ເຮົາພູມໃຈທາງລົດໄຟລາວ-ຈີນ ແຕ່ຢ່າຢືນກັ້ງໂກບເບິ່ງຊື່ໆ ໂດຍບໍ່ໄດ້ຜົນປະໂຫຍດຫຍັງຈາກມັນ

ໂດຍ: ລູກເມືອງພວນ

ພາຍຫຼັງມີເສັ້ນທາງລົດໄຟຄວາມໄວສູງລາວ-ຈີນ ເປີດໃຫ້ບໍລິການຢ່າງເປັນທາງການແລ້ວ ປະຊາຊົນລາວໃຜໆ ກໍມີຄວາມຮູ້ສຶກພາກພູໃຈເປັນຢ່າງຍິ່ງ ເພາະການໄປມາຫາສູ່ກັນ, ການທ່ອງທ່ຽວ, ການຂົນສົ່ງສິນຄ້າ ມີຄວາມສະດວກສະບາຍ, ວ່ອງໄວ ແລະ ປະຢັດເວລາໃຫ້ສັ້ນເຂົ້າ. ນັບແຕ່ມື້ມີການບໍລິການທົ່ວໄປໃນວັນທີ 4 ທັນວາເປັນຕົ້ນມາ, ມີຊາວລາວ ແລະ ຊາວຕ່າງປະເທດເຂົ້າມາໃຊ້ບໍລິການຢ່າງຄັບຄາໜາແໜ້ນໃນແຕ່ລະວັນ ນັບທັງລາຄາປີ້ຊັ້ນ 1, ຊັ້ນ 2 ແລະ ຊັ້ນ 3. ຕໍ່ກັບບັນຫານີ້ ທ່ານ ນາງ ປານໃຈ ເຢ່ຍຢັ້ງວາ ຜູ້ຮັບຜິດຊອບຂົນສົ່ງຜູ້ໂດຍສານ ລົດໄຟລາວ-ຈີນ ປະຈໍາສະຖານີນະຄອນຫລວງວຽງຈັນ ກ່າວວ່າ: ແຕ່ລະມື້ການເດີນທາງດ້ວຍລົດໄຟລາວ-ຈີນ ມີຜູ້ໂດຍສານເຕັມທຸກຖ້ຽວ.

ຂະນະທີ່ປີ້ໂດຍສານຊັ້ນ 1 ຫລື EMU 1 ຂາຍໝົດທຸກມື້, ຊຶ່ງແຂວງທີ່ມີຜູ້ໂດຍສານເດີນທາງໄປຫລາຍກວ່າໝູ່ກໍຄືແຂວງຫລວງພະບາງ, ຫລວງ ນໍ້າທາ, ຖັດມາແມ່ນອຸດົມໄຊ ແລະ ເມືອງວັງວຽງ ແຂວງວຽງຈັນ. ທ່ານກ່າວຕື່ມອີກວ່າ: ໄລຍະນີ້ການບໍລິການແລ່ນລົດໄຟ ມີ 2 ໄລຍະ ຄື ໄລຍະທີ 1 ວັນຈັນ ຫາ ວັນພະຫັດ ບໍລິການຖ້ຽວດຽວ ເວລາ 8:00 ໂມງ ແລະ ໄລຍະ ທີ 2 ວັນສຸກ ຫາ ວັນອາທິດ ບໍລິການ 2 ຖ້ຽວ (ຖ້ຽວ 8:00 ໂມງ ແລະ 16:00 ໂມງ) ເນື່ອງຈາກປະ ຊາຊົນເດີນທາງໄປຕ່າງແຂວງຫລາຍ. ແນວໃດກໍດີໃນປັດຈຸບັນພວກເຮົາໄດ້ກໍານົດຈໍານວນຜູ້ໂດຍສານ 700 ຄົນຕໍ່ຖ້ຽວ ເພື່ອປ້ອງກັນການລະບາດຂອງພະ ຍາດໂຄວິດ-19. ນີ້ສະແດງໃຫ້ເຫັນວ່າ ຄົນລາວມີກຳລັງຊື້ ຫຼື ມີຄວາມສາມາດຊື້ປີ້ຂີ່ລົດໄຟລາວ-ຈີນໄດ້ ຊຶ່ງແຕກຕ່າງກັບຄຳໃສ່ຮ້າຍປ້າຍສີ, ດູໝິ່ນ ດູແຄນຄົນລາວຂອງນັກຂ່າວຊ່ອງ NBT ຂອງໄທໄດ້ອອກມາວິພາກວິຈານຄົນລາວ, ລັດຖະບານລາວຢ່າງໜັກໜາສາຫັດເມື່ອມໍ່ໆ ມານີ້ວ່າ: ຄົນລາວບໍ່ມີປັນຍາຈະຊື້ປີ້ລົດໄຟໄດ້ ຍ້ອນເງິນເດືອນ ແລະ ຄ່າແຮງຂອງຄົນລາວຕໍ່າ, ຄ່າປີ້ລົດໄຟ ຊໍ້າພັດສູງ, ບໍ່ມີພໍເທົ່າໃດຄົນໄດ້ຂີ່.

ສ່ວນການຂົນສົ່ງສິນຄ້າໂດຍລົດໄຟຈີນ-ລາວນັ້ນ, ເມື່ອວັນທີ 23 ທັນວາ 2021 ນີ້ ສຳນັກຂ່າວ ຊິນຫົວ ຂອງຈີນເຜີຍວ່າ: ເສັ້ນທາງລົດໄຟ ຈີນ-ລາວ ຂົນສົ່ງສິນຄ້າໄດ້ແລ້ວຫຼາຍກວ່າ 50.000 ກວ່າໂຕນ ຫລັງເປີດໃຫ້ບໍລິການບໍ່ທັນເຖິງ 1 ເດືອນ, ສິນຄ້າທີ່ສົ່ງອອກຕົ້ນຕໍຂອງຈີນຄືຜັກ ແລະ ໝາກໄມ້ ຄຽງຄູ່ກັບເຄື່ອງຈັກກົນ ແລະ ເຄື່ອງໃຊ້ໄຟຟ້າ.

ລາຍງານຂອງຊິນຮົວລະບຸຕື່ມອີກວ່າ: ຂໍ້ມູນຫລ້າສຸດເມື່ອວັນທີ 21 ທັນວາ, ທາງລົດໄຟດັ່ງກ່າວໄດ້ຮອງຮັບຂະບວນລົດໄຟຂົນສົ່ງສິນຄ້າເຖິງ 203 ຂະບວນ, ໃນຈຳນວນນີ້ເປັນລົດໄຟຂົນສົ່ງສິນຄ້າຂ້າມຊາຍແດນ 47 ຂະບວນ, ໃນນັ້ນ ລົດໄຟຝ່າຍຈີນຂົນສົ່ງສິນຄ້າໄດ້ຫລາຍກວ່າ 28.000 ໂຕນ, ຂະນະທີ່ລົດໄຟໃນ ສປປ ລາວ ຂົນສົ່ງສິນຄ້າໄດ້ຫລາຍກວ່າ 22.000 ໂຕນ. ສ່ວນສິນຄ້ານຳເຂົ້າຂອງຈີນຫຼັກໆ ກໍແມ່ນຢາງທຳມະຊາດ.

ເມື່ອມີທາງລົດໄຟແລ້ວ ພວກເຮົາຄົນລາວຕ້ອງຍາດເອົາໂອກາດນີ້ເພື່ອເຮັດຢ່າງໃດຢ່າງໜຶ່ງເພື່ອໃຫ້ມີກຳໄລ, ໄດ້ຮັບຜົນປະໂຫຍດສູງສຸດຈາກທາງລົດໄຟເສັ້ນນີ້, ບໍ່ແມ່ນໄດ້ແຕ່ຊື່ນຊົມ ແລ້ວຢືນກັ້ງໂກບ ເບິ່ງປະເທດອື່ນຫາຜົນກຳໄລຈາກທາງລົດໄຟຂອງພວກເຮົາ. ພວກຈະລົງທຶນຜະລິດສິນຄ້າອັນໃດລຽບຕາມສອງຟາກທາງລົດໄຟເພື່ອສົ່ງອອກ, ໂດຍສະເພາະແມ່ນຜະລິດກະສິກຳທີ່ລາວເຮົາມີທ່າແຮງ ເປັນຕົ້ນ ແມ່ນເຂົ້າ, ມັນຕົ້ນ, ສາລີ, ໝາກໄມ້, ພືດຜັກປອດສານພິດ ຕ່າງໆ ແລະ ການລ້ຽງສັດໃຫຍ່ເພື່ອສົງອອກ. ນອກຈາກນີ້ຍັງລວມທັງສິນຄ້າປະເພດອຸດສາຫະກຳ ແລະ ຫັດຖະກຳນຳອີກ ທີ່ພວກເຮົາສາມາດຜະລິດໄດ້ ເພື່ອສົງອອກໃຫ້ຫຼາຍໆ ບໍ່ແມ່ນຊິໃຫ້ແຕ່ປະເທດອື່ນນຳສິນຄ້າເຂົ້າມາຂາຍໃຫ້ປະເທດເຮົາແຕ່ຝ່າຍດຽວ ໂດຍພວກເຮົາບໍ່ເຮັດຫຍັງເລີຍກໍຈະຂາດດຸນການຄ້າຢ່າງມະຫາສານ, ເມື່ອເປັນເຊັ່ນນັ້ນກໍຈະທຸກຕະຫຼອດໄປ. ໂອກາດພັນປີມີເທື່ອໜຶ່ງ ເຮົາຕ້ອງຍາດແຍ່ງໃຫ້ໄດ້.

ຖ້າພວກເຮົາບໍ່ຍາດໂອກາດນີ້ກໍຈະບໍ່ມີໂອກາດໃດອີກແລ້ວ ທີ່ຈະສ້າງຮັ່ງຄູນມີໃຫ້ແກ່ປະເທດຊາດ, ສ້າງໂອກາດໃຫ້ປະຊາຊົນຮັ່ງມີເຂັ້ມແຂງ, ຊິວິດການເປັນຢູ່ທາງດ້ານວັດຖຸ ແລະ ຈິດໃຈໃຫ້ດີຂຶ້ນ. ຖ້າບໍ່ດັ່ງນັ້ນ ພວກເຮົາກໍຈະໄດ້ແຕ່ຢືນກັ້ງໂກບເບິ່ງປະເທດອື່ນລວຍ ແລ້ວພວກເຂົາກໍຈະຖືກດູຖູກ ນິນທາ ຕາມເຄີຍ.

ເຖິງເວລາແລ້ວ ພວກເຮົາປະຊາຊົນລາວ ຈົ່ງເປັນຈິດໜຶ່ງໃຈດຽວຢູ່ອ້ອມຂ້າງລັດຖະບານ ເພື່ອເຮັດໃຫ້ປະເທດຊາດພວກເຮົາຮັ່ງມີເຂັ້ມແຂງ, ປະຊາຊົນຮັ່ງມີຜາສຸກ, ສັງຄົມຮຸ່ງເຮືອງສີວິໄລ. ດີໃຈໄປພ້ອມທາງລົດໄຟ ລາວສີວິໄລຮຸ່ງເຮືອງຈຶ່ງເໝາະສົມ, ຢ່າໃຫ້ງົມກະໂທງຢູ່ບ່ອນເກົ່າ ຫຼື ຢືນກັ້ງໂກບອອນຊອນຊື່ໆ.