ຈູດລົດ ແລະ ເຮືອນ ກ່ອນລັ່ນໄກປືນ ປິດຊີວິດ ໜີຄວາມຜິດ ຫຼັງກໍ່ເຫດຍິງນາຍບ້ານ

ແຫລ່ງຂ່າວຈາກປ້ອງກັນຄວາມສະຫງົບ ແຂວງຈໍາປາສັກ ລາຍງານວ່າ:ວັນທີ 29 ທັນວາ ນີ້ຢູ່ບ້ານໂນນສະຫວັນ ເມືອງຊະນະສົມບູນ, ລູກບ້ານຊື່ ທ້າວ ບຸນຈວງ ໄດ້ກໍ່ເຫດຍິງທ້າວ ຄຳດີ ນາຍບ້ານໆດັ່ງກ່າວ ຖືກໜ້າທ້ອງ ຊອດໃສ່ກາງຫຼັງ ບາດເຈັບສາຫັດ. ຈາກນັ້ນກໍໄດ້ຂີ່ລົດກັບເຮືອນແລ້ວເອົາໄຟຈູດລົດ ແລະ ຈູດເຮືອນ ກ່ອນຍິງໂຕເອງຕາຍ ແລະ ໄຟໄໝ້ພ້ອມເຮືອນ.
ເຈົ້າໜ້າທີ່ ປກສ ແຂວງຈຳປາສັກ ບອກວ່າ: ຫຼັງໄດ້ຮັບແຈ້ງເຫດ ກໍໄດ້ແຕ່ງຕັ້ງພະນັກງານວິຊາສະເພາະ ປກສ ລົງກວດກາຊັນນະສູດສະຖານທີ່ເກີດເຫດ ເຊິ່ງເປັນເຮືອນຮ້ານໄມ້ ຂະຫນາດ 8×9,7 ແມັດ, ມຸງສັງ ກະສີ, ແອ້ມຝາໄມ້ກະແຕະ ຖືກໄຟໄໝ້ໝົດທັງພົບເຫັນສົບຂອງທ້າວ ບຸນຈວງ ເຈົ້າຂອງເຮືອນຖືກໄຟໄໝ້ ເສຍຊີວິດ ຢູ່ເສື່ອ.

ນອກນັ້ນ, ໃນທີ່ເກີດເຫດພົບເຫັນ ເລົາປືນ 1 ເລົາ ຂະໜາດ 82 ຊັງຕີແມັດ,ໃນເລົາ ປືນ ມີກະສອບລູກປືນ 1 ກະສອບ ຄາຢູ່ ແລະ ຍັງພົບເຫັນເຫຼັກລວດຢ່າງຕີນລົດໃຫຍ່ 6 ເສັ້ນ ຖືກໄໝ້ຢູ່ເສື່ອ ແລະ ມີກະສອບລູກປືນ 1 ກະສອບ ຢູ່ຂ້າງສົບ ຖືກໄຟໄໝ້ໃນສະພາບບິດບ້ຽວ. ຫ່າງຈາກເຮືອນທີ່ເກີດເຫດ ປະມານ 7 ແມັດ ກໍພົບເຫັນລົດຕູ້ສະຕາແລັກ ເປັນລົດຂອງຜູ້ເສຍຊີວິດ ຖືກໄຟໄໝ້ກ້ຽງ ແລະໃນລົດ ພົບເຫັນເລົາປືນ 1 ເລົາ ຂະໜາດ 83 ຊັງຕີແມັດ ຖືກໄຟໄໝ້ ແລະ ສາຍໄຟຟ້າຕໍ່ຈາກເຮືອນມາໃສ່ຈຸດຈອດລົດ ສະພາບບໍ່ຖືກໄຟໄໝ້.

ເຈົ້າໜ້າທີ່ ສະຫຼຸບເບື້ອງຕົ້ນຂອງເຫດການດັ່ງກ່າວເກີດຂຶ້ນຍ້ອນທ້າວ ບຸນຈວງ ເປັນຄົນລົງມືຈູດລົດ ແລະ ເຮືອນ ກ່ອນຈະໃຊ້ປືນຍິງໂຕເອງ ຈຶ່ງຖືກໄຟໄໝ້. ຂະນະທີ່ຊາວບ້ານ ຜູ້ເຫັນເຫດການ ເລົ່າວ່າ: ຫຼັງຈາກຍິງນາຍບ້ານ ບາດເຈັບ, ຜູ້ກ່ຽວກໍກັບມາເຮືອນ ແລະ ໄດ້ຍິນສຽງປືນດັງຂຶ້ນຈຶ່ງເກີດໄຟໄໝ້ເຮືອນ ຕາມມາ.ເຊິ່ງຄະດີນີ້,ເຈົ້າໜ້າທີ່ ຈະສືບສວນ-ສອບສວນ ໃຫ້ລະອຽດຕື່ມອີກ.