ້ວງ ສົມທົບກັບອໍານາດການປົກຄອງບ້ານດົງນາໂຊກໃຕ້ ເມືອງສີໂຄດຕະບອງ ນະຄອນຫລວງວຽງຈັນ ໄດ້ຮຽກຕົວຜູ້ພົວພັນ ແລະ ຜູ້ເຄາະຮ້າຍຈາກຢາເສບຕິດ 11 ຄົນ, ຍິງ 3 ຄົນ ມາສຶກສາອົບຮົມ ຢູ່ວັດຈອມໄຕ ເມືອງສີໂຄດຕະບອງ ໃນວັນທີ 12 ມັງກອນ 2022,  ເພື່ອໃຫ້ປ່ຽນແປງພຶດຕິກໍາ ໃຫ້ກັບຕົວກັບໃຈ ເປັນພົນລະເມືອງດີຂອງສັງຄົມ.

ການສຶກສາອົບຮົມຄັ້ງນີ້ ໄດ້ຍົກໃຫ້ເຫັນຜົນຮ້າຍ ແລະ ໄພອັນຕະລາຍຂອງຢາເສບຕິດ ຕາມປະມວນກົດໝາຍ 146 ຂອງກົດໝາຍອາຍາ ແລະ ມາດຕາ 75-76 ຂອງກົດໝາຍວ່າດ້ວຍຢາເສບຕິດ ເຊິ່ງໄດ້ກໍານົດໄວ້ວ່າ: ເສບຄັ້ງທີໜຶ່ງ: ຈະຖືກຕໍາໜິວິຈານຕໍ່ໜ້າມະຫາຊົນ ແລະ ຈະຖືກປັບໃໝແຕ່ 100.000 ກີບ ຫາ 300.000 ກີບ; ເສບຄັ້ງທີສອງ: ຈະຖືກລົງໂທດຕັດອິດສະລະພາບແຕ່ 3 ເດືອນ ຫາ 1 ປີ ແລະ ຈະຖືກປັບໃໝແຕ່ 300.000 ກີບ ຫາ 500.000 ກີບ; ເສບຄັ້ງທີສາມ ຂຶ້ນໄປ ຈະຖືກລົງໂທດຕັດອິດສະລະພາບ ແຕ່ 1 ປີ ຫາ 3 ປີ ແລະ ຈະຖືກປັບໃໝ ແຕ່ 500.000 ກີບ ຫາ 5.000.000 ກີບ.