ເຈົ້າໜ້າທີ່ເລັ່ງນຳຈັບຕົວຜູ້ຂົນສົ່ງຢາເສບຕິດຈຳນວນຫລາຍຢູ່ດ່ານສາກົນບໍ່ເຕັນ

ເຈົ້າໜ້າທີ່ກົມຕຳຫລວດສະກັດກັ້ນ ແລະ ປາບປາມຢາເສບຕິດກະຊວງປ້ອງກັນຄວາມສະຫງົບ ໃຫ້ຮູ້ວ່າ: ປັດຈຸບັນໄດ້ສົ່ງພະນັກງານລົງປະສານສົມທົບກັບເຈົ້າໜ້າທີ່ ປກສ ແຂວງຫລວງນ້ຳທາ ເພື່ອເລັ່ງນຳຈັບຕົວຜູ້ຂົນສົ່ງຢາເສບຕິດທີ່ພວມເອົາຕົວຫລົບໜີ, ພາຍຫລັງເຈົ້າໜ້າທີ່ຢຶດຂອງກາງໄດ້ຈຳນວນຫລາຍທີ່ດ່ານສາກົນບໍ່ເຕັນແຂວງຫລວງນ້ຳທາ ເມື່ອວັນທີ 26 ກໍລະກົດຜ່ານມາ, ຂະນະກວດກາລົດຄັນໜຶ່ງທີ່ຕ້ອງສົງໃສ, ຈຶ່ງໄດ້ກັກລົດຄັນດັ່ງກ່າວໄວ້ຊົ່ວຄາວເພື່ອທຳການກວດກາລະອຽດ, ແຕ່ຕໍ່ມາເຈົ້າຂອງລົດໄດ້ເອົາໂຕຫລົບໜີ ແລະ ຈາກນັ້ນ, ເຈົ້າໜ້າທີ່ພາສີ ແລະ ຕຳຫລວດ ໄດ້ດຳເນີນການກວດກາລົດຄັນດັ່ງກ່າວ, ພົບຢາບ້າຊຸກເຊື່ອງຢູ່ພາຍໃນລົດຈຳນວນ 362 ຖົງ, ມີຈຳນວນ 2.172.000 ເມັດ, ພ້ອມທັງເງີນສົດຈຳນວນໜຶ່ງ, ພ້ອມມີບັດ ATM ຈຳນວນ 3 ບັດ ແລະ ກະແຈລົດຍີ່ຫໍ້ຮຸນໄດ 1 ອັນ.

ເຈົ້າໜ້າທີ່ໃຫ້ຮູ້ວ່າ: ພາຍຫລັງທີ່ໄດ້ມີການກວດຄົ້ນສໍາເລັດແລ້ວ ພາກສ່ວນພາສີປະຈໍາດ່ານສາກົນບໍ່ເຕັນ ກໍໄດ້ມອບສິ່ງຂອງທີ່ຜິດກົດໝາຍດັ່ງກ່າວ ໃຫ້ກໍາລັງປ້ອງກັນຄວາມສະຫງົບແຂວງຫລວງນໍ້າທາເພື່ອນໍາໄປແກ້ໄຂຕາມລະບຽບກົດໝາຍຕໍ່ໄປ.