ໂຄວິດ-19 ລະບາດ ລາຍຮັບຂະແໜງການທ່ອງທ່ຽວຫລຸດເກືອບ 65%

ທ່ານ ນາງສວນສະຫວັນ ວິຍະເກດ ລັດຖະມົນຕີກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ລາຍງານໃນໂອກາດຖະແຫລງຂ່າວເປີດການຕ້ອນຮັບນັກທ່ອງທ່ຽວຈາກຕ່າງປະເທດໃນເຂດທ່ອງທ່ຽວສີຂຽວ ວັນທີ 17 ທັນວາ 2021 ທີ່ຫໍປະຊຸມແຫ່ງຊາດ, ນະຄອນຫລວງວຽງຈັນ ໂດຍຊີ້ໃຫ້ເຫັນວ່າ: ຈາກການລະບາດຂອງພະຍາດໂຄວິດ-19 ເກືອບ 2 ປີຜ່ານມາໄດ້ສົ່ງຜົນກະທົບຢ່າງຫລວງຫລາຍຕໍ່ການພັດທະນາເສດຖະກິດ-ສັງຄົມຂອງປະເທດ ກໍຄືຂະແໜງການທ່ອງທ່ຽວໄດ້ຮັບຜົນກະທົບຢ່າງໜັກ ຊຶ່ງເຫັນໄດ້ຈາກຜົນການສໍາຫລວດທີ່ຢັ້ງຢືນວ່າ:ລາຍຮັບໃນຂະແໜງການທ່ອງທ່ຽວຫລຸດລົງສະເລ່ຍເກືອບ 65%. ຂະນະດຽວກັນຜູ້ປະກອບການໄດ້ໃຊ້ມາດຕະການຕ່າງໆເພື່ອປະຄັບປະຄອງທຸລະກິດຂອງຕົນເຊັ່ນ: ຫລຸດ ຈໍານວນພະນັກງານລົງ 62%, ຫລຸດຄ່າຈ້າງງານ 36%, ຫລຸດຊົ່ວໂມງດໍາເນີນກິດຈະການ 37%, ບາງທຸລະກິດຈໍາເປັນໄດ້ເພີ່ມການກູ້ຢືມເງິນ 4,7%, ຫົວໜ່ວຍທຸລະກິດຈໍານວນບໍ່ໜ້ອຍຕ້ອງປິດກິດຈະການຫລືຕ້ອງຫັນຈາກທຸລະກິດການບໍລິການໄປສູ່ທຸລະກິດອື່ນເພື່ອສາມາດປະຄັບປະຄອງການຢູ່ລອດ.

ຈາກນີ້ໄປຍັງອີກ 10 ກວ່າມື້ ກໍຈະເປີດປະເທດແລ້ວ ຊຶ່ງຫລາຍພາກສ່ວນທົ່ວສັງຄົມໂດຍສະເພາະບັນ ດາບໍລິສັດທ່ອງທ່ຽວ ບໍລິສັດນຳທ່ຽວ ຫລື ທຸລະກິດບໍລິການການທ່ອງທ່ຽວ ຕ່າງຫ້ງຫາກະກຽມສິ່ງດີໆສິ່ງໃໝ່ໆເພື່ອຮອງຮັບ ຫລື ຕ້ອນຮັບນັກທ່ອງທ່ຽວຢ່າງໜ້າຊື່ນຕາຫວານ ລວມທັງທຸກພາກສ່ວນທົ່ວສັງຄົມກໍບໍ່ລະເຫລີງເລື່ອງການປະຕິບັດມາດຕະການປ້ອງກັນ, ສະກັດກັ້ນ, ຄວບຄຸມ ແລະ ແກ້ໄຂການລະບາດ ພະຍາດໂຄວິດ-19 ຢ່າງເຂັ້ມງວດ, ບັນຫາໜ້າຕາ ທັດສະນີຍະພາບຂອງບ້ານເມືອງ ກໍບໍ່ຄວນເບິ່ງຂ້າມ ດັ່ງສະພາບນີ້ຢູ່……ຕ້ອງໄດ້ແກ້ໄຂໄປພ້ອມໆກັນ.