ຟລອຍ ກຽມຄືນສັງວຽນ ຊົກກັບ ຢູທູບເບີ ເທິງລານຈອດຍົນ ທີ່ດູໄບ

ຟລອຍ ເມເວເທີ ຈູເນຍ ອະດີດຍອດມວຍຜູ້ບໍໍ່ເຄີຍເສຍໃຫ້ໃຜຊາວສະຫະລັດ ອາເມລິກາ ອອກມາກ່າວວ່າ ລາວອາດກັບຂຶ້ນສັງວຽນເພື່ອຊົກນັດພິເສດກັບ ເຣຊາດ ເບລຮາຊາ ຫລື ທີ່ເປັນທີ່ຮູ້ຈັກກັນໃນຊື່ ‘‘ ມັນນີ ຄິກ  ’’ ຢູທູບເບີຊື່ດັງທີ່ຜັນຕົວມາເປັນນັກມວຍ ໂດຍອາດຈະຊົກກັນທີ່ສັງວຽນເທິງລານຈອດເຮລີຄອບເຕີ ຂອງໂຮງແຮມ ບູຣຈ ອັລ ອາຣັບ ຈູໄມຣາ ໃນນະຄອນດູໄບ ສະຫະລັດ ອາຣັບເອມີເຣດ ວັນທີ 20 ກຸມພານີ້.

ກ່ອນຫນ້ານີ້ ອະດີດມວຍເຈົ້າຂອງສາຍາ ‘‘ The money ’’ ເຊິ່ງບໍ່ເຄີຍເສຍ ແລະ ຊະນະລວດຕະຫລອດການຊົກມວຍອາຊີບ 50 ຄັ້ງ ກ່ອນຈະປະກາດແຂວນນວມໄປເມື່ອປີ 2017 ທີ່ຜ່ານມານັ້ນ ເຄີຍຂຶ້ນຊົກນັດພິເສດມາແລ້ວ 2 ຄັ້ງ ກັບ ເທນຊິນ ນາສຶຄາວະ ທີ່ປະເທດຍີ່ປຸ່ນ ເມື່ອປີ 2018 ແລະ ຫລ້າສຸດຊົກກັບ ໂລແກນ ພອລ ຢູທູບເບີຊື່ດັງໃນກຳນົດ 8 ຍົກ ເມື່ອໄລຍະຕົ້ນປີທີ່ຜ່ານມາ ກ່ອນທີ່ຫລ້າສຸດລາວອອກມາປະກາດວ່າອາດຄືນສັງວຽນຊົກອີກເທື່ອຫນຶ່ງກັບ ‘‘ ມັນນີ ຄິກ ’’ ເຊິ່ງເຄີຍຂຶ້ນສັງວຽນຊົກມວຍສາກົນມາແລ້ວ 2 ຄັ້ງ ໃນລາຍການ ‘‘ ໂຊຊຽລ ນ໊ອກເອົາ ’’  ໃນນະຄອນດູໄບ ເຊິ່ງລາວຊະນະລວດນຳອີກ.

ຟລອຍ ອາຍຸ 44 ປີ ກ່າວວ່າ : ‘‘ ຂ້ອຍໄດ້ລົມກັບ ເຈມ ແມັກແນ ທີ່ປຶກສາຂອງຂ້ອຍເລື່ອງການຊົກກັບ ມັນນີ ຄິກ ເຮົາເອງກໍຍັງບໍ່ຮູ້ຄືກັນ ລາວເຄີຍຂຶ້ນຊົກມາແລ້ວ ແລະ ກໍຊົກໄດ້ດີນຳອີກ ດ່ັງນັ້ນການພົບກັນຂອງເຮົາອາດເປັນນັດທີ່ດີສົມຄວນ ແລະ ຈະເປັນນັດທີ່ເຕັມໄປດ້ວຍແຟນມວຍທີ່ມີຄວາມພິເສດ ເຊິ່ງເຂົ້າຊົມການຊົກໄດ້ໃນຈຳນວນຈຳກັດເທົ່ານັ້ນ ດັ່ງນັ້ນ ຖ້າເຈົ້າມີໂອກາດໄດ້ເຂົ້າມາຊົມກາຊົກໃນຄັ້ງນີ້ຕິດຂອບເວທີ ໃຫ້ຮູ້ໄວ້ເລີຍວ່າເຈົ້າຄືຄົນພິເສດຫລາຍໆ ແຕ່ ມັນນີ ຄິກ ຄົນນີ້ ປະສົບຄວາມສຳເລັດໃນຫລາຍເລື່ອງ ແລະ ຂ້ອຍເອງກໍຢາກຈະຖ້າເບິ່ງຄືກັນວ່າລາວຈະເຮັດໄດ້ດີພຽງໃດໃນການພົບກັບຂ້ອຍ ’’.