ຜູ້ຕັດສິນກາຕາຖືກແຮັກເຟສບຸກ ຫລັງທີມຊາດໄທຊະນະຫວຽດນາມນັດທຳອິດ

ຄວັນຫລົງ ບານເຕະຊີງແຊ໊ມອາຊຽນ ເອເອັຟເອັຟ ຊູຊຸກິ ຄັບ 2020 ຮອບຊີງຊະນະເລີດນັດທຳອິດ ທີ່ປະເທດສິງກະໂປ ເຊິ່ງທີມຊາດໄທ ແຊ໊ມກຸ່ມ A ເອົາຊະນະ ທີມຊາດຫວຽດນາມ ທີມອັນດັບ 2 ກຸ່ມ B ດ້ວຍປະຕູ 2-0 ຄອງຄວາມໄດ້ປຽບກ່ອນແຂ່ງຂັນນັດທີ 2 ໃນວັນອາທິດທີ 26 ທັນວານີ້.

ແນວໃດກໍຕາມ ປະເດັນຮ້ອນທີ່ຖືກກ່າວເຖິງຢ່າງຫລວງຫລາຍໃນໂລກໂຊຊຽລ ຄືການເຮັດຫນ້າທີ່ ຊາອຸດ ອາລີ ອັລ ອັດບາ ຜູ້ຕັດສິນຊາວກາຕາ ແລະ ທີມງານ ເຊິ່ງແຟນບານທີມຊາດຫວຽດນາມ ພາກັນເຂົ້າມາຕຳນິການຕັດສິນໃຈຫລາຍຄັ້ງທີ່ເຮັດໃຫ້ທີມຮັກຂອງພວກເຂົາເສຍປະໂຫຍດ.

ສຳລັບ 3 ຈັງຫວະສຳຄັນທີ່ແຟນບານທີມຊາດຫວຽດນາມຂ້ອງໃຈ ຄື ສັດໄຊ ບຸດພົມ ຜູ້ຮັກສາປະຕູທີມຊາດໄທໄດ້ພຽງໃບເຫລືອງຈາກການອອກມາຕັ້ງໃຈຕັດຟາວ ຫງວຽນ ວັນ ຕວນ ກອງຫນ້າຫວຽດນາມ ນອກເຂດໂທດໃນເຄິ່ງເວລາທຳອິດ ລວມເຖິງ 2 ຈັງຫວະໃນເຄິ່ງເວລາທີສອງ ເຊິ່ງຖືກຈັບລ້ຳຫນ້າ ທັງທີ່ຍັງມີກອງຫລັງໄທອີກ 2 ຄົນຢືນຕຳ່ກວ່າ ແລະ ວີຣະເທບ ປ້ອມພັນ ຕົວສຳຮອງໄທ ທີ່ສະກັດບານມາຖືກແຂນຕົນເອງໃນເຂດໂທດ ແຕ່ບໍ່ຖືກຈັບເປັນບານຖືກແຂນ ແລະ ບໍ່ມີການໃຫ້ລູກໂທດ.

ຫລັງຈາກຖືກຊາວເນັດຫວຽດນາມຖະຫລົ່ມຢ່າງຫນັກ ຜູ້ຕັດສັນດັ່ງກ່າວໄດ້ໂພສຂໍ້ຄວາມວ່າ : ‘‘ ພວກເຈົ້າຫລິ້ນເຟສບຸກດູຖືກຄົນອື່ນ ຄວນນັ່ງປະເມີນຕົນເອງແລ້ວຫາທາງອອກທີ່ດີກວ່າ ເພາະວ່າເກມທີ່ເຫລືອ ຍັງມີເວລາອີກ 90 ນາທີ ຂ້ອຍບໍ່ໄດ້ຮັບສິນບົນຈາກໃຜແນ່ນອນ ເພາະຊື່ສຽງ ແລະ ຈິດສຳນຶກໃນວິຊາຊີບຂອງຂ້ອຍບໍ່ອະນຸຍາດໃຫ້ເຮັດແບບນີ້ ຂໍສະແດງຄວາມເສຍໃຈກັບທີມຫວຽດນາມ ຂໍໃຫ້ໂຊກດີໃນນັດທີສອງ ’’.

ຫລ້າສຸດມີລາຍງານວ່າ ຊາອຸດ ອາລີ ອັລ ອັດບາ ຖືກແຮັກເຟສບຸກສ່ວນຕົວ ເຊິ່ງຄາດວ່າເປັນຝີມືຂອງແຟນບານຫວຽດນາມທີ່ບໍ່ພໍໃຈການເຮັດຫນ້າທີ່ຂອງລາວ ຂະນະທີ່ເຟສບຸກແຟນເພສທີ່ຄາດວ່າຈະເປັນຂອງຜູ້ຕັດສິນຊາວກາຕາຄົນນີ້ ໄດ້ມີການໂພສວ່າເກີດຄວາມຜິດປົກກະຕິໃນເຟສບຸກຂອງຕົນເອງ ແລະ ຍອມຮັບວ່າຕົກໃຈກັບສິ່ງທີ່ເກີດຂຶ້ນ.