ທົດສອບຄວາມພ້ອມ ຕ້ອນຮັບນັກທ່ອງທ່ຽວຕ່າງປະເທດ

ວັນທີ 30 ທັນວາ 2021, ກະຊວງຖະແຫຼງຂ່າວ, ວັດທະນະທໍາ ແລະທ່ອງທ່ຽວ ຮ່ວມກັບກະຊວງສາ ທາລະນະສຸກ, ເຈົ້າໜ້າທີ່ຕຳຫຼວດກວດຄົນເຂົ້າເມືອງ ໄດ້ຝຶກແອບການຕ້ອນຮັບນັກທ່ອງທ່ຽວທີ່ຈະ ເດີນ ທາງມາທ່ອງທ່ຽວໃນເຂດທ່ອງທ່ຽວສີຂຽວຕົວຈິງ ຢູ່ສະໜາມບິນສາກົນວັດໄຕ.

ທ່ານ ອຸ່ນທວງ ຂາວພັນ ຮອງລັດຖະມົນຕີກະຊວງຖະແຫລງຂ່າວ, ວັດທະນະທໍາ ແລະທ່ອງທ່ຽວ ເປີດ ເຜີຍວ່າ: ການຝຶກຊ້ອມຄັ້ງນີ້ ເພື່ອເບິ່ງຄວາມພ້ອມຂອງທຸກຂະແໜງການໂດຍສະເພາະການກວດຄົນເຂົ້າ-ອອກເມືອງຂອງເຈົ້າໜ້າທີ່ຂະແໜງການຕ່າງໆເຊັ່ນກະຊວງການຕ່າງປະເທດ, ຄວາມພ້ອມການອອກວີຊ່າ, ກະຊວງສາທາລະນະສຸກ ຄວາມພ້ອມການກວດ ແລະຮັກສາສຸຂະພາບຂອງນັກທ່ອງທ່ຽວ ແລະຂະແໜງ ການກ່ຽວຂ້ອງອື່ນໆຕື່ມອີກ, ການຝຶກຊ້ອມການຕ້ອນຮັບນັກທ່ອງທ່ຽວຢູ່ສະໜາມບິນສາກົນວັດໄຕ, ການເຝຶກຊ້ອມຂັ້ນຕອນຕ້ອງຮັບນັກທ່ອງທ່ຽວເມື່ອນັກທ່ອງທ່ຽວມາເຖິງໂຮງແຮມ, ຂັ້ນຕອນໃນກໍລະນີ ນັກທ່ອງທ່ຽວມີຜົນກວດອອກມາເປັນບວກ, ແລະຂັ້ນຕອນອື່ນໆ ເພື່ອສ້າງຄວາມໝັ້ນໃຈໃຫ້ນັກທ່ອງທ່ຽວ.

ພ້ອມກັນນັ້ນຍັງໄດ້ເນັ້ນແຕ່ລະແຂວງໃຫ້ຝຶກອົບຮົມພະນັກງານບໍລິການກ່ຽວຂ້ອງໃຫ້ໄດ້ຕາມເງື່ອນໄຂທີ່ລັດຖະບານວາງອອກ ໂດຍຈະທົດລອງເປີດ 3 ແຂວງກ່ອນ ຄື: ນະຄອນຫລວງວຽງຈັນ, ຫລວງພະບາງ ແລະເມືອງວັງວຽງ ແຂວງວຽງຈັນ ຍ້ອນວ່າ 3 ແຂວງນີ້ ໄດ້ຮັບຄວາມນິຍົມຈາກນັກທ່ອງທ່ຽວຫລາຍໂດຍໃຫ້ນັກທ່ອງ ທ່ຽວມາທ່ຽວເປັນຄະນະ ແລະປະຕິບັດຕາມລາຍການທີ່ກໍານົດໄວ້ເທົ່ານັ້ນ, ເຂດທ່ອງທ່ຽວສີຂຽວ ແມ່ນເຂດທ່ອງທ່ຽວປອດຈາກພະຍາດໂຄວິດ-19 ຫລື ລະບາດໜ້ອຍ ເປັນເຂດທີ່ການທ່ອງທ່ຽວຂະຫຍາຍຕົວສູງຂອງປະເທດເຮົາ.