ສັ່ງປິດຮ້ານອານຫານຕັ້ງຫລັກຊົ່ວຄາວ ຍ້ອນລະເມີດຄຳສັ່ງຄວບຄຸມໂຄວິດ-19

ທ່ຽງຄືນວັນທີ 19 ທັນວາ ຜ່ານມານີ້ ເຈົ້າໜ້າທີ່ ກອງປ້ອງກັນເຄື່ອນທີ່ ປກສ ນະຄອນຫລວງວຽງຈັນແລະ ປກສ ກຸ່ມສວນມອນ ພ້ອມ ການຈັດຕັ້ງບ້ານດົງສະຫວາດ ໄດ້ລົງກວດກາ ຮ້ານອາຫານຕັ້ງຫລັກຕັ້ງຢູ່ບ້ານດົງສະຫວາດ, ເມືອງສີສັດຕະນາກ ນະຄອນຫລວງວຽງຈັນ ພົບເຫັນ ການເປີດໃຫ້ບໍລິການເກີນໂມງເວລາທີ່ກຳນົດ ແລະ ໃຫ້ ບໍລິການເຄື່ອງດື່ມທີ່ມີທາດເຫລົ້າ, ເບຍ; ເຊິ່ງເປັນການລະເມີດຕໍ່ຄໍາສັ່ງ,ກໍຄື ແຈ້ງການຂອງຄະນະສະເພາະກິດ ຕ້ານການລະບາດຂອງພະຍາດໂຄວິດ-19 ນະຄອນຫລວງວຽງຈັນ ວາງອອກ.

ພັທ ວິລະບຸດ ໄຊຍະວົງ ຫົວໜ້າຫ້ອງການ  ປກສ ເມືອງສີສັດຕະນາກ  ໃຫ້ຮູ້ວ່າ: ໃນມື້ດັ່ງກ່າວໄດ້ພົບເຫັນລູກຄ້າຢູ່ໃນຮ້ານປະມານ 150 ຄົນ ໄດ້ມີການດື່ມເຫລົ້າເບຍ ຢ່າງເມົາມວນ ແລະ ເຈົ້າໜ້າທີ່ຈິ່ງໄດ້ເຮັດບົດບັນທຶກໄວ້ເປັນຫລັກຖານ ແລະ ໄດ້ສັ່ງໃຫ້ປິດບໍລິການຊົ່ວຄາວເພື່ອປັບປຸງປ່ຽນແປງ.