ແຂວງຫລວງພະບາງ ກຽມຄວາມພ້ອມຕ້ອນຮັບນັກທ່ອງທ່ຽວ

ເນື່ອງຈາກນັກທ່ອງທ່ຽວເຂົ້າມາທ່ຽວຫລວງພະບາງມີຫລາຍຮູບເເບບເຊັ່ນ: ເດີນທາງດ້ວຍລົດສ່ວນຕົວ, ລົດໂດຍສານ, ທາງອາກາດ ສະເພາະທາງລົດໄຟມີຈໍານວນຫລາຍ ຊຶ່ງບັນຫານີ້ພະແນກ ຍທຂ ໄດ້ປະສານສົມທົບນໍາກະຊວງ ຍທຂ, ບໍລິສັດທາງລົດໄຟແຫ່ງຊາດ ກຽມຈັດສັນລົດຕູ້ໄປຮັບນັກທ່ອງທ່ຽວ ກໍຄື ລະບາຍຜູ້ໂດຍສານຈາກສະຖານີ ເຂົ້າຕົວເມືອງ.

ທ່ານ ບຼົ່ງວ່າງ ຫວ່າງເຈ່ຍຊ່າ ຫົວໜ້າພະແນກ ໂຍທາທິການ ແລະ ຂົນສົ່ງ ແຂວງຫລວງພະບາງ ໃຫ້ສໍາພາດເມື່ອບໍ່ດົນນີ້ວ່າ: ພາຍຫລັງ ລັດຖະບານມີນະໂຍບາຍເປີດຮັບນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາທ່ຽວຫລວງພະບາງ, ພວກເຮົາກໍໄດ້ເຕົ້າໂຮມບັນດາຫົວໜ່ວຍທຸລະກິດ, ຜູ້ປະກອບການຂົນສົ່ງໂດຍສານ-ນັກທ່ອງທ່ຽວ ເພື່ອກຽມຄວາມພ້ອມຮອງຮັບ ຊຶ່ງຜູ້ປະກອບການຕ່າງໆລ້ວນແຕ່ໃຊ້ມາດຕະການຂ້າເຊື້ອຕາມຈຸດບໍລິການຜູ້ໂດຍສານ-ນັກທ່ອງທ່ຽວ, ກວດບັດສັກວັກຊິນ, ໃສ່ຜ້າອັດປາກ-ດັງຕະຫລອດເວລາ, ການຮັກສາໄລຍະຫ່າງ, ວັດແທກອຸນຫະພູມ, ຕິດຕັ້ງອ່າງລ້າງມືດ້ວຍເຈວ, ເຫລົ້າ 90, ພົ່ນຢາຂ້າເຊື້ອໃນສະຖານທີ່ຮອງຮັບຜູ້ໂດຍສານ ແລະ ລົດກ່ອນ ແລະ ຫລັງເອົາຜູ້ໂດຍສານຂຶ້ນ-ລົງລົດ.

ປັດຈຸບັນມີ 16 ຫົວໜ່ວຍຜູ້ປະກອບການຂົນສົ່ງໂດຍສານ, ມີລົດຕູ້ 463 ຄັນ, ຜູ້ຂົນສົ່ງໂດຍສານໄດ້ສັກວັກຊີນຄົບໂດສ ຫລາຍກວ່າ 95%; ມີເຮືອທ່ອງທ່ຽວ 124 ລໍາ, ໃນນີ້ 26 ລຳ ຢູ່ນະຄອນຫລວງພະບາງ ໂດຍພະນັກງານປະຈຳເຮືອ ຕ້ອງໄດ້ສັກວັກຊິນຄົບໂດສ ຈຶ່ງອະນຸຍາດໃຫ້ເຂົ້າໂຄງການ lao safe.

ແນວໃດກໍດີໃນໄວໆນີ້ ຈະຊຸກຍູ້ຜູ້ປະກອບການ ຕ້ອງໄດ້ຫັນເປັນທັນສະໄໝ ແລະ ບໍລິການລົດໂດຍສານທັງປະຈຳ-ບໍ່ປະຈໍາທາງ, ລົດຕັກຊີໄຟຟ້າ, ສ້າງຈຸດພັກຜູ້ໂດຍສານ, ຈຸດຈອດລົດສະເພາະສຳລັບລົດໂດຍ ສານຕາມສາຍທາງ, ສ້າງ ແລະ ພັດທະນາລະບົບແອັບພຣິເຄເຊິນ ເອີ້ນລົດ, ລະບົບຊື້-ຂາຍ ປີ້ໂດຍສານທາງເອເລັກໂຕຣນິກຕື່ມອີກ.