6 ຂໍ້ຜິດພາດ ຈົນເຮັດໃຫ້ຊີວິດໄວກະສຽນລຳບາກ
January 5, 2022 - 10:00 AM
- ບໍ່ທ້ອນເງິນໃຫ້ຫລາຍຂຶ້ນຕາມອາຍຸ : ເງິນທີ່ທ່ານທ້ອນໄວ້ສຳລັບການກະສຽນອາຍຸຈຳເປັນຕ້ອງເພີ່ມຂຶ້ນຫລາຍກ່ວາຕອນທີ່ທ່ານເຮັດວຽກໃໝ່ ຍິ່ງທ່ານເຮັດວຽກມາດົນ ມີເງິນເດືອນສູງຂຶ້ນ ກໍຄວນທ້ອນໃຫ້ຫລາຍຂຶ້ນຕາມອາຍຸຂອງທ່ານ ເພາະຫາກຖືເບົາ ອາດເຮັດໃຫ້ທ້ອນໄດ້ບໍ່ພໍໃຊ້ ແທນທີ່ຈະໄດ້ພັກຜ່ອນ ຊຳ້ພັດຕ້ອງລຳບາກກ່ວາເກົ່າ.
- ຊື້ເຮືອນລາຄາສູງເກີນກ່ວາຈະຈ່າຍໄດ້ : ເພາະວ່າເຮືອນເປັນເງິນກ້ອນໃຫຍ່ ແລະ ການຊື້ເຮືອນລາຄາສູງເກີນກ່ວາທີ່ຈະຈ່າຍຜ່ອນໄດ້ຈຶ່ງເປັນເລື່ອງໃຫຍ່ ຖ້າທ່ານຄຳນວນແລ້ວ ຄ່າໃຊ້ຈ່າຍຕ່າງໆໃນຊີວິດຂອງທ່ານສູງກ່ວາຄ່າສະເລ່ຍ ກໍເຖິງເວລາແລ້ວທີ່ຕ້ອງຫລຸດຄ່າໃຊ້ຈ່າຍລົງ ຕ້ອງເຂົ້າໃຈນຳວ່າການຍ້າຍບ່ອນຢູ່ມັນເປັນເລື່ອງທຳມະດາ ການປ່ຽນມາອາໄສຢູ່ເຮືອນທີ່ຖືກລົງ ຍ່ອມດີກ່ວາປ່ອຍໃຫ້ຄ່າເຮືອນກະທົບການເງິນຂອງທ່ານ, ເງິນທີ່ເສຍໄປກັບຄ່າທີ່ຢູ່ອາໄສຫລາຍຂຶ້ນ ຈະເຮັດໃຫ້ເງິນທ້ອນຫລັງກະສຽນຂອງທ່ານບໍ່ພໍໃຊ້ ກໍຈະເປັນຈຸດເລີ່ມຕົ້ນທີ່ເຮັດໃຫ້ທ່ານຈົມກອງໜີ້ນັ້ນເອງ.
- ລໍ້ຫລິ້ນກັບແຜນທ້ອນເງິນຫລັງກະສຽນ : ໃນຕອນທີ່ທ່ານມີອາຍຸ 20 – 30 ປີ ອາດຈະລະເວັ້ນເງິນສະສົມເພື່ອຕອນກະສຽນອາຍຸໄດ້, ແຕ່ຖ້າເຂົ້າຊ່ວງໄວກາງຄົນ ທ່ານຈະມາລໍ້ຫລິ້ນກັບເງິນສະສົມເພື່ອຕອນກະສຽນອາຍຸບໍ່ໄດ້,ຢ່າໃຊ້ເງິນທີ່ກັນໄວ້ເພື່ອຕອນກະສຽນອາຍຸເດັດຂາດ ເພາະທ່ານຕ້ອງມີເງິນສົດໄວ້ເຜື່ອເຫດສຸກເສີນຕ່າງໆ.
- ບໍ່ຄວບຄຸມຄ່າໃຊ້ຈ່າຍສຳລັບລູກໆຂອງທ່ານ : ຢ່າທຸ້ມທຶນກັບລູກຈົນເກີນພໍດີ ທ່ານຄວນພິຈາລະນາຄ່າໃຊ້ຈ່າຍທຸກໆດ້ານໃຫ້ຖີ່ຖ້ວນ ທັງຄ່າຮຽນຂອງລູກ, ຄ່າຮຽນເພີ້ມ, ຄ່າຫລັກສູດກິດຈະກຳຕ່າງໆ, ຄ່າເຂົ້າຄ້າຍໃນໄລຍະປິດເທີມ ແລະ ຄ່າໃຊ້ຈ່າຍໄລຍະຮຽນມະຫາວິທະຍາໄລ ທ່ານຕ້ອງຫລຸດຄ່າໃຊ້ຈ່າຍໃຫ້ປະຢັດທີ່ສຸດ ຫລື ອາດຕ້ອງຕັດຄ່າໃຊ້ຈ່າຍບາງຢ່າງອອກ ບໍ່ດັ່ງນັ້ນທ່ານອາດຕ້ອງເຮັດວຽກໜັກຫລາຍຂຶ້ນ ຈົນກະທົບກັບສຸຂະພາບໃນໄວກະສຽນ.
- ບໍ່ປັບແຜນປະກັນຊີວິດ : ຢ່າລືມວ່າປະກັນທີ່ທ່ານເຄີຍເຮັດ ເມື່ອອາຍຸ 20 – 30 ປີ ອາດບໍ່ແມ່ນປະກັນທີ່ເໝາະສົມກັບທ່ານແລ້ວ ທ່ານຕ້ອງການປະກັນທີ່ຄອບຄຸມໃຫ້ເໝາະສົມກັບອາຍຸລວມ ທັງການປະກັນເພື່ອໃຫ້ຄອບຄົວບໍ່ຕ້ອງມີບັນຫາການເງິນ ຫາກມື້ໜຶ່ງທ່ານມີບັນຫາສຸຂະພາບ ຕ້ອງໃຊ້ຄ່າປິ່ນປົວຫລາຍ ຫລື ເສຍຊີວິດ ເລື່ອງນີ້ສຳຄັນຢ່າງຍິ່ງ ໂດຍສະເພາະຖ້າທ່ານເປັນຄົນດຽວທີ່ຕ້ອງເຮັດວຽກຫາລ້ຽງຄອບຄົວ.
- ບໍ່ຮີບຈັດການໜີ້ບັດເຄຣດິດ : ໃນໄວນີ້ທ່ານບໍ່ຄວນໃຊ້ຈ່າຍແບບເພິ່ງພາບັດເຄຣດິດອີກແລ້ວ ຖ້າທ່ານມີໜີ້ບັດເຄຣດິດ ຕ້ອງພະຍາຍາມຈ່າຍໃຫ້ໝົດໂດຍໄວ ຫລື ຫາກມີໜີ້ບັດເຄຣດິດຫລາຍເກີນໄປ ທ່ານຕ້ອງຈັດການໃຫ້ໄດ້ ຕ້ອງຈິງຈັງເຖິງວ່າທ່ານຈະຕ້ອງຂາຍຊັບສິນບາງຢ່າງໃນເຮືອນກໍຕ້ອງເຮັດ ຫລື ອາດຕ້ອງປັນເງິນທ້ອນຂອງທ່ານມາທະຍອຍຈ່າຍໜີ້ບັດເຄຣດິດ ແລ້ວທ່ານຈະມີອິດສະຫລະທາງການເງິນ, ມີຄວາມໝັ້ນຄົງຫລາຍຂຶ້ນ ເມື່ອປົດພາລະໜີ້ໃຫ້ໝົດໄປໄດ້.
