ປະກາດຮັບຄະດີປົກຄອງຢ່າງເປັນທາງການ ເນັ້ນສ້າງລັດທີ່ປົກຄອງດ້ວຍກົດໝາຍ ປົກປ້ອງສິດ ແລະ ຜົນປະໂຫຍດອັນຊອບທຳຂອງພົນລະເມືອງ

ວັນທີ 22 ທັນວາ 2021 ນີ້ ສານປະຊາຊົນສູງສຸດ ໄດ້ຈັດພິທີປະກາດຮັບຄະດີປົກຄອງມາຕັດສິນຕາມກົດໝາຍ ຢ່າງເປັນທາງການ ພາຍໃຕ້ການເປັນປະທານ ທ່ານ ນາງ ວຽງທອງ ສີພັນດອນ ຄະນະເລຂາທິການສູນກາງພັກ ປະທານສານປະຊາຊົນສູງສຸດ ຊຶ່ງມີລັດຖະມົນຕີ, ຮອງລັດຖະມົນຕີ, ກຳມາທິການສະພາແຫ່ງຊາດ, ພະນັກງານຂອງສານ ແລະ ພາກສ່ວນກ່ຽວຂ້ອງ, ອົງການສາກົນ ຜູ້ໃຫ້ການສະໜັບສະໜູນເຂົ້າຮ່ວມ.

ທ່ານ ນາງ ວຽງທອງ ສີພັນດອນ ກ່າວວ່າ: ພັກ-ລັດຖະບານ ຢາມໃດກໍຖືເອົາການຄຸ້ມຄອງລັດ ແລະ ຄຸ້ມຄອງສັງຄົມ ດ້ວຍກົດໝາຍ ເປັນບັນຫາສຳຄັນ ໄປຄ່ຽງຄູ່ກັບການປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ມີຄວາມໝັ້ນຄົງທາງດ້ານການເມືອງ, ເສດຖະກິດມີການຂະຫຍາຍຕົວ, ສັງຄົມສີວິໄລ ແລະ ປົກປັກຮັກສາສິ່ງແວດ ລ້ອມໃຫ້ມີຄວາມຍືນຍົງ, ສະແດງອອກລັດໄດ້ກຳນົດລະບຽບການ, ສະໜອງງົບປະມານ ສ້າງ ແລະ ຝຶກອົບຮົມບຸກຄະລາກອນ, ອຳນວຍຄວາມສະດວກດ້ານພາຫະນະ ແລະ ອຸປະກອນ ເພື່ອໃຫ້ການພິຈາລະນາແກ້ໄຂ ຫຼື ຕັດສິນຄະດີ ໃຫ້ມີຄວາມຖືກຕ້ອງ, ວ່ອງໄວ, ໂປ່ງໃສ ແລະ ຍຸຕິທຳ ຕາມທີ່ໄດ້ກຳນົດໄວ້ໃນແຜນພັດທະນາລະບົບສານປະຊາຊົນ ໃນໄລຍະ 5 ປີ (2021-2025) ທີ່ໄດ້ຮັບຮອງ.

ການດຳເນີນຄະດີປົກຄອງ ແມ່ນເພື່ອປົກປ້ອງສິດ ແລະ ຜົນປະໂຫຍດອັນຊອບທຳຂອງພົນລະເມືອງ, ພະນັກງານ-ລັດຖະກອນ, ອົງການຈັດຕັ້ງລັດ ພາຍໃຕ້ລັດຖະທຳມະນູນ ແນໃສ່ເພີ່ມທະວີຈຳກັດ ແລະ ສະກັດກັ້ນການລະເມີດກົດໝາຍ, ສຶກສາອົບຮົມສະຕິເຄົາລົບ ແລະ ປະຕິບັດກົດໝາຍຢ່າງເຂັ້ມງວດ ປະກອບສ່ວນໃນການພັດທະນາເສດຖະກິດ-ສັງຄົມຂອງຊາດ ແລະ ສ້າງລັດທີ່ປົກຄອງດ້ວຍກົດໝາຍ.

ການດຳເນີນຄະດີປົກຄອງແມ່ນການເຄື່ອນໄຫວ ແລະ ຄວາມຮັບຜິດຊອບຂອງຄະນະສານປົກຄອງ, ອົງການໄອຍະການປະຊາຊົນ ແລະ ຜູ້ເຂົ້າຮ່ວມໃນການດຳເນີນຄະດີ ເພື່ອພິຈາລະນາແກ້ໄຂ ຫຼື ຕັດສິນຄະດີປົກຄອງຕາມທີ່ໄດ້ກຳນົດໄວ້ ໃນລັດຖະບັນຍັດຂອງປະທານປະເທດ ສະບັບເລກທີ 001/ປທ, ລົງວັນທີ 19 ມີນາ 2021 ຊຶ່ງຄະນະປະຈຳສະພາແຫ່ງຊາດໄດ້ອອກມະຕິ ສະບັບ ເລກທີ 15/ຄປຈ, ລົງວັນທີ 7 ກຸມພາ 2019 ຮັບຮອງການສ້າງຕັ້ງຄະນະສານປົກຄອງຢູ່ສານປະຊາຊົນສູງສຸດ,ສານປະຊາຊົນພາກກາງ ແລະ ສານປະຊາຊົນ ນະຄອນຫຼວງວຽງຈັນ. ການດຳເນີນຄະດີປົກຄອງປະກອບມີ 3 ຂັ້ນ ຄືກັບການດຳເນີນຄະດີອື່ນໆ ໂດຍເລີ່ມຈາກການດຳເນີນຄະດີຢູ່ສານຂັ້ນຕົ້ນ (ສານນະຄອນ ຫຼວງວຽງຈັນ) ໄປສູ່ການດຳເນີນຄະດີໃນຂັ້ນອຸທອນ (ສານປະຊາຊົນພາກກາງ) ແລະ ຈົນເຖິງການດຳ ເນີນຄະດີໃນສານຂັ້ນລົບລ້າງ ແລະ ສານຂັ້ນຮື້ຟື້ນ (ສານປະຊາຊົນສູງສຸດ).