ສຳເລັດກອງປະຊຸມສະຫລຸບວຽກງານແຜນການ-ການລົງທຶນ ແລະ ການເງິນ ປະຈຳປີ 2021
ກອງປະຊຸມສະຫລຸບວຽກງານແຜນການ-ການລົງທຶນ ແລະ ການເງິນ ປະຈຳປີ 2021ແລະ ທິດທາງແຜນການປີ 2022 (ກອງປະຊຸມທາງໄກ) ໄດ້ອັດລົງໃນວັນທີວັນທີ 14 ທັນວາ ໂດຍການເປັນປະທານຂອງພະນະ ທ່ານ ພັນຄຳ ວິພາວັນ ນາຍົກລັດຖະມົນຕີແຫ່ງ ສປປ ລາວ , ໂດຍມີ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີກະຊວງແຜນ ການ ແລະ ການລົງທຶນ, ມີທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນ, ພ້ອມດ້ວຍບັນດາທ່ານ ລັດຖະມົນຕີ, ຫົວໜ້າອົງການລັດທຽບເທົ່າກະຊວງ ຂັ້ນສູນກາງ, ບັນດາທ່ານເຈົ້າແຂວງ, ຮອງລັດຖະມົນຕີ, ຮອງຫົວໜ້າອົງການລັດທຽບເທົ່ວກະຊວງ, ຮອງເຈົ້າແຂວງ, ຮອງເຈົ້າຄອງນະຄອນຫຼວງວຽງຈັນ, ຫົວໜ້າກົມ, ຮອງກົມ ແລະ ຫົວໜ້າພະແນກແຜນການ ແລະ ການລົງທຶນ ແລະ ພະນັກງານຫຼັກແຫຼ່ງຂອງຂະແໜງແຜນການ-ການເງິນ ໃນຂອບເຂດທົ່ວປະເທດ ເຂົ້າຮ່ວມໃນຮູບແບບກອງປະຊຸມປົກກະຕີ ແລະ ຜ່ານລະບົບກອງປະຊຸມທາງໄກ.
ທ່ານ ສອນໄຊ ສີພັນດອນ ລາຍງານຜົນກອງປະຊຸມ 2 ຂະແໜງການພ້ອມທັງສະເໜີທິດທາງ ແລະ ມາດຕະການຈຸດສຸມຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດປີ2022 ຜ່ານການປຶກສາຫາລືກັນ ໄດ້ເປັນເອກະພາບຕໍ່ການຕີລາຄາສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປີ 2021 ແລະ ທິດທາງຄາດໝາຍຂອງແຜນພັດທະນາເສດຖະກິດ-ສັງຄົມປີ 2022 ລວມທັງບັນດາຄາດໝາຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ໂດຍຈະໄດ້ພ້ອມກັນຍົກສູງກົນໄກການຄຸ້ມຄອງ ແລະ ຂອດການປະສານງານ-ປະສານສົມທົບລະຫວ່າງສູນກາງ ແລະ ທ້ອງຖິ່ນ ເປັນຕົ້ນຕັ້ງໜ້າຜັນຂະຫຍາຍ ແລະ ຈັດຕັ້ງປະຕິບັດກົດໝາຍ ແລະ ນິຕິກໍາໃຕ້ກົດໝາຍຕ່າງໆທີ່ໄດ້ວາງອອກແຕ່ລະໄລຍະ ເປັນຕົ້ນວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ຕິດພັນກັບຄວາມຮັບຜິດຊອບຂອງແຕ່ລະຂະແໜງການຂັ້ນສູນກາງ ແລະ ທ້ອງຖິ່ນ, ເປັນເອກະພາບສູງຕໍ່ການສະຫລຸບຕີລາຄາການຈັດຕັ້ງປະຕິບັດແຜນງົບປະມານແຫ່ງລັດປີ 2021ໂດຍສະເພາະ 14 ມາດ ຕະການທ້າຍປີ 2021 ແລະ 8 ມາດຕະການປີ 2022 ໃນການຄຸ້ມຄອງລາຍຮັບ ແລະ ລາຍຈ່າຍງົບປະ ມານແຫ່ງລັດ, ຕ້ານການຮົ່ວໄຫລລາຍຮັບງົບປະມານ.
ສຳລັບແຜນງົບປະມານແຫ່ງລັດປະຈຳປີ 2022 ແມ່ນແຜນທີ່ມີຄວາມທ້າທາຍສູງ ແຕ່ຕ້ອງໄດ້ສຸມທຸກກຳລັງແຮງເພື່ອຈັດຕັ້ງປະຕິບັດມາດຕະການຕ່າງໆເພື່ອສາມາດບັນລຸເປົ້າໝາຍ ແລະ ຄາດໝາຍຂອງແຜນພັດທະນາເສດຖະກິດ-ສັງຄົມ ແລະ ແຜນງົບປະ ມານແຫ່ງລັດ ປີ 2022 ຢ່າງຈົບງາມ, ຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງ ຍາກດ້ານເສດຖະກິດ ແລະ ການເງິນ, ວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດເພື່ອເຮັດໃຫ້ເສດຖະກິດສືບຕໍ່ຂະຫຍາຍຕົວຕາມທິດຍືນຍົງ ແລະ ສີຂຽວ ຮັບປະກັນໃຫ້ຊີວິດການເປັນຢູ່ຂອງປະຊາຊົນບັນດາເຜົ່າດີຂຶ້ນເປັນກ້າວໆ.
