ເລີ່ມແຕ່ວັນທີ 13 ທັນວາ 2021 ນີ້, ຜູ້ຕິດເຊື້ອພະຍາດໂຄວິດ-19 ຢູ່ແຂວງວຽງຈັນຕ້ອງໄດ້ຈ່າຍຄ່າອາຫານ ແລະ ນ້ຳດື່ມ ໃນໄລຍະກັກຕົນຢູ່ສູນ
ເນື່ອງຈາກ ອົງການກາແດງສະວິດ ໄດ້ຢຸດສະໜັບສະໜູນແຕ່ວັນທີ 18 ພະຈິກ 2021 ເປັນຕົ້ນມາ ເຮັດໃຫ້ພາກລັດ ໄດ້ສືບຕໍ່ຈ່າຍຄ່າອາຫານ ແລະ ນ້ໍາດື່ມໃຫ້ຜູ້ຕິດເຊື້ອທີ່ເຂົ້າປິ່ນປົວທັງໝົດ ແລະ ອີງຕາມງົບປະມານທີ່ມີຈໍາກັດ, ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດພະຍາດໂຄວິດ- 19 ຂັ້ນແຂວງໆວຽງຈັນ ຈຶ່ງຮຽກຮ້ອງຜູ້ທີ່ຕິດເຊື້ອພະຍາດໂຄວິດ-19 ທີ່ຈະມາປິ່ນປົວຢູ່ໂຮງໝໍແຂວງ ຫລື ສູນປິ່ນປົວແຕ່ລະເມືອງໃຫ້ປະກອບສ່ວນການໃຊ້ຈ່າຍຄ່າອາຫານການກິນ, ນ້ໍາດື່ມ ແລະ ຢາປິ່ນປົວ ຈໍານວນໜຶ່ງ ເລີ່ມແຕ່ວັນທີ 13 ທັນວາ 2021 ເປັນຕົ້ນໄປ.
ແຈ້ງການເລກທີ 4858 ລົງວັນທີ 7 ທັນວາ 20211 ຂອງຄະນະສະເພາະກິດເພື່ອປ້ອງກັນ, ຄວບ ຄຸມ ແລະ ແກ້ໄຂການລະບາດພະຍາດໂຄວິດ- 19 ຂັ້ນແຂວງໆວຽງຈັນ ລະບຸການເລີ່ມເກັບຄ່າອາຫານ, ນ້ໍາດື່ມຂອງຜູ້ຕິດເຊື້ອເພື່ອຈະຈັດຊື້ ແລະ ອໍານວຍຄວາມສະດວກໃນການສະໜອງອາຫານໃຫ້ແກ່ຜູ້ທີ່ເຂົ້ານອນປິ່ນປົວຢູ່ສູນຕ່າງໆໃນແຂວງ ( ບໍ່ອະນຸຍາດໃຫ້ຍາດພີ່ນ້ອງຈັດສົ່ງອາຫານ ເພື່ອຫລີເວັ້ນການແພ່ເຊື້ອໃຫ້ຜູ້ອື່ນ ) ໝາຍຄວາມວ່າຜູ້ໃດຕິດເຊື້ອຈະໄດ້ຈ່າຍເປັນຄ່າອາຫານ ແລະ ນ້ໍາ ດື່ມດ້ວຍຕົນເອງໃນໄລຍະປິ່ນປົວຢູ່ສູນຂອງເມືອງ ຫລື ສູນຂອງແຂວງ ໂດຍຜູ້ໜຶ່ງຈ່າຍາອາຫານ 35.000 ກີບ/ມື້( 3 ຄາບ), ຄ່ານ້ໍາດື່ມ 7.000 ກີບ/ຄົນ/ມື້ (ໄລຍະນອນປິ່ນປົວຜູ້ທີ່ມີອາການເບົາບາງຫາປານກາງ 14 ມື້ຄ່າໃຊ້ຈ່າຍສໍາລັບອາຫານ, ນ້ໍາດື່ມລວມເປັນເງິນ 588.000 ກີບ/ຄົນ, ກໍລະນີຜູ້ທີ່ຕິດເຊື້ອຫາກມີອາການບໍ່ຫາຍດີຕາມ ກໍານົດ 14 ມື້ຈະໄດ້ສືບຕໍ່ປິ່ນປົວ ໂດຍໃຫ້ຈ່າຍເພີ່ມຕາມຈໍານວນວັນທີ່ປິ່ນປົວຕົວຈິງ.
ຂະນະທີ່ບຸກຄົນທີ່ມີບັດຢັ້ງຢືນ ແລະ ຂຶ້ນທະບຽນຄອບຄົວທຸກຍາກ, ພາກລັດຈະເປັນຜູ້ຮັບຜິດຊອບຊ່ວຍຄ່າອາຫານ ແລະ ນໍ້າດື່ມ ໃນໄລຍະປິ່ນປົວ 14 ມື້. ສໍາລັບຄອບຄົວໃດທີ່ມີຜູ້ຕິດເຊື້ອແຕ່ 3 ຄົນຂຶ້ນໄປໃຫ້ປິ່ນປົວກັບທີ່ ຢູ່ເຮືອນຂອງຕົນເອງໂດຍການຕິດຕາມຂອງແພດໝໍ.
ສໍາລັບພາກສ່ວນໂຮງຈັກ, ໂຮງງານ ຫລື ຫົວໜ່ວຍທຸລະກິດຕ່າງໆທີ່ມີພະນັກງານ ຫລື ກໍາມະກອນຕິດເຊື້ອ ຫລື ຖ້າມີກໍລະນີເກີດລະບາດໃຫ້ພົວພັນເຈົ້າໜ້າທີ່ແພດ ໝໍທີ່ກ່ຽວຂ້ອງເພື່ອຈັດຕັ້ງສະຖານທີ່ປິ່ນປົວກັບທີ່, ສ່ວນຄ່າໃຊ້ຈ່າຍຕ່າງໆມອບໃຫ້ເຈົ້າຂອງກິດຈະການເປັນຜູ້ຮັບຜິດຊອບໂດຍແພດໝໍຈະຊ່ວຍໃຫ້ຄໍາແນະນໍາວິທີປິ່ນປົວເທົ່ານັ້ນ. ສໍາລັບບັນດາສໍານັກງານ, ອົງການ, ພະແນກການ, ກົມກອງ, ລັດວິສາຫະກິດຕ່າງໆ ໃຫ້ມີມາດຕະການປ້ອງກັນຕົນເອງຖ້າພະນັກງານທີ່ສັງ ກັດຢູ່ໃນຄວາມຮັບຜິດຊອບຂອງຕົນຫາກມີຕິດເຊື້ອຈະໄດ້ມອບໃຫ້ພາກສ່ວນດັ່ງກ່າວເປັນຜູ້ຮັບຜິດຊອບໃຊ້ຈ່າຍຄ່າອາຫານ, ຄາບເຂົ້າ ແລະ ຄ່ານ້ໍາດື່ມ ດ້ວຍຕົນເອງ. ພາກລັດແມ່ນ ຈະຮັບຜິດຊອບແຕ່ສະຖານທີ່ປິ່ນປົວ, ຢາປົວພະຍາດ ແລະ ອໍານວຍຄວາມສະດວກຕ່າງໆໃນການຮັບເຂົ້າສະຖານທີ່ຮອງຮັບການປິ່ນ ປົວພະຍາດໂຄວິດ-19. ສໍາລັບຜູ້ທີ່ມີເງື່ອນໄຂ ຫລື ບໍ່ສະດວກຈະເຂົ້າໄປປິ່ນປົວຢູ່ສູນປິ່ນປົວທີ່ຄະນະສະ ເພາະກິດແຂວງ, ເມືອງໄດ້ກໍານົດໄວ້ ສາມາດປິ່ນປົວຢູ່ເຮືອນ ຫລື ຕາມໂຮງແຮມ, ເຮືອນພັກ ທີ່ຄະນະສະເພາະກິດກໍານົດໄວ້ (ສະເພາະຜູ້ມີເງື່ອນໄຂດ້ານເສດຖະກິດ) ໂດຍມີວິຊາການແພດໝໍ ຕິດຕາມໃຫ້ຄໍາປຶກສາແນະນໍາ ໃນໄລຍະປິ່ນປົວ, ແຕ່ຕ້ອງຮັບຜິດຊອບຄ່າໃຊ້ຈ່າຍພັກເຊົາຕາມລາຄາທີ່ໂຮງແຮມ, ເຮືອນພັກດ້ວຍຕົນເອງ.
