ຊາລາ ເປີດໃຈເລື່ອງສັນຍາສະບັບໃໝ່ກັບລິເວີພູລ
ເປີດໃຈໃຫ້ໝົດທຸກບັນຫາ! ໂມຮາເຫມັດ ຊາລາ ດາວເຕະຂອງ ລິເວີພູລ ເປີດເຜີຍວ່າລາວຢາກຢູ່ໃນຖິ່ນ ແອນຟິວຕໍ່ ຫຼືບໍ່ ແລະ ມັນເປັນຄວາມຈິງບໍ່ທີ່ລາວຂໍຄ່າຈ້າງຈຳນວນຫລາຍເພື່ອແລກກັບສັນຍາສະບັບໃໝ່.
ໂມຮາເໝັດ ຊາລາ ກອງໜ້າທີມຊາດອີຢິບ ຢືນຢັນວ່າລາວຢາກຢູ່ກັບ ລິເວີພູລ ຕໍ່ໄປແລະ ບໍ່ເຄີຍຂໍຄ່າຈ້າງອັນມະຫາສານແຕ່ຢ່າງໃດ. ພຽງແຕ່ຂໍໃຫ້ “ຫົງແດງ” ໃຫ້ສັນຍາໃຫມ່ທີ່ເຫມາະສົມກັບຄຸນຄ່າຂອງຕົນເອງເທົ່ານັ້ນ.
ດາວຍິງອາຍຸ 29 ປີມີສັນຍາກັບ ລີເວີພູລ ເຖິງປີ 2023 ແລະຍັງບໍ່ສາມາດຕົກລົງເລື່ອງສັນຍາສະບັບໃຫມ່ໄດ້. ທ່າມກາງຂ່າວວ່າຫຼາຍສະໂມສອນໃຫຍ່ໃນເອີຣົບເຊັ່ນ ເຣອັນ ມາດຣິດ ແລະ ປາຣີ ແຊັງ-ແຊັກແມັງ ຕ້ອງການດຶງຕົວໄປເສີມທັບ.
ນອກຈາກນີ້ ຍັງມີຂ່າວອອກມາອີກວ່າ ຊາລາ ຕ້ອງການຄ່າຈ້າງໃນສັນຍາສະບັບໃໝ່ສູງເຖິງ 500,000 ປອນ/ອາທິດ ຫຼັງຈາກລະດູການນີ້ຍັງສ້າງຜົນງນດີຕໍ່ເນື່ອງ ໂດຍຍິງໄປ 23 ປະຕູຈາກການລົງຫຼິ້ນ 26 ນັດໃນທຸກລາຍການ.
ແນວໃດກໍຕາມ, ຊາລາ ເປີດເຜີຍຜ່ານວາລະສານ GQ ຫຼັງຈາກຖ່າຍແບບຫນ້າປົກໃຫ້ກັບວາລະສານດັ່ງກ່າວ.
“ຂ້ອຍຕ້ອງການຢູ່ ແຕ່ມັນບໍ່ໄດ້ຢູ່ໃນມືຂອງຂ້ອຍ ມັນຢູ່ໃນມືຂອງສະໂມສອນ ພວກເຂົາຮູ້ວ່າຂ້ອຍຕ້ອງການຫຍັງ ຂ້ອຍບໍ່ເຄີຍຮ້ອງຂໍສິ່ງບ້າໆແບບນັ້ນເລີຍ.”
” ຂ້ອຍຢູ່ທີ່ນີ້ເປັນເວລາ 5 ປີແລ້ວ, ຂ້ອຍຮູ້ຈັກສະໂມສອນດີ, ຂ້ອຍຮັກແຟນບານ, ແຟນບານກໍຮັກຂ້ອຍຄືກັນ.”
“ຢ່າງໃດກໍຕາມ, ຝ່າຍບໍລິຫານຮັບຊາບສະຖານະການແລ້ວ ມັນຢູ່ໃນມືຂອງພວກເຂົາ.” ຊາລາ ທີ່ເວລານີ້ເດີນທາງກັບຄືນໄປປະເທດເອຢິບ ເພື່ອແຂ່ງຂັນໃນ Africa Cup of Nations ໃນ ແຄມເມີຣູນ ກ່າວປິດທ້າຍ.
