IMF ຄາດວ່າ ເສດຖະກິດ ສປປ ລາວ ຈະຂະຫຍາຍຕົວໃນອັດຕາ 2,1% ແລະ ຈະເພິ່ມເປັນ 3% ໃນປີ 2022
ໃນລະຫວ່າງວັນທີ 21-22 ທັນວາ 2021 ຜ່ານມາ, ຄະນະຜູ້ວ່າການທະນາຄານແຫ່ງ ສປປ ລາວ ນໍາໂດຍທ່ານ ສອນໄຊ ສິດພະໄຊ ຜູ້ວ່າການທະນາຄານແຫ່ງ ສປປ ລາວ ພ້ອມດ້ວຍຄະນະນໍາຈາກຂະ ແໜງການກ່ຽວຂ້ອງໄດ້ສໍາເລັດການເຂົ້າຮ່ວມຮັບຟັງຜົນການປະເມີນເສດຖະກິດມະຫາພາກຂອງ ສປປ ລາວ ພາຍໃຕ້ມາດຕາ IV ຂອງກອງທຶນການເງິນສາກົນ ປະຈຳປີ 2021 ຜ່ານລະບົບທາງໄກ (IMF Article IV Consultation 2021).
ການປະເມີນເສດຖະກິດມະຫາພາກ ສປປ ລາວ ປີ 2021 ໄດ້ຈັດຂຶ້ນຜ່ານກອງປະຊຸມທາງໄກໃນລະຫວ່າງວັນທີ 6-21 ທັນວາ 2021 ຜ່ານມາ ໂດຍຄະນະຂອງ IMF ນໍາໂດຍ ທ່ານ Alasdair Scott ຫົວໜ້າທີມປະເມີນເສດຖະກິດມະຫາພາກຂອງ ສປປ ລາວ ຕາງໜ້າຈາກ ຫ້ອງການ IMF ສຳນັກງານໃຫຍ່ ໄດ້ພົບປະເຮັດວຽກກັບພາກສ່ວນປິ່ນອ້ອມເສດຖະກິດມະຫາພາກຂອງ ສປປ ລາວ ເປັນຕົ້ນ ທະນາ ຄານແຫ່ງ ສປປ ລາວ, ກະຊວງການເງິນ, ກະຊວງເເຜນການແລະການລົງທຶນ, ກະຊວງອຸດສາຫະກໍາແລະການຄ້າ, ກະຊວງພະລັງງານແລະບໍ່ເເຮ່ ແລະ ບັນດາທະນາຄານທຸລະກິດຈໍານວນໜຶ່ງເພື່ອຕິດຕາມຄວາມຄືບໜ້າການຈັດຕັ້ງປະຕິບັດໜ້າວຽກຂອງເເຕ່ລະພາກສ່ວນທີ່ໄດ້ປະກອບສ່ວນໃຫ້ແກ່ການພັດທະນາເສດຖະກິດໂດຍລວມຂອງ ສປປ ລາວ.
ສຳລັບຜົນການປະເມີນເສດຖະກິດມະຫາພາກຂອງ ສປປ ລາວ, IMF ໄດ້ສະຫຼຸບວ່າ: ເສດຖະກິດຂອງ ສປປ ລາວ ກໍ່ຄືຫຼາຍປະເທດໃນທົ່ວໂລກໄດ້ຮັບຜົນກະທົບຈາກການແພ່ລະບາດໂຄວິດ-19 ສົ່ງຜົນໃຫ້ ການຂະຫຍາຍຕົວຂອງເສດຖະກິດມີຈັງຫວະຊ້າລົງ. ປີ 2021, IMF ຄາດວ່າ ເສດຖະກິດ ສປປ ລາວ ຈະຂະຫຍາຍຕົວໃນອັດຕາ 2,1% ແລະ ຈະເພິ່ມເປັນ 3% ໃນປີ 2022ໂດຍມີຂະເເໜງກະສິກໍາ ແລະ ອຸດສາຫະກໍາເປັນຕົວຂັບເຂື່ອນການຂະຫຍາຍຕົວ. ພ້ອມນີ້ IMF ຍັງເຫັນວ່າການຂະຫຍາຍຕົວຂອງເສດຖະກິດ ສປປ ລາວ ຍັງມີບາງຄວາມສ່ຽງຈາກພາຍໃນ ແລະ ພາຍນອກທີ່ອາດຈະສົ່ງຜົນຕໍ່ການຂະ ຫຍາຍຕົວຂອງເສດຖະກິດໃນໄລຍະຍາວ ເປັນຕົ້ນ ອັດຕາເງິນເຟີ້ທີ່ເພີ່ມຂຶ້ນ, ອັດຕາແລກປ່ຽນທີ່ປ່ຽນແປງແລະ ອື່ນໆ.
ທ່ານ ສອນໄຊ ສິດພະໄຊ ຜູ້ວ່າການທະນາຄານແຫ່ງ ສປປ ລາວ ໄດ້ສະເເດງທັດສະນະຢ່າງໜັກ ແໜ້ນຕໍ່ຄວາມຕັ້ງໃຈຂອງລັດຖະບານ ສປປ ລາວ ເວົ້າລວມ ເວົ້າສະເພາະກໍຄືກະຊວງກ່ຽວຂ້ອງ ໃນການຮັບມືກັບບັນດາຄວາມສ່ຽງດ້ານຕ່າງໆ ໂດຍສະເພາະການກຳນົດວາລະແຫ່ງຊາດ ເພື່ອຮັບປະກັນໃຫ້ການຂະຫຍາຍຕົວຂອງເສດຖະກິດດໍາເນີນໄປດ້ວຍຄວາມເຂັ້ມເເຂງ ແລະ ຍຶນຍົງ. ທັງນີ້ເພື່ອສ້າງຄວາມເຊື່ອໝັ້ນໃຫ້ສາກົນ ກໍຄືນັກລົງທຶນທັງພາຍໃນ ແລະ ຕ່າງປະເທດ.
ຕອນທ້າຍກອງປະຊຸມ, ທ່ານຜູ້ວ່າການທະນາຄານແຫ່ງ ສປປ ລາວໄດ້ກ່າວຄໍາຂອບໃຈຕໍ່ຫ້ອງການ IMF ພ້ອມດ້ວຍຄະນະທີ່ໄດ້ເອົາໃຈໃສ່ຕິດຕາມປະເມີນ ແລະ ໃຫ້ຄຳແນະນຳການພັດທະນາເສດຖະກິດມະຫາພາກຂອງ ສປປ ລາວ.ພ້ອມທັງຕີລາຄາສູງຕໍ່ການຊ່ວຍເຫຼືອດ້ານວິຊາການ ຈາກກອງທຶນການເງິນສາກົນ ເພື່ອຂ້າງຂີດຄວາມສາມາດຕໍ່ວຽກງານເສດຖະກິດມະຫາພາກ ໃນໄລຍະຜ່ານມາ.
ການປະເມີນສະພາບເສດຖະກິດພາຍໃຕ້ມາດຕາ IV ຂອງກອງທຶນການເງິນສາກົນແມ່ນວາລະສໍາຄັນທີ່ໄດ້ຈັດຕັ້ງປະຕິບັດແຕ່ລະປີເພື່ອປະເມີນສະພາບເສດຖະກິດມະຫາພາກຂອງປະເທດສະມາຊິກພ້ອມທັງໃຫ້ຄໍາແນະນໍາການສ້າງເຄື່ອງມື ແລະ ວາງນະໂຍບາຍຄຸ້ມຄອງເສດຖະກິດມະຫາພາກຂອງປະເທດໃຫ້ເຂັ້ມແຂງ.
