ນັກວິທະຍາສາດອັງກິດພັດທະນາເຕັກໂນໂລຊີ ສັກວັກຊີນປ້ອງກັນໂຄວິດແບບບໍ່ອາໄສເຂັມສັກຢາ ເລີ່ມທົດລອງໃນມະນຸດແລ້ວ
ນັກວິທະຍາສາດອັງກິດພັດທະນາວັກຊີນປ້ອງກັນໂຄວິດ-19 ທີ່ໃຊ້ເຕັກໂນໂລຊີນຳເຂົ້າສູ່ຮ່າງກາຍ ໂດຍຂັບເຄື່ອນດ້ວຍອາກາດ ບໍ່ຕ້ອງອາໄສເຂັມສັກຢາ, ຄາດຈະມາເປັນຕົວປ່ຽນເກມ ເພີ່ມອັດຕາການສັກວັກຊີນທົ່ວໂລກ.
ວັນທີ 15 ທັນວາ 2021, ສຳນັກຂ່າວຕ່າງປະເທດລາຍງານວ່າ: ນັກວິທະຍາສາດຈາກມະຫາວິທະຍາເຄມບຣິດ ມີການພັດທະນາວັກຊີນປ້ອງກັນໂຄວິດ-19 ຊະນິດໃໝ່ທີ່ໃຊ້ວິທີການນຳເຂົ້າສູ່ຮ່າງກາຍດ້ວຍວິທີການຂັບເຄື່ອນໂດຍອາກາດ ບໍ່ຕ້ອງອາໄສເຂັມສັກຢາ ເພື່ອຫລຸດການສິ້ນເປືອງຊັບພະຍາກອນທາງການແພດ ແລະ ກະຕຸ້ນໃຫ້ຄົນທີ່ຢ້ານເຂັມສັກຢາອອກມາສັກວັກຊີນຫລາຍຂຶ້ນ.
ເຕັກໂນໂລຊີການສັກວັກຊີນແບບໃໝ່ນີ້ມີຊື່ວ່າ: DIOSvax ພັດທະນາໂດຍສາສະດາຈານ ໂຈນາທານ ຮີນີ ປັດຈຸບັນກຳລັງຢູ່ລະຫວ່າງການທົດລອງກັບກຸ່ມອາສາສະໝັກອາຍຸ 18-50 ປີ.
ສາສະດາຈານ ຮີນີ ກ່າວວ່າ: “ພາຍຫລັງເກີດການລະບາດຂອງໂຄວິດ-19 ວົງການແພດທົ່ວໂລກໄດ້ຕອບສະໜອງຕໍ່ການແຜ່ລະບາດຂອງເຊື້ອໄວຣັສ ແລະ ພັດທະນາວັກຊີນຂຶ້ນມາໄດ້ຢ່າງວ່ອງໄວຈົນໜ້າເຫລືອເຊື່ອ, ແຕ່ເມື່ອມີໄວຣັສສາຍພັນໃໝ່ໆປາກົດຂຶ້ນມາ ແລະ ພູມຕ້ານທານຈາກວັກຊີນເລີ່ມຫລຸດລົງ ເຮົາຈຳເປັນຕ້ອງຊອກຫາເຕັກໂນໂລຊີໃໝ່ກວ່າ”.
“ວັກຊີນຂອງເຮົາເປັນນະວັດຕະກຳໃໝ່ ທັງໃນດ້ານຂອງການກະຕຸ້ນພູມຕ້ານທານ ແລະ ວິທີການສົ່ງວັກຊີນເຂົ້າສູ່ຮ່າງກາຍ ສິ່ງສຳຄັນຄື ເຮົາກຳລັງພັດທະນາວັກຊີນທີ່ຈະຊ່ວຍປົກປ້ອງມະນຸດບໍ່ພຽງແຕ່ຈາກໂຄວິດ-19 ສາຍພັນທີ່ພົບໃນປັດຈຸບັນ, ແຕ່ຍັງລວມເຖິງສາຍພັນທີ່ຈະເກີດຂຶ້ນມາໃນອະນາຄົດນຳອີກ” ສາສະດາຈານ ຮີນີ ລະບຸ.
ສາສະດາຈານ ຮີນີ ອະທິບາຍວ່າ: ໄວຣັສໂຄວິດ-19 ມີສ່ວນສຳຄັນຄືໂປຣຕີນສ່ວນໜາມ (spike protein) ທີ່ຈະເຂົ້າໄປຈັບກັບໂປຣຕີນ ACE2 ເທິງຜິວຂອງເຊລມະນຸດ ເຊິ່ງເຮັດໃຫ້ໄວຣັສສາມາດເຂົ້າສູ່ເຊລມະນຸດເພື່ອສ້າງສຳເນົາຕົນເອງ ແລະ ແຜ່ກະຈາຍອອກໄປສ່ວນຕ່າງໆຂອງຮ່າງກາຍ.
ການຜະລິດວັກຊີນທີ່ໃຊ້ກັນໃນປັດຈຸບັນ ຈຶ່ງເປັນການພັດທະນາໂດຍການນຳຢືນຈາກໂປຣຕີນສ່ວນໜາມມາເຂົ້າລະຫັດແອນຕິເຈນເພື່ອກະຕຸ້ນໃຫ້ລະບົບພູມຕ້ານທານຂອງຮ່າງກາຍມະນຸດຜະລິດແອນຕິບໍດີ, ແຕ່ໜ້າເສຍດາຍທີ່ໄວຣັສມີການກາຍພັນຢ່າງຕໍ່ເນື່ອງ ແລະ ໂປຣຕີນສ່ວນໜາມຂອງໄວຣັສກໍມີຮູບແບບທີ່ປ່ຽນໄປ ແລະ ການປ່ຽນແປງໂປຣຕີນສ່ວນໜາມຂອງໄວຣັສນີ້ເອງເຮັດໃຫ້ເກີດການຫລົບຫລີກລະບົບພູມຕ້ານທານຈາກວັກຊີນ.
ສາສະດາຈານ ຮີນີ ກ່າວອີກວ່າ: ວັກຊີນຊະນິດໃໝ່ທີ່ກຳລັງພັດທະນາຢູ່ນີ້ ໃຊ້ວິທີການຄາດການ ເພື່ອຈຳລອງແອນຕິເຈນໃນຕະກູນໂຄໂຣນາໄວຣັສ ກຸ່ມຜູ້ພັດທະນາຈຶ່ງຫວັງວ່າວິທີການນີ້ຈະຊ່ວຍເພີ່ມການປົກປ້ອງຈາກໄວຣັສໄດ້ຫລາຍຂຶ້ນ.
ທັງນີ້, ກຸ່ມນັກວິທະຍາສາດທີ່ເຮັດການວິໄຈວັກຊີນດັ່ງກ່າວຄາດວ່າ: ຖ້າການພັດທະນາວັກຊີນປະສົບຜົນສຳເລັດ ຈະເຂົ້າມາເປັນຕົວປ່ຽນເກມໃນອະນາຄົດ ແລະ ຈະມີສ່ວນສຳຄັນທີ່ຈະຊ່ວຍເພີ່ມອັດຕາການສັກວັກຊີນທົ່ວໂລກ ໂດຍສະເພາະໃນປະເທດທີ່ມີລາຍໄດ້ຕໍ່າ ແລະ ລາຍໄດ້ປານກາງ.
ອ້າງອີງ:
https://www.bbc.com/news/uk-england-59642182
https://www.ndtv.com/…/needle-free-air-powered-covid…?
