ແມນຊິຕີ ແຊງ ແມນຢູ ເປັນຄັ້ງທຳອິດທີ່ມີລາຍໄດ້ຫລາຍກວ່າ ໃນລະດູການທີ່ຜ່ານມາ
KPMG Football Beenchmark ເປີດເຜີຍຂໍ້ມູນຈາກການວິເຄາະຜົນປະກອບການຂອງທີມແຊ໊ມໃນ 8 ລີກໃຫຍ່ຂອງ ຢູໂຣບ ປະກອບດ້ວຍ ອັງກິດ, ສະເປນ, ເຢຍລະມັນ, ອີຕາລີ, ຝຣັ່ງ, ເນເທີແລນ, ຕວກກີ ແລະ ໂປຣຕຸເກສ ໃນລະດູການ 2020-21 ນັບຕັ້ງແຕ່ວັນທີ 1 ກໍລະກົດ ປີ 2020 ຈົນເຖິງ 30 ມິຖຸນາ ປີ 2021.
ຜົນປາກົດວ່າ ບາເຢິນ ມິວນິກ ທີມແຊ໊ມບຸນເດສລີກາ ເຢຍລະມັນ ເປັນພຽງທີມດຽວໃນບັນດາແຊ໊ມຈາກ 8 ລີກໃຫຍ່ຂອງຢູຣົບ ທີ່ມີກຳໄລຫລັງຫັກພາສາຈາກລະດູການຫລ້າສຸດ ດ້ວຍຕົວເລກພຽງ 1.8 ລ້ານຢູໂຣ ເນື່ອງຈາກສະຖານະການໂຄວິດ-19 ທີ່ເຮັດໃຫ້ເກືອບທຸກສະໂມສອນຕ້ອງຂາດລາຍໄດ້ມະຫາສານ ຈາກການແຂ່ງຂັນແບບປິດ ບໍ່ມີແຟນບານເຂົ້າສະຫນາມເກືອບຫມົດລະດູການ.
ຂະນະທີ່ ແມນເຊສເຕີ ຊິຕີ ທີມແຊ໊ມ ພຣີເມຍລີກ ອັງກິດ ມີລາຍໄດ້ເຂົ້າສະໂມສອນ 569,8 ລ້ານປອນ ໃນລະດູການ 2020-21 ຫລາຍທີ່ສຸດໃນບັນດາທີມແຊ໊ມທັງ 8 ລີກໃຫຍ່ຂອງຢູໂຣບ ເຊັ່ນ : ບາເຢິນ ມິວນິກ ( ເຢຍລະມັນ ), ແອັດເລຕີໂກ ມາດຣິດ (ສະປນ), ອາແຈັກ (ຮອນແລນ), ສະອດຕິງ ລິສບອນ (ໂປຣຕຸເກສ), ລິລ (ຝຣັ່ງ), ອິນເຕີ ມິລານ (ອີຕາລີ) ແລະ ເບຊິກຕັສ (ຕຣຸກີ).
ນອກຈາກນີ້ ແມນ ຊິຕີ ຍັງສາມາດມີລາຍໄດ້ຫລາຍກວ່າ ແມນເຊສເຕີ ຢູໄນເຕັດ ຄູ່ປັບຮ່ວມເມືອງເປັນຄັ້ງທຳອິດ ໂດຍ ແມນຢູ ມີລາຍໄດ້ໃນລະດູການຜ່ານມາພຽງ 494,1 ລ້ານປອນ.
ສາເຫດທີ່ເຮັດໃຫ້ ແມນຊິຕີ ມີລາຍໄດ້ແຊງ ແມນຢູ ເນື່ອງຈາກເງິນລາງວັນຈາກການຜ່ານເຂົ້າເຖິງຮອບຊີງຊະນະເລີດ ຢູຟາ ແຊ໊ມປຽນລີກ ໄດ້ເປັນຄັ້ງທຳອິດຂອງສະໂມສອນ ແຕ່ກໍພາດທ່າເສຍໃຫ້ ເຊລຊີ 0-1 ລວມເຖິງການຄວ້າແຊ໊ມ ພຣີເມຍລີກ ອັງກິດ ສະໄຫມທີ 4 ພາຍໃຕ້ການຄຸມທີມຂອງ ເປບ ກວາດີໂອລາ ຜູ້ຈັດການທີມຊາວສະເປນ ແລະ ການເພີ່ມຂຶ້ນຂອງລາຍໄດ້ຈາກຄ່າລິຂະສິດຖ່າຍທອດສົດ.
ແນວໃດກໍຕາມ ແມນຊິຕີ ກໍຂາດທຶນເຖິງ 126 ລ້ານປອນໃນລະດູການຜ່ານມາ ສ່ວນຍອດຕົວເລກຄ່າຈ້າງທີ່ຕ້ອງຈ່າຍໃຫ້ພະນັກງານໃນສະໂມສອນ ຈຳນວນ 509 ຄົນ ຢູ່ທີ່ 354 ລ້ານປອນ ເພີ່ມຂຶ້ນຈາກເກ່ົາ 3 ລ້ານປອນ.
ຂະນະດຽວກັນ ແມນຊິຕີ ຍັງເປັນສະໂມສອນບານເຕະທີ່ມີມູນຄ່ານັກເຕະໃນຕະຫລາດລວມກັນຫມົດທີມຫລາຍທີ່ສຸດໃນໂລກ ດ້ວຍຕົວເລກ 1,237 ລ້ານຢູໂຣ, ສ່ວນ ແມນຢູ ແລະ ເຊລຊີ ເປັນອີກພຽງ 2 ທີມທີ່ມີມູນຄ່ານັກເຕະລວມກັນເກີນ 1,000 ລ້ານຢູໂຣ.
