ລາວ-ຫວຽດນາມ ສາຍພົວພັນຕົວແບບ ບໍ່ມີວັນຈາງຫາຍ
ປີນີ້, ເປັນປີທີ່ລາວ-ຫວຽດນາມ ຈະສະເຫລີມສະຫລອງປີສາມັກຄີພິເສດຄື ວັນສ້າງຕັ້ງສາຍພົວພັນການທູດຄົບຮອບ 60 ປີ ແລະ ວັນເຊັນສົນທິສັນຍາມິດຕະພາບຄົບຮອບ 45 ປີ. ຂະນະທີ່ວັນທີ 8-10 ມັງ ກອນ 2022 ໂດຍຕອບສະໜອງຕາມຄຳເຊີນຂອງທ່ານ ຟ້າມ ມິງ ຈິງ ນາຍົກລັດຖະມົນຕີແຫ່ງສສຫວຽດ ນາມ, ທ່ານ ພັນຄຳ ວິພາວັນ ນາຍົກລັດຖະມົນຕີແຫ່ງ ສປປ ລາວ ພ້ອມຄະນະຜູ້ແທນຂັ້ນສູງໄດ້ເດີນ ທາງໄປຢ້ຽມຢາມຢ່າງເປັນທາງການເພື່ອຮັດແໜ້ນ ແລະເສີມຂະຫຍາຍສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງປະເທດ.
ກ່ອນເດີນທາງ, ສປປ ລາວ ກໍຄືຄະນະກຳມະການຮ່ວມມື ລາວ-ຫວຽດນາມ ໄດ້ຈັດກອງປະຊຸມສະຫລຸບ ຕີລາຄາການຈັດຕັ້ງຜັນຂະຫຍາຍການຮ່ວມມື-ການລົງທຶນ ລະຫວ່າງ 2 ປະເທດ ໄລຍະ1 ປີຜ່ານມາແລະ ທິດທາງແຜນການຮ່ວມມືປີ 2022 ໂດຍມີບັນດາກະຊວງ, ຂະແໜງການກ່ຽວຂ້ອງຂັ້ນສູນກາງ ແລະທ້ອງ ຖິ່ນເຂົ້າຮ່ວມກະກຽມເອກະສານຂອງຜູ້ແທນຝ່າຍລາວເພື່ອເປັນເອກະພາບກັນທັງເນື້ອໃນ ແລະ ແຜນການຮ່ວມມືສອງຝ່າຍ, ເປັນການກະກຽມໃຫ້ແກ່ກອງປະຊຸມຄັ້ງທີ 44 ຂອງຄະນະກຳມະການຮ່ວມມືທະວິພາຄີ ລະຫວ່າງ ລັດຖະບານສປປ ລາວ ແລະ ລັດຖະບານສສ ຫວຽດນາມ ປະຈຳປີ 2022 ທີ່ຈະຈັດຂຶ້ນຕົ້ນປີ 2022 ໃຫ້ໃດ້ຮັບປະສິດທິຜົນສູງສຸດ. ສາຍພົວພັນມິດຕະພາບ ແລະ ການຮ່ວມມືທີ່ເປັນມູນເຊື້ອລະຫວ່າງ 2 ປະເທດ ໄດ້ມີມາແຕ່ເຫິງນານ ໂດຍປະທານ ໂຮ່ຈີ່ມິງ ຜູ້ຍິ່ງໃຫຍ່, ປະທານ ໄກສອນ ພົມວິຫານ ແລະ ປະທານສຸພານຸວົງ ທີ່ແສນເຄົາລົບຮັກເປັນຜູ້ສ້າງຂຶ້ນ ຕັ້ງແຕ່ສະໄໝຕໍ່ສູ້ກູ້ຊາດ ຕ້ານສັດຕູໂຕດຽວກັນຈົນເຖິງວັນທີ່ສອງປະເທດ ໄດ້ຮັບການປົດປ່ອຍຢ່າງສົມບູນ.ສາຍພົວພັນລາວ-ຫວຽດ ນາມ ແມ່ນສາຍພົວພັນພິເສດ ບໍລິສຸດ ເປັນຄວາມຮັກແພງໃກ້ຊິດສະໜິດສະໜົມຫາສິ່ງປຽບບໍ່ໄດ້, ກາຍເປັນແບບຢ່າງທີ່ຫາຍາກ, ບົນພື້ນຖານຄວາມຮັກແພງ ແລະ ຈິງໃຈຊ່ວຍເຫລືອເຊິ່ງກັນ ແລະ ກັນກ້າວສູ່ລວງເລິກຍິ່ງຂຶ້ນ ແລະ ປະ ສົບຜົນສຳເລັດຫລາຍດ້ານ.
ຜ່ານມາ, ພັກ-ລັດຖະບານ ແລະ ປະຊາຊົນ ຫວຽດນາມອ້າຍນ້ອງ ໄດ້ຊ່ວຍເຫລືອອັນລ້ຳຄ່າ, ທັນການ ແລະ ມີປະສິດທິຜົນ ທັງການຊ່ວຍເຫລືອ ປົກກະຕິປະຈໍາປີ ກໍຄື ການຊ່ວຍເຫລືອໃນຍາມໄພພິບັດຕ່າງໆ ພິເສດແມ່ນການຮັບມືກັບພະຍາດໂຄວິດ-19 ຊຶ່ງ ສສ ຫວຽດນາມ ເປັນປະເທດທຳອິດ ທີ່ເຂົ້າມາຊ່ວຍ ເຫລືອ ສປປ ລາວ ອັນນີ້ສະແດງໃຫ້ເຫັນລັກສະນະພິເສດຂອງການພົວພັນຮ່ວມມື ລາວ-ຫວຽດນາມ ທີ່ໄດ້ກາຍເປັນປັດໄຈ ຊ່ວຍໜູນທີ່ສໍາຄັນໃຫ້ແກ່ການພັດທະນາປະເທດຊາດຂອງພວກເຮົາ. ປັດຈຸບັນ ຫວຽດ ນາມ ແມ່ນປະເທດຄູ່ຮ່ວມມືເສດຖະກິດ, ການລົງທຶນ, ການຄ້າໃຫຍ່ຂອງລາວ, ການຄ້າລະຫວ່າງລາວ-ຫວຽດນາມ ມີທ່າຂະຫຍາຍຕົວກ້າວກະໂດດ, ການລົງທຶນໂດຍກົງຈາກຕ່າງປະເທດ (FDI) ລະຫວ່າງ 2ປະເທດ ຂະຫຍາຍຕົວ ຊຶ່ງເປັນອັນດັບ 3 ທີ່ລົງທຶນຢູ່ລາວ ໂດຍມີ 2 ໂຄງການພົ້ນເດັ່ນຂອງວິສາຫະກິດຫວຽດນາມເປັນຕົ້ນໂຄງການເຂື່ອນໄຟຟ້າເຊຂະໝານ 1 ແລະ ເຊຂະໝານຊານໄຊ (ການກໍ່ສ້າງຂຶ້ນກັບໂຄງການຮ່ວມມືພະລັງງານລະຫວ່າງລັດຖະບານສອງປະເທດ) ນອກນີ້ກໍ່ມີການຮ່ວມມື ລະຫວ່າງປະເທດ ເຊັ່ນ: ໂຄງການພັດທະນາທ່າເຮືອຫວຸ້ງອ່າງ 1,2 ແລະ 3 ແລະ ຂໍ້ຕົກລົງຊື້-ຂາຍໄຟຟ້າທີ່ຈະເຮັດໃຫ້ສອງປະເທດ ໄດ້ຮັບຜົນປະໂຫຍດ.
ການນໍາຂັ້ນສູງທັງສອງພັກສອງລັດໄດ້ເພີ່ມທະວີການໄປມາຢ້ຽມກັນເປັນປະຈໍາ ໂດຍໃນວັນທີ 28-29 ມິຖຸນາ 2021 ຜ່ານມາ, ທ່ານ ທອງລຸນ ສີສຸລິດ ເລຂາທິການໃຫຍ່, ປະທານປະເທດແຫ່ງ ສປປ ລາວ ພ້ອມດ້ວຍພັນລະຍາ ແລະ ຄະນະຜູ້ແທນຂັ້ນສູງຂອງພັກ ແລະ ລັດ ແຫ່ງສປປ ລາວ ໄດ້ເດີນທາງໄປຢ້ຽມຢາມສັນຖະວະໄມຕີສາທາລະນະລັດ ສັງຄົມນິຍົມ ຫວຽດນາມຢ່າງເປັນທາງການ ເພື່ອເປັນການຮັດ ແໜ້ນ ແລະ ເສີມຂະຫຍາຍສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງປະເທດ. ໃນວັນທີ 9-10 ສິງຫາ 2021 ສະຫາຍ ຫງວຽນ ຊວັນ ຟຸກ ກໍາມະການກົມການເມືອງສູນກາງ ພັກກອມມູນິດຫວຽດນາມ, ປະທານປະເທດ ແຫ່ງ ສາທາລະນະລັດ ສັງຄົມນິຍົມ ຫວຽດນາມ ພ້ອມດ້ວຍພັນລະຍາ ແລະ ຄະນະຜູ້ແທນຂັ້ນສູງໄດ້ເດີນທາງມາຢ້ຽມຢາມສັນ ຖະວະໄມຕີ ຢ່າງເປັນທາງການ ສາທາລະນະລັດ ປະຊາທິປະໄຕ ປະຊາຊົນລາວໂດຍໄດ້ເຂົ້າຮ່ວມ ແລະ ກ່າວປາໄສຕໍ່ກອງປະຊຸມສະໄໝວິສາມັນເທື່ອທີ 1 ຂອງສະພາແຫ່ງຊາດລາວ. ຈາກນັ້ນ ສະຫາຍ ທອງລຸນ ສີສຸລິດ ໄດ້ຮ່ວມກັບສະຫາຍ ຫງວຽນ ຊວັນ ຟຸກ ເຂົ້າຮ່ວມພິທີເປີດນໍາໃຊ້ ແລະ ມອບຮັບຫໍສະພາແຫ່ງຊາດຢ່າງເປັນທາງການ. ຜ່ານການຢ້ຽມຢາມ ແລະ ເຮັດວຽກຂອງການນຳຂັ້ນສູງ ແລະ ຄະນະນຳທ້ອງຖິ່ນລາວ-ຫວຽດນາມ ເປັນການຢືນຢັນການສືບຕໍ່ເພີ່ມທະວີຍົກສູງສາຍພົວພັນມິດຕະພາບ, ຄວາມສາ ມັກຄີພິເສດ ແລະ ການຮ່ວມມືຮອບດ້ານລາວ-ຫວຽດນາມໃນສະພາບການໃໝ່ເໝາະສົມກັບສະພາບ ຂອງແຕ່ລະປະເທດ, ລັດຖະບານສອງປະເທດໄດ້ຊຸກຍູ້ສາຍພົວພັນຮ່ວມມືໂດຍກົງຮອບດ້ານ, ແຮກສ່ຽວແຕ່ຂັ້ນສູນກາງ ຮອດທ້ອງຖິ່ນໃຫ້ໄປຢ້ຽມຢາມກັນເປັນປົກກະຕິໃນທຸກຂົງເຂດ
ມິດຕະພາບອັນຍິ່ງໃຫຍ່, ສາຍພົວພັນພິເສດ ແລະ ການຮ່ວມມືຮອບດ້ານລະຫວ່າງພັກ-ລັດ ແລະ ປະ ຊາຊົນລາວ ກັບ ພັກ-ລັດ ແລະ ປະຊາຊົນຫວຽດນາມ ຄືສາຍພົວພັນຕົວແບບ ບໍ່ມີວັນຈາງຫາຍ ໃນການພົວພັນສາກົນ, ແມ່ນກໍາລັງແຮງ, ກົດເກນຄົງຕົວແມ່ນໜຶ່ງໃນບັນດາອົງປະກອບຕັດສິນທຸກໄຊຊະນະຂອງ ການປະຕິວັດແຕ່ລະປະເທດ.
