ລະວັງ ! ມິດສາຊີບ ຕົວະໃຫ້ໂອນເງິນຄ່າທຳນຽມເພື່ອແລກຮັບຂອງມີຄ່າຈຳນວນຫລາຍຈາກຕ່າງປະເທດ
ໃນຍຸກປັດຈຸບັນ ທີ່ສື່ສັງຄົມອອນລາຍເຂົ້າມາອິດທິພົນໃນການດຳຊີວິດຈຳວັນຂອງຄົນເຮົານັບມື້ຫລາຍຂຶ້ນ ເຊິ່ງມີດ້ານດີ ແລະ ຂໍ້ເສຍ ແຕກຕ່ງກັນຫລາຍຢ່າງ, ແຕ່ກົງກັນຂ້າມກັບດ້ານດີກໍມີຄົນສວຍໃຊ້ຊ່ອງທາງອອນລາຍຕົວະຍົວະ ຫລອກລວງໃຫ້ຄົນໂອນເງິນໃຫ້ເຂົາເຈົ້າ. ດັ່ງໄລຍະນີ້ໄດ້ມີປາກົດການຄົນບໍ່ຫວັງດີໃຊ້ວິທີສົ່ງຂໍ້ຄວາມຫາບຸກຄົນທົ່ວໄປເປັນວົງກ້ວາງກັບມາ ໂດຍຜ່ານຊ່ອງທາງເມສເຊັນເຈີ, ວອດແອັບ ແລະ ທາງລາຍ ດ້ວຍກົນອຸບາຍຕ່າງໆນາໆ ເພື່ອສ້າງຄວາມສະນິດສະໜົມລຶ້ງເຄີຍ ຍິ່ງໄປກວ່ານັ້ນແມ່ນມີໃນຮູບແບບໂອ້ລົມບ່າວສາວ, ຄູ່ຮັກ ຈົນເຮັດໃຫ້ຜູ້ທີ່ຕົກເປັນເຫຍື່ອນັ້ນຕາຍໃຈ ແລ້ວບອກວ່າຈະຝາກສິ່ງທີ່ມີຄ່າຈາກຕ່າງປະເທດມາໃຫ້ ເຊັ່ນ: ເງິນ, ຄຳ, ລົດ, ໂທລະສັບ ແລະ ອື່ນໆຂອງທີ່ມີມູນຄ່າສູງຕ່າງໆ ໂດຍການຖ່າຍຮູບວັດຖຸດັ່ງກ່າວນັ້ນມາໃຫ້ເບິ່ງ ແລະ ນັດມື້ວ່າຈະໄປຝາກເຄື່ອງມາໃຫ້ ແລະ ອ້າງວ່າມີຄ່າທຳນຽມ, ຄ່າເອກະສານ…ໃນການຮັບເຄື່ອງ ໂດຍຜູ້ທີ່ຈະຮັບເຄື່ອງປາຍທາງຕ້ອງໄດ້ຈ່າຍ ຫລື ໂອນເງິນໄປໃຫ້ເຂົາເຈົ້າກ່ອນຈຳນວນໜຶ່ງ ເພື່ອທາງບໍລິສັດຂົ່ນສົ່ງຈະສາມາດສົ່ງເຄື່ອງມາໃຫ້ໄດ້ ແລະ ຖືກຕ້ອງຕາມສະຖານທີ່ຢູ່ຈຸດຮັບເຄື່ອງຂອງບຸກຄົນນັ້ນ, ເຊິ່ງຄ່າທຳນຽມທີ່ກຸ່ມຄົນຫລອກລວງເຫລົ່ານັ້ນ ບອກໂອນໃຫ້ເຂົາແຕ່ລະຄົນຈຳນວນເງິນແມ່ນຈະບໍ່ເທົ່າກັນ ບາງກໍລະນີອາດເປັນສະກຸນກີບ, ເງິນບາດ ແລະ ເງິນໂດລາ.
ກຸ່ມມິດສາຊີບຕົວະຍົວະຫລອກຫລວງ ໃຫ້ໂອນເງິນໃຫ້ຊຶ່ງເງິນທີ່ມິດສາຊີບໃຊ້ຊ່ອງທາງອອນລາຍໃຫ້ກຸ່ມຕົກເປັນເຫຍື່ອນັ້ນມີຫລາຍຮູບແບບບໍ່ວ່າຈະເປັນເງິນຄ່າທຳນຽມ ເງິນຄ່າເອກະສານ…ບາງກໍລະນີກໍມາໃນຮູບແບບປ່ອຍເງິນກູ້ ໂດຍຫລອກຄົນທີ່ກຳລັງເດືອດຮ້ອນໃນໄລຍະເຈັບເປັນ ຕ້ອງການເງິນມາປິ່ນປົວຕົນເອງ ຊຶ່ງຄົນເຮົາເມື່ອເຈັບເປັນຕ້ອງໃຊ້ໝໍປິ່ນປົວ ແຕ່ບໍ່ມີເງິນນີ້ຕິໝໍບໍ່ສາມາດ ຊ່ວຍໄດ້ ທາງດຽວຄືກູ້ ຊຶ່ງກໍເປັນຈັງຫວະຂອງກຸ່ມມິດສາຊີບສວຍໂອກາດໄດ້.
ດັ່ງນັ້ນ, ຈຶ່ງເຕືອນມາຍັງທຸກຄົນໃນທົ່ວສັງຄົມຕ້ອງມີສະຕິລະວັງຕົວຢ່າ ຕົກເປັນເຫຍື່ອຂອງຄົນບໍ່ດີດັ່ງກ່າວ ຖ້າມີຄົນບໍ່ຮູ້ຈັກກັນສົ່ງຂໍ້ຄວາມມາວ່າຈະຝາກເຄື່ອງຂອງມີຄ່າບໍ່ວ່າຈະເປັນເງິນ, ຄຳ ແລະ ວັດຖຸສິ່ງຂອງມີຄ່າຕ່າງໆແມ່ນຢ່າພາກັນຫລົງເຊື່ອເດັດຂາດເພາະບໍ່ມີໃຜຈະມາເອົາເງິນເອົາຄຳຝາກມາໃຫ້ເຮົາ ທັງໆທີ່ບໍ່ໄດ້ເປັນຍາດພີ່ນ້ອງກັນ ແລະ ບໍ່ໄດ້ຮູ້ຈັກກັນ.
