ເກີດເຫດຖັງອົກຊີລະເບີດໃນເຂດກໍ່ສ້າງເຂື່ອນນໍ້າງຽບ 1 ມີກໍາມະກອນເສຍຊີວິດ 6 ຄົນ
ຕາມການລາຍງານຂອງເວັບໄຊສໍານັກຂ່າວເອເອຟພີປະຈໍານະຄອນຫລວງຮ່າໂນ້ຍ ສສ.ຫວຽດນາມ ໃຫ້ຮູ້ວ່າ: ເວລາປະມານ 22:00 ໂມງຂອງວັນທີ 28 ກໍລະກົດຜ່ານມານີ້, ໄດ້ເກີດເຫດຖັງອົກຊີລະເບີດຢ່າງແຮງຢູ່ໃນເຂດກໍ່ສ້າງ
ເຮືອນຈັກຂອງໂຄງການກໍ່ສ້າງເຂື່ອນໄຟຟ້ານໍ້າງຽບ 1 ທີ່ບ້ານຫາດຍືນເມືອງບໍລິຄັນແຂວງບໍລິຄໍາໄຊ, ເຮັດໃຫ້ກໍາມະກອນເປັນຊາວຫວຽດນາມ 6 ຄົນເສຍຊີວິດ ຄື: ທ້າວ ເຈີນ ວັນຊາງ (TRAN VAN SANG) ອາຍຸ 28 ປີ, ທ້າວຫວງຽນວັນເຟື່ອງ (NGUYEN VAN PHUONG) ອາຍຸ 26 ປີ, ທ້າວ ຮາກາວກີ (HA CAO KY) ອາຍຸ 26 ປີ, ທ້າວ ຢາບາລົວ (GIA BA LUA) ອາຍຸ 32 ປີ, ທ້າວ ວາຊາຍກໍ (VA XAI CO) ອາຍຸ 31 ປີຢູ່ແຂວງເງະອານ ແລະ ທ້າວ ຮາຮຸຍຮາຍ (HA HUU HAI) ອາຍຸ 25 ປີຢູ່ແຂວງຟູຖໍ ເສຍຊີວິດຄາທີ່ ແລະ ອີກສອງຄົນຄື: ທ້າວ ທໍບາແຈງ (THO BA CHENH) ອາຍຸ 33 ປີ ແລະ ທ້າວ ລິຢົງເຊຍ (LY GIONG XIA) ອາຍຸ 46 ປີຢູ່ແຂວງເງະອານໄດ້ຮັບບາດເຈັບສາຫັດ ແລະ ທັງໝົດແມ່ນກໍາມະກອນຂອງບໍລິສັດຊົງດາ 5 (SONG DA) ຂອງຫວຽດນາມ.
ຕາມການໃຫ້ການຂອງກໍາມະກອນທີ່ເຮັດວຽກຢູ່ໂຄງການເຂື່ອນດັ່ງກ່າວ ໃຫ້ຮູ້ວ່າ: ຈຸດເກີດເຫດແມ່ນຢູ່ເຂດກໍ່ສ້າງເຮືອນຈັກ ແລະ ກໍາມະກອນທີ່ເຄາະຮ້າຍດັ່ງກ່າວແມ່ນກໍາລັງເຮັດວຽກ ແລະ ມີກໍາມະກອນຄົນໜຶ່ງໄດ້ແກ່ຖັງອົກຊີລາກຖູໄປຕາມພື້ນຊີມັງເພື່ອຈະຈອດເຫລັກ ແລະ ໄດ້ເກີດລະເບີດຂຶ້ນຢ່າງແຮງຈົນມີຜູ້ເສຍຊີວິດ ແລະ ບາດເຈັບຄືດັ່ງກ່າວ.
ເຂື່ອນໄຟຟ້ານໍ້າງຽບ 1 ເລີ່ມກໍ່ສ້າງມາແຕ່ປີ 2014 ໂດຍແມ່ນບໍລິສັດໂອບາຢາຊິ ປະເທດຍີປຸ່ນເປັນເຈົ້າຂອງໂຄງການ, ຊຶ່ງມີກໍາລັງຕິດຕັ້ງ 290 ເມກາວັດ ແລະ ໄດ້ວ່າຈ້າງຫລາຍບໍລິສັດຈາກປະເທດຫວຽດນາມເພື່ອປະຕິບັດໜ້າວຽກຈອດທໍ່ປະຕູນໍ້າ, ວຽກຄອນກລີດ ແລະ ອື່ນໆ.
