ມອບ-ຮັບຂໍ້ມູນຖານລາຍຮັບລະຫວ່າງຂະແໜງຄຸ້ມຄອງຊັບສິນກັບສ່ວຍສາອາກອນປະຈຳແຂວງອັດຕະປື

ວັນທີ 29 ທັນວາ 2021 ນີ້, ທີ່ພະແນກການເງິນຂອງແຂວງ, ໄດ້ຈັດພິທີມອບ-ຮັບຂໍ້ມູນຖານລາຍຮັບລະຫວ່າງຂະແໜງຄຸ້ມຄອງຊັບສິນແຫ່ງລັດກັບສ່ວຍສາອາກອນປະຈໍາແຂວງ, ຕາງໜ້າມອບຂອງທ່ານ ສົມສະຫວັນ ອ້ວນວິໄລ ຮອງຂະແໜງຄຸ້ມຄອງຊັບສິນແຫ່ງລັດ ແລະ ຕາງໜ້າຮັບຂອງທ່ານ ສຸລິພອນ ຟອງສະໝຸດ ຮອງຫົວໜ້າສ່ວຍສາອາກອນປະຈໍາແຂວງອັດຕະປື, ໂດຍການເຂົ້າຮ່ວມເປັນປະທານຂອງທ່ານ ນາງ ໃຍຄໍາ ສີຊານົນ ຮອງຫົວໜ້າພະແນກການເງິນແຂວງອັດຕະປື, ມີຫົວໜ້າຄຸ້ມຄອງຊັບສິນແຫ່ງລັດ, ຫົວໜ້າສ່ວຍສາອາກອນ ແລະ ພາກສ່ວນກ່ຽວຂ້ອງເຂົ້າຮ່ວມ.

ອີງຕາມບົດບັນທຶກການມອບ-ຮັບຂໍ້ມູນຖານລາຍຮັບລະຫວ່າງຂະແໜງຄຸ້ມຄອງຊັບສິນແຫ່ງລັດ ກັບ ສວຍສາອາກອນປະຈໍາແຂວອັດຕະປື ແລະ ບັນດານິຕິກຳຕ່າງໆທທີ່ຕິດພັນກັບການມອບຂໍ້ມູນຖານລາຍຮັບ, ການມອບຖານຂໍ້ມູນການເກັບລາຍຮັບຈາກຄ່າເຊົ່າທີ່ດິນຂອງລັດ, ຄ່າເຊົ່າຊັບສົມບັດຄົງທີ່ອື່ນໆ, ການຂາຍຕຶກອາຄານ, ການຂາຍສິດນໍາໃຊ້ທີ່ດິນ, ເງິນກູ້ຢືມສົມທົບສິ່ງປຸກສ້າງ, ຫັນຊັບສິນເປັນທຶນ, ພ້ອມບັນຊີສະຖິຕິບັນດາສັນຍາເຊົ່າ ຫຼື ສໍາປະທານ ແລະ ເອກະສານທີ່ກ່ຽວຂ້ອງລວມທັງສະຖິຕິສະບັບລົງລາຍເຊັນ ແລະ ເປັນໄຟລ໌ລະບົບ Excel ໃຫ້ແກ່ສ່ວຍສາອາກອນປະຈຳແຂວງ, ເພື່ອເປັນຂໍ້ມູນໃນການຄຸ້ມຄອງ, ຕິດຕາມໃນລະບົບ TaxRIS.

ບັນດາຖານຂໍ້ມູນດັ່ງກ່າວແມ່ນຈະໄດ້ຈັດຕັ້ງປະຕິບັດແຈ້ງມອບລາຍຮັບຜ່ານລະບົບ TaxRIS ນັບແຕ່ວັນທີ 01 ມັງກອນປີ 2022 ເປັນຕົ້ນໄປ, ຂະແໜງຄຸ້ມຄອງຊັບສິນຂອງແຫ່ງລັດເປັນຜູ້ດຳເນີນຂະບວນການຕ່າງໆທີ່ຕິດພັນກັບວຽກງານວິຊາສະເພາະ, ທາງດ້ານກົນໄກການຈັດຕັ້ງປະຕິບັດເຊັ່ນ: ການຄົ້ນຄວ້າ, ການເຈລະຈາສັນຍາ, ຮ່າງສັນຍາ, ການປະເມີນຕີລາຄາຊັບສິນອະສັງຫາລິມະຊັບ, ການອະນຸຍາດນໍາໃຊ້, ໃຫ້ເຊົ່າ ແລະ ວຽກງານອື່ນໆແມ່ນໃຫ້ປະຕິບັດຕາມສິດ ແລະ ພາລະບົດບາດຂອງກົມຄຸ້ມຄອງຊັບສິນຂອງແຫ່ງລັດ, ເອກະສານສັນຍາທີ່ຂະແໜງຄຸ້ມຄອງຊັບສິນຂອງແຫ່ງລັດໄດ້ຮ່ວມເຊັນສັນຍາໃຫ້ແກ່ບຸກຄົນ, ນິຕິບຸກຄົນ ແລະ ການຈັດຕັ້ງຕ່າງໆສຳເລັດຕາມຂັ້ນຕອນທາງດ້ານກົດໝາຍ ແລະ ລະບຽບການແລ້ວ, ຕ້ອງໄດ້ສົ່ງສໍາເນົາໃຫ້ສ່ວຍສາອາກອນປະຈຳແຂວງເພື່ອເປັນຖານຂໍ້ມູນໃນການຕິດຕາມການແຈ້ງມອບລາຍຮັບຜ່ານລະບົບ TaxRIS.

ການແຈ້ງມອບລາຍຮັບຈາກອະສັງຫາລິມະຊັບຜ່ານລະບົບ TaxRIS ສາມາດປະຕິບັດໄດ້ 3 ຊ່ອງທາງຄື: ແຈ້ງມອບດ້ວຍຕົນເອງຜ່ານລະບົບ TaxRIS (ສຳລັບຜູ້ທີ່ມີເລກປະຈາຕົວຜູ້ເສຍອາກອນ ຫຼື ຜູ້ທີ່ດໍາເນີນຕາມຂັ້ນຕອນຂອງການນໍາໃຊ້ລະບົບຖືກຕ້ອງ, ຄົບຖ້ວນ), ແຈ້ງມອບຜ່ານເຈົ້າໜ້າທີ່ຂະແໜງຄຸ້ມຄອງຊັບສິນແຫ່ງລັດ, ແຈ້ງມອບນຳເຈົ້າໜ້າທີ່ກົມສ່ວຍສາອາກອນຕາມການມອບໝາຍຄວາມຮັບຜິດຊອບ,ການສະຫຼຸບສັງລວມ, ກວດກາລາຍຮັບຈາກອະສັງຫາລິມາຊັບທີ່ຜ່ານລະບົບ TaxRIS ແມ່ນຄວາມຮັບຜິດຊອບຂອງສ່ວຍສາອາກອນປະຈຳແຂວງ, ການຄຸ້ມຄອງ, ການຕິດຕາມ, ກວດກາ, ຊຸກຍູ້, ການອອກໃບຄິດໄລ່, ເລັ່ງທວງ ແລະ ການປະສານແຈ້ງໃຫ້ຄູ່ສັນຍາ ຫຼື ຜູ້ປະກອບການມອບລາຍຮັບຕາມສັນຍາໂດຍຜ່ານລະບົບ TaxRIS ແມ່ນຄວາມຮັບຜິດຊອບຂອງຂະແໜງຄຸ້ມຄອງຊັບສິນຂອງລັດແຫ່ງລັດເປັນຜູ້ປະຕິບັດໜ້າທີ່ໃນນາມຄູ່ສັນຍາ.

ແຕ່ຖ້າຫາກບັນຫາຫຍຸ້ງຍາກເກີດຈາກລະບົບ TaxRIS ໃຫ້ປະສານຫາສ່ວຍສາອາກອນປະຈາແຂວງແກ້ໄຂຊ່ວຍ, ການສ້າງແຜນລາຍຮັບປະຈຳປີ, ການສົມທຽບລາຍຮັບລະຫວ່າງສູນແຂວງ-ເມືອງ ແລະ ຄັງເງິນແຫ່ງຊາດ ແມ່ນ ໜ້າທີ່ຂອງສ່ວຍສາອາກອນປະຈຳແຂວງ, ພ້ອມທັງສະຫຼຸບລາຍງານປະຈຳເດືອນ, ງວດ, ປີຢ່າງເປັນປົກກະຕິ, ສ່ວຍສາອາກອນປະຈຳແຂວງ ແລະ ຂະແໜງຄຸ້ມຄອງຊັບສິນຂອງລັດຕິດຕາມການແຈ້ງມອບລາຍຮັບດັ່ງກ່າວໃນລະ ບົບ TaxRIS ເພື່ອສັງລວມລາຍງານປະຈຳອາທິດ, ເດືອນ, ງວດ ແລະ ປີ ແລະ ສົມທຽບຂໍ້ມູນກັນເປັນປົກກະຕິ, ການຈັດຕັ້ງປະຕິບັດເພື່ອເຮັດໃຫ້ລາຍຮັບເຂົ້າງົບປະມານແຫ່ງລັດຖືກຕ້ອງ, ຄົບຖ້ວນ ແລະ ທັນຕາມກຳນົດເວລາ.