WHO ຮຽກຮ້ອງທົ່ວໂລກ ຍົກເລີກແຜນຈັດງານສະຫລອງມື້ພັກ ເພື່ອປົກປ້ອງລະບົບສາທາລະນະສຸກ ຢ້ານໂອມິຄຣອນລະບາດໜັກ
ດຣ. ທີໂດຣສ ອັດຮານອມ ກີບຣີເຢຊຸສ ຜູ້ອຳນວຍການອົງການອະນາໄມໂລກ (WHO) ຖະແຫລງຮຽກຮ້ອງໃຫ້ປະຊາຊົນທົ່ວໂລກຍົກເລີກແຜນຈັດງານສະເຫລີມສະຫລອງໃນມື້ພັກທີ່ກຳລັງຈະມາເຖິງ ເພື່ອປົກປ້ອງລະບົບສາທາລະນະສຸກ ທ່າມກາງຄວາມກັງວົນຕໍ່ສະຖານະການແຜ່ລະບາດທີ່ວ່ອງໄວຂອງເຊື້ອໂຄວິດສາຍພັນໂອມິຄຣອນໃນຫລາຍປະເທດທົ່ວໂລກ.
ຄວາມເຫັນຂອງ ດຣ. ທີໂດຣສ ມີຂຶ້ນໃນຂະນະທີ່ສູນຄວບຄຸມ ແລະ ປ້ອງກັນພະຍາດລະບາດຂອງອາເມລິກາ ຫລື CDC ລາຍງານວ່າ: ໂອມິຄຣອນກຳລັງກາຍມາເປັນໂຄວິດສາຍພັນຫລັກທີ່ລະບາດໃນອາເມລິກາແທນເດວຕາ ຫລັງພົບຜູ້ຕິດເຊື້ອໂອມິຄຣອນຫລາຍກວ່າ 73% ໃນຜູ້ຕິດເຊື້ອໃໝ່ ແລະ ຫລ້າສຸດຍັງພົບຜູ້ເສຍຊີວິດຈາກໂອມິຄຣອນຄົນທຳອິດ ເປັນຜູ້ຊາຍໃນລັດເທັກຊັສທີ່ເຄີຍຕິດໂຄວິດມາກ່ອນ ແຕ່ຍັງບໍ່ໄດ້ສັກວັກຊີນ.
ດ້ານທຳນຽບຂາວຂອງອາເມລິກາ ເຜີຍທ່າທີໃນວັນທີ 20 ທັນວາວ່າ: ປະທານາທິບໍດີ ໂຈ ໄບເດນ ບໍ່ມີແຜນຈະໃຊ້ມາດຕະການລັອກດາວທົ່ວປະເທດ ເຖິງວ່າ ດຣ. ແອນໂທນີ ເຟົາຊີ ທີ່ປຶກສາລະດັບສູງດ້ານພະຍາດຕິດເຊື້ອຂອງທຳນຽບຂາວ ຈະເຕືອນວ່າ: ການເດີນທາງຂອງປະຊາຊົນໃນຊ່ວງຄຣິສມາສຈະຍິ່ງສົ່ງຜົນໃຫ້ມີການແຜ່ລະບາດຂອງເຊື້ອໂອມິຄຣອນຫລາຍຂຶ້ນ ບໍ່ເວັ້ນແຕ່ໃນກຸ່ມຜູ້ສັກວັກຊີນຄົນໂດສແລ້ວ.
ສ່ວນຢູ່ອັງກິດ, ນາຍົກລັດຖະມົນຕີ ບໍຣິສ ຈອນສັນ ກ່າວໃນວັນທີ 20 ທັນວາວ່າ: ລັດຖະບານອາດນຳເອົາມາດຕະການໃໝ່ມາໃຊ້ ເພື່ອປ້ອງກັນການລະບາດຂອງໂອມິຄຣອນທີ່ເພີ່ມຂຶ້ນ ໂດຍຫລ້າສຸດພົບຜູ້ຕິດເຊື້ອທົ່ວປະເທດແລ້ວ 45.000 ກວ່າຄົນ ເຊິ່ງໃນວັນທີ 19 ທັນວາ ພຽງວັນດຽວມີລາຍງານພົບຜູ້ຕິດເຊື້ອໂອມິຄຣອນຫລາຍກວ່າ 8.000 ຄົນ.
ຂະນະທີ່ຜົນຈາກການແຜ່ລະບາດທີ່ວ່ອງໄວ ເຮັດໃຫ້ເຈົ້າຄອງນະຄອນຫລວງລອນດອນຕ້ອງປະກາດຍົກເລີກການຈັດງານສະຫລອງປີໃໝ່ຢູ່ຈະຕຸລັດທຣາວກາ ເພື່ອຄວາມປອດໄພຂອງປະຊາຊົນ.
ເຊິ່ງນອກຈາກນີ້ ຍັງມີຫລາຍປະເທດເຊັ່ນ: ຝຣັ່ງ ແລະ ເຢຍລະມັນ ທີ່ຕັດສິນໃຈເພີ່ມການເຂັ້ມງວດມາດຕະການປ້ອງກັນ ແລະ ຄວບຄຸມການລະບາດຂອງໂຄວິດ ແລະ ຈຳກັດການເດີນທາງຂອງປະຊາຊົນໃນຊ່ວງຄຣິສມາສ ໂດຍເນເທີແລນໄດ້ເລີ່ມໃຊ້ມາດຕະການລັອກດາວໃນຊ່ວງຄຣິສມາສແລ້ວ ທ່າມກາງຄວາມກັງວົນຕໍ່ການແຜ່ລະບາດຂອງໂອມິຄຣອນ.
ອ້າງອີງ:
https://www.bbc.com/news/world-59733716
